ހަލާކުވެފައިވާ ފުކުޝިމާ ނިއުކްލިއާ ހަކަތަ އުފައްދާ ސްޓޭޝަނުގައި ހުރި ތަގައްޔަރުވެފައިވާ ފެންތައް ކަނޑަށް ދޫކުރަން ޖަޕާނުން ނިންމައިފި އެވެ.
އެކަން އިއުލާނު ކުރުމާއެކު އަވައްޓެރި ޗައިނާ އާއި ދެކުނު ކޮރެއާއިން ހިތްހަމަނުޖެހުން ފާޅުކުރި އެވެ. އޭގެ އިތުރުން ތިމާވެށި ހިމާޔަތް ކުރަން އުޅޭ ގްރޫޕުތަކާއި މަސްވެރިކަމުގެ ސިނާއަތުގެ މީހުން ވެސް ތިބީ ހިތްހަމަނުޖެހިފަ އެވެ.
ޖަޕާނު ސަރުކާރުން ބުނީ އެ ފެންތައް ކަނޑަށް ދޫކުރުމުގެ މަސައްކަތް ފަށާނީ އަދި ދެ އަހަރު ފަހުން ކަމަށާއި އެ މަސައްކަތް އެއްކޮށް ނިންމުމަށް ގިނަ އަހަރުތަކެއް ނަގާނެ ކަމަށެވެ.
އެ މަސައްކަތް ކުރިއަށް ގެންދާނީ ފުކުޝިމާ ޕްލާންޓު އޮޕަރޭޓް ކުރާ ޓޯކިޔޯ އިލެކްޓްރިކް ޕަވާ ކުންފުނިންނެވެ.
ފުކުޝިމާ ޕްލާންޓުގައި ގާތްގަނޑަކަށް އޮލިމްޕިކް ސައިދުގެ 500 ސްވިމިން ޕޫލު ފުރޭ ވަރަށް ތަގައްޔަރުވެފައިވާ ފެން އެބައް ހުއްޓެވެ. އެ ފެން މީގެ ކުރިން ޓްރީޓުކޮށްފައި ހުރި ނަމަވެސް ނުރައްކާތެރި މާއްދާތައް ވަކިކުރަން ފިލްޓާ ކުރަން ޖެހޭނެ އެވެ.
ކަނޑަށް ފެންތައް ދޫކުރުމުގެ ކުރިން ބައިނަލްއަގްވާމީ މިންގަނޑަށް ފައްތަން ޑިލިއުޓު ކުރަން ވެސް ޖެހެ އެވެ. އެކަމާ ގުޅިގެން ބޮޑުވަޒީރު ޔޮޝިހީޑޭ ސުގާ ވިދާޅުވީ މިއީ ފުކުޝިމާ ޕްލާންޓު ހުރި ސަރަހައްދު އަލުން ތަރައްގީ ކުރަން ކޮންމެހެން ވެސް ކުރަން ޖެހޭ މަސައްކަތެއް ކަމަށެވެ.
އެ ނިންމުމާ މެދު ހިތްހަމަނުޖެހި ޗައިނާއިން ނެރުނު ބަޔާނެއްގައި ބުނީ އަޅަން ޖެހުނު ކޮންމެ ފިޔަވަޅެއް އެ ގައުމުން އަޅާނެ ކަމަށާއި ޖަޕާނުގެ ނިންމުން ވަރަށް ޒިންމާދާރުކަން ކުޑަ ކަމަށެވެ.
ދެކުނު ކޮރެއާއިން ވެސް ބުނީ މިއީ އެއްގޮތަކަށް ވެސް ގަބޫލުކުރެވޭނެ ނިންމުމެއް ނޫން ކަމަށާއި ރަސްމީކޮށް ޖަޕާނު ސަރުކާރަށް ޝަކުވާ ހުށަހަޅާނެ ކަމަށެވެ.
ޗައިނާ އާއި ދެކުނު ކޮރެއާގެ އިތުރުން ޓައިވާނުން ވެސް ވަނީ ކަންބޮޑުވުން ފާޅުކޮށްފަ އެވެ.
ގައުމުތަކުން ކަންބޮޑުވެފައި ވަނީ އެ ފެނުގައި އެކުލެވޭ ރޭޑިއޭޝަނުގެ ސަބަބުން އިންސާނުންނާއި ތިމާވެއްޓަށް ދިގު މުއްދަތަކަށް ގެއްލުން ލިބުމުގެ ފުރުސަތު އޮތުމުންނެވެ.
ހަކަތަ އުފައްދަން ޖަޕާނުގައި ބޭނުން ކުރަމުން ދިޔަ ފުކުޝިމާ ނިއުކްލިއާ ސްޓޭޝަން އެއްކޮށް ހަލާކުވީ މީގެ 10 އަހަރު ކުރިން އައި ބޮޑު ސުނާމީއެއްގަ އެވެ.
