ޔުރޭނިއަމް މުއްސަނދި ކުރުން 60 ޕަސެންޓު "ޕިޔުރިޓީ" އަށް އިތުރު ކުރަން އިރާނުން ނިންމީ ސުލްހަވެރި ބޭނުމެއްގައި ނޫން ކަމަށް ސައުދީ އަރަބިއްޔާއިން ބުނެފި އެވެ.
ސައުދީ ފޮރިން މިނިސްޓްރީން ނެރުނު ބަޔާނެއްގައި ބުނީ އިރާނުގެ ނިއުކްލިއާ ޕްރޮގްރާމަށް ގެންނަމުންދާ ބަދަލުތަކާ މެދު ކަންބޮޑުވާ ކަމަށާއި ހަމަނުޖެހުމަށް ފުރުސަތު ނުދިނުމަށް ގޮވާލާ ކަމަށެވެ.
އޭގެ އިތުރުން ނިއުކްލިއާ ޕްރޮގްރާމުގެ މަޝްވަރާތަކުގައި ސީރިއަސްކޮށް ބައިވެރިވެ، ސުލްހައަށް އިސްކަން ދިނުމަށް ވެސް ދައުދީ ބަޔާނުގައި ގޮވާލާފައިވެ އެވެ.
އިރާނުގެ އެންމެ އިސް ނިއުކްލިއާ ނެގޯޝިއޭޓަރު އައްބާސް އަރަގްޗީ އިއްޔެ ވިދާޅުވީ ޔުރޭނިއަމް މުއްސަނދި ކުރުން 60 ޕަސެންޓު "ޕިޔުރިޓީ" އަށް އިތުރު ކުރާނެ ކަމަށެވެ.
އޭނާ އެހެން ވިދާޅުވެފައި ވާއިރު، އިރާނުގެ ނަތާންޒް ނިއުކްލިއާ ފެސިލިޓީއަށް ދިން ސައިބާ ހަމަލާއެއްގެ ސަބަބުން އެ ގައުމާއި އިޒްރޭލުގެ މަސްރަހު ވަނީ ވަރަށް ބޮޑަށް ހޫނުވެފަ އެވެ.
އަރަގްޗީއާ ހަވާލަދީ އިރާނުގެ ދައުލަތުގެ މީޑިއާއިން ބުނީ 60 ޕަސެންޓަށް ޔުރޭނިއަމް މުއްސަނދި ކުރަން ނިންމާ، އެކަން އިންޓަނޭޝަނަލް އެޓޮމިކް އެނާޖީ އޭޖެންސީއަށް ވެސް އަންގާފައިވާ ކަމަށެވެ.
މި އަހަރުގެ ފެބްރުއަރީ މަހު އިރާނުގެ ރޫހާނީ ލީޑަރު އާޔަތުﷲ އަލީ ހަމަނާއީ ވިދާޅުވީ އެ ގައުމުން ބޭނުން މިންވަރަކަށް ޔުރޭނިއަމް މުއްސަނދި ކުރެވެން ޖެހޭނެ ކަމަށެވެ.
އިރާނާއި ދުނިޔޭގެ އެންމެ ބާރުގަދަ ހަ ގައުމާ ދެމެދު 2015 ވަނަ އަހަރު އެކުލަވާލި ނިއުކްލިއާ އެއްބަސްވުމުގެ ދަށުން އިރާނަށް ޔުރޭނިއަމް މުއްސަނދި ކުރެވޭނީ 3.67 ޕަސެންޓަށެވެ.
