ނިސްބަތުން ޒުވާން ސްކޮޑަކާ އެކު މި ފަަހަރުގެ ދިރާގު ދިވެހި ޕްރިމިއާ ލީގުގައި ރަނގަޅު ކުޅުމެއް ދައްކަމުން އަންނަ ކްލަބް ގްރީން ސްޓްރީޓްސް އަށް ލީގުގައި ވާދަކުރާ ކޮންމެ ޓީމަކާ ވެސް ޗެލެންޖް ކުރެވިދާނެ ކަމަށް އެ ޓީމުގެ ވައިސް ކެޕްޓަން މުހައްމަދު ސާއިފް ބުނެފި އެވެ.
ލީގުގައި އެންމެ ފަހުން ގްރީން ސްޓްރީޓްސް އިން ޓީސީއާ ދެކޮޅަށް ކުޅުނު މެޗުގެ މޮޅު ކުޅުންތެރިޔާގެ މަގާމު ހޯދީ ސާއިފް އެވެ. އޭނާ އަކީ މި ފަހަރު ގްރީން ސްޓްރީޓްސް އިން ލީގުގައި ކުޅުނު މެޗުތަކުގައި ރަނގަޅު ކުޅުމެއް ދައްކަމުން އަންނަ ކުޅުންތެރިއެކެވެ.
ގްރީން ސްޓްރީޓްސް މި ވަގުތު ލީގުގެ ތިން ވަނައިގައި އޮތީ 12 މެޗުން 18 ޕޮއިންޓް ހޯދައިގެންނެވެ. ސާއިފް ބުނީ ގްރީން ސްޓްރީޓްސް އިން ކޮންމެ މެޗަކަށް ވެސް ނުކުންނަނީ ތިން ޕޮއިންޓަށް ޓާގެޓް ކޮށްގެން ކަމަށެވެ.
"އަސްލު ހަގީގަތުގައި ގްރީން މިއީ ވަރުގަދަ ޓީމެއް. ހުރިހާ ޓީމަކާ ވެސް ޗެލެންޖް ކުރެވޭނެ ވަރުގެ ޓީމެއް. ދެން (ޓީސީ މެޗުގައި ވެސް) މޮޅަކަށް ކުޅުނީ ދެން މޮޅުވުމާއި ނުވުން އެއީ އެހެން ފަރާތަކުން ވާ ކަމެއް،" ސާއިފް ބުންޏެވެ.
އުމުރުފުރާ ގައުމީ ޓީމުތަކުގައި ކުޅުނު ސާއިފް ވަނީ ގައުމީ ސީނިއާ ޓީމުން ވެސް ފުރުސަތު ހޯދައިފަ އެވެ. ޔޫތު ޗެމްޕިއަންޝިޕް ފުޓްބޯޅަ މުބާރާތުން ވެސް ފާހަގަވި ސާއިފް ފުރަތަމަ ޑިވިޝަނުގައި ޒުވާން އުމުރުގައި ކުޅެން ފެށި އެވެ. ސާއިފް ވަނީ ކްލަބް ވެލެންސިއާ އާއި މާޒިޔާގެ އިތުރުން ވިކްޓްރީ އަށް ވެސް ކުޅެފަ އެވެ. ގްރީން ސްޓްރީޓްސް އަށް ބަދަލުވުމަށް ފަހު ސާއިފް ވަނީ ކޯޗު އަލީ ސުޒޭންގެ އިރުޝާދުގެ ދަށުން ވެސް ރަނގަޅު ކުޅުމެއް ދައްކައިފަ އެވެ.
ލީގުގައި ޓީސީ ސްޕޯޓްސް ކްލަބާ ދެކޮޅަށް ގްރީން ސްޓްރީޓްސް ކުޅުނު މެޗުގެ ތެރެއިން ސާއިފް ބޯޅަ ހިފައިގެން-- ފޮޓޯ: އިބްރާހިމް ފާއިދު/ އެފްއޭއެމް
ގްރީން ސްޓްރީޓްސްގެ ކޯޗުކަމާ އަލީ ނިސްތާރު މުހައްމަދު، މިދިޔަ އަހަރު ހަވާލުވިފަހުން އެ ޓީމު އޮތީ ވަރަށް ބޮޑަށް ޒުވާންވެފަ އެވެ. ސާއިފް ބުނީ ޒުވާން ކުޅުންތެރިން ގިނަ ސްކޮޑަކާ ބަލާއިރު، އެ ޓީމުން ނެރޭ ނަތީޖާތައް ރަނގަޅު ކަމަށެވެ.
"(ޒުވާން) ޔަންގް ކުޅުންތެރިންނާ ބަލާފައި ހަމަ ވަރަށް ރަނގަޅު މި ޓީމު ހަމަ. އަނެއްހެން ބުނާނަމަ އޯލްޑް (ދުވަސްވީ) ޕްލޭޔަރުންނެއް އަނެއްހެން ނުއެއް ނެތް. ނަން މަޝްހޫރު ކުޅުންތެރިންނެއް ވެސް ނެތް. ދެން ރިލޭ (ރިލްވާން ވަހީދު) ހުރީ. އެއީ އަޅުގަނޑުމެންގެ ކެޕްޓަން. ޔަންގް (ޒުވާން) ސްކޮޑަކާ ބަަލައި ވަރަށް ރަނގަޅު ޕާފޯމަންސް (ކުޅުމެއް) ދައްކަމުން މިދަނީ،" ސާއިފް ބުންޏެވެ.
އުމުރުން 27 އަހަރުގެ ސާއިފަކީ މި ސީޒަނުގައި ގްރީން ސްޓްރީޓްސްގެ ހުރިހާ މެޗެއްގައި ކުޅެފައިވާ ކުޅުންތެރިއެކެވެ. ލީގުގެ ގިނަ މެޗުތަކެއްގައި އެއް ފެންވަރެއްގައި ކުޅުން ދަމަހައްޓަމުން އަންނަ ކުޅުންތެރިންގެ ތެރޭގައި އޭނާ ހިމެނެ އެވެ.
"މި ބަލަނީ ކޮންމެ މެޗެއްގައި ވެސް 100 ޕަސެންޓް ދެވޭތޯ. ގިނަ ފަހަރަށް 100 ޕަސެންޓް ދިނިއްޔާ މި ދަނީ ރަނގަޅަށް،" ސާއިފް ބުންޏެވެ.
ލީގުގައި ގްރީން ސްޓްރީޓްސް ދެން އެންމެ އަވަހަށް ކުޅޭ މެޗުގައި އަންނަ ބުރާސްފަތި ދުވަހުގެރޭ ނުކުންނާނީ އީގަލްސްއާ ދެކޮޅަށެެވެ. މެޗު ފަށާނީ ގަޑިން 22:00 ގަ އެވެ.
