އައްޑޫ މީދޫ ދާއިރާގެ މެންބަރު ރޮޒައިނާ އާދަމްގެ ހިއްސާ އޮންނަ ކުންފުންޏެއް ކަމަށްވާ ޑީވައިއެމް ޕްރައިވެޓް ލިމިޓެޑަށް ހުޅުމާލޭގައި ކްލިނިކެއް ހިންގަން ހަވާލު ކުރުމުގައި ކޮރަޕްޝަނެއް ނެތް ކަމަށް އެންޓި ކޮރަޕްޝަން ކޮމިޝަން (އޭސީސީ)ން ނިންމައިފި އެވެ.
"ހެލްތު އެންޑް ވެލްނަސް ސެންޓަރު"ގެ ނަމުގައި ހުޅުމާލޭގައި ކްލިނިކެއް ހިންގުމަށް ޑީވައިއެމްއާ ހަވާލުކުރި މައްސަލަ ބޮޑުވީ ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު ނުރުހުންފާޅު ކުރެއްވުމާ އެކު އެވެ.
ނަޝީދު ވިދާޅުވެފައިވާ ގޮތުގައި ޑީވައިއެމް ކުންފުންޏަކީ އެކަމަށް ޝަރުތު ހަމަވާ ކުންފުންޏެއް ނޫނެވެ. އެ ކުންފުންޏާ ކްލިނިކް ހަވާލުކުރީ އިކޮނޮމިކް މިނިސްޓަރު ފައްޔާޒު އިސްމާއިލްގެ ނާޖައިޒު ނުފޫޒުން ކަމަށް ވެސް ތުހުމަތު ކުރެއްވި އެވެ.
ރޮޒައިނާ އެކަން ދޮގު ކުރައްވައި ވިދާޅުވެފައިވަނީ ވިޔަފާރި ކުރައްވަނީ ފާޅުގައި ކަމަށާއި ހުށަހެޅުއްވީ ޝަރުތު ފުރިހަމަވާ ބިޑެއް ކަމަށެވެ.
"އެންމެ ބޮޑު އަގެއް ބިޑެއް ހުށަހެޅީ ޑީވައިއެމުން، އެހެންވީއިރު އެ ކަމުގައި ފައްޔާޒަށް ގުޅައިގެން ނުފޫޒު ފޯރުވަން ޖެހޭ އެއްވެސް ސަބަބެއް ނެތް،" ރޮޒައިނާ ވިދާޅުވެފައިވެ އެވެ.
މި އަރައިރުން ބޮޑުވުމާ އެކު މައްސަލަ އޭސީސީ އަށް ބަޔަކު ހުށަހެޅީ އެވެ.
އޭސީސީގެ ތަހުގީގަށް ފަހު މައްސަލަ ނިންމި ގޮތުގެ ރިޕޯޓުގައި ބުނެފައި ވަނީ ކްލިނިކު ހަވާލުކުރާނެ ފަރާތެއް ހޯދުމަށް އެޗްޑީސީންކުރި ދެ އިވެލުއޭޝަންގައި ވެސް ދެ ފަހަރު ދެ ގޮތަކަށް ނިންމާފައިވާ ކަމާއި އެހެންވެ އަލުން އިވެލުއޭޝަން ފުރިހަމަކޮށްގެން ކުރިއަށް ގެންދަން ފެންނަ ކަމަށެވެ.
"...އެހެންނަމަވެސް، މިކަމުގައި ގަސްތުގައި ވަކި ފަރާތަކަށް ނާޖައިޒު ފައިދާއެއް ލިބިދީ، ކޮރަޕްޝަނަށް ތުހުމަތު ކުރެވޭ ކަމެއް މިހާތަނަށް ބެލި ބެލުމުން ފާހަގަކުރެވިފައެއް ނުވޭ،" އޭސީސީގެ ނިންމުމުގައިވެ އެވެ.
އެހެންވެ، އެ މައްސަލައަކީ ތަހުގީގު ކުރަން ޖެހޭ މައްސަލައެެއް ނޫން ކަމަށް ކަނޑައަޅައި، އެކަން އެޗްޑީސީއަށް ވަނީ އަންގައިފަ އެވެ.
ސިޔާސީ މަޝްރަހުގައި މި މައްސަލަ އެހާ ހޫނުވެގެން ދިޔަ ސަބަބަކީ، ރޮޒައިނާގެ ކުންފުންޏާ ވާދަކޮށްފައިވާ އަނެއް ކުންފުންޏަކީ ވެސް އެމްޑީޕީއަށް ނިސްބަތްވާ މަޖިލިސް ދެ މެންބަރެއްގެ ކުންފުންޏަކަށް ވުމެވެ. ނަޝީދާއި ފައްޔާޒާ ދެމެދު، ހިޔާލު ތަފާތުވުން ބޮޑުވެފައިވަނީ ވެސް ބައެއް މަޖިލިސް މެންބަރުންނަށް ފައިދާވާ ގޮތަށް ފައްޔާޒު ކަންކަން ބައްޓަން ކުރައްވަމުންދާ ކަމަށް ނަޝީދު ތުހުމަތު ކުރައްވާތީ އެވެ.
