ހޮނިހިރުދުވަހު ބޭއްވި އިންތިހާބުގައި އެންމެ ޝައުގުވެރި އެއް ކަމަކީ ކ. ހިންމަފުށީ ކައުންސިލްގެ ރައީސްކަމަށް ދެބެއިން ވާދަކުރުމެވެ. އެ ކައުންސިލްގެ ރައީސްކަމުގައި ހުންނެވި ޕީޕީއެމްގެ މެމްބަރު، ޝާން އިބްރާހީމްއާ ވާދަކުރެއްވީ އޭނާގެ އެއްބަނޑު އެއްބަފާ ބޭބެ ފަރުހާދު އިބްރާހީމެވެ.
ކައުންސިލްގެ ރައީސްކަން ނެގުމުގެ އަޒުމާ އެކު ނުކުތް މި ދެބެއިންނާ އެކު އެ ގޮނޑިއަށް ހަތަރު ކެންޑިޑަކު ވާދަކޮށް ކެމްޕޭން ފޯރި ގަދަ އެވެ. އެކަކު އަނެކަކަށް ދޫނުކޮށް ދެ މީހުން ކުރިއަށް ގެންދިޔަ ކެމްޕޭންގައި މޮޅުވީ އެހެން ކެންޑިޑޭޓެކެވެ.
އެއީ، ކައުންސިލްގެ ނައިބު ރައީސަކަށް ހުންނަވައި ރައީސްކަމުގެ ގޮނޑިއަށް ވާދަކުރެއްވި ހަސަން ފާއިޒެވެ.
އިންތިހާބުގައި ޝާންއަށް 246 ވޯޓު ލިބިވަޑައިގަތްއިރު ހަސަން ފާއިޒު ކާމިޔާބު ހޯއްދެވީ 347 ވޯޓުނެވެ. ޝާންއާ ވާދަ ކުރި އޭނާގެ ބޭބެއަށް ލިބުނީ 27 ވޯޓެވެ.
މީގެ ކުރިން ބޭއްވި ހުރިހާ ލޯކަލް ކައުންސިލްތަކެއްގެ އިންތިހާބު ހިންމަފުށިން ކާމިޔާބު ކޮށްފައިވަނީ ޕީޕީއެމް އެވެ. ނަމަވެސް މިފަހަރު އިންތިހާބުވީ އަމިއްލަ ފަސް މެމްބަރުންނެވެ. ޝާންއާ އެކު އިންތިހާބުގައި ޕީޕީއެމުން ވާދަ ކުރި ތިން ކެންޑިޑޭޓުން ވަނީ ފަހުން ނަން ނަގައިފަ އެވެ.
ތިން ދައުރަށް ފަހު އިންތިހާބު ނުވި ސަބަބާ ގުޅޭގޮތުން ޝާން "އަދަދު" އަށް ވިދާޅުވީ މީގެ ކުރިން ހުރިހާ އިންތިހާބެއްގައި އެ ރަށުން ޕީޕީއެމް ކުރި ހޯދި ނަމަވެސް މިހާރު އެ ޕާޓީގެ ރޫހު ދަށްވެފައިވާ ކަމަށެވެ. އަދި އޭނާއާ ޕީޕީއެމްގެ ދެ މީހަކު އަމިއްލަ ގޮތުން ވާދަ ކުރުމުން ވެސް ވޯޓްތައް ބެހިގެން ދިޔަ ކަމަށް އޭނާ ވިދާޅުވި އެވެ.
"ޕީޕީއެމް އޮތް ހާލަތުން ފަންޑެއް ވެސް ނުކުރި. އެވެސް ކުރިމަތިވި ކަމެއް،" ޝާން ވިދާޅުވި އެވެ.
އޭނާގެ ބޭބެ އިދިކޮޅު ކެންޑިޑޭޓެއްގެ ގޮތުގައި ވާދަ ކުރުމަކީ ވެސް ކުރިމަތިވި ހުރަހެއް ކަމަށް ޝާން ވިދާޅުވި އެވެ. ނަމަވެސް އެކަމުގެ ތަފްސީލު ނޫހުގައި ޖަހަން ޝާން ބޭނުމެއް ނުވެ އެވެ.
ޝާން ވިދާޅުވި ގޮތުގައި އެ އާއިލާގައި 11 މީހުން ތިބޭއިރު އާއިލާއިން ތާއީދު ކުރީ އޭނާ އަށެވެ. ސަބަބަކީ އޭނާއަކީ ގާބިލު މީހާ ކަމަށް އާއިލާއިން ގަބޫލު ކުރުން ކަމަށް އޭނާ ދެކެ އެވެ.
ހިންމަފުށީ ކައުންސިލްގެ ރައީސްގެ މަގާމަށް ހޮވުނު ހަސަން ފާއިޒް، "އަދަދު" އަށް ވިދާޅުވިގޮތުގައި އޭނާ އިންތިހާބުވި ސަބަބަކީ ޕާޓީގެ ފިކުރަށް ވުރެން ހިދުމަތް ކުރަން ގާބިލް މީހާއަށް ރައްޔިތުން އިސްކަން ދިނުމެވެ. ވޭތުވެދިޔަ ދެ ދައުރުގައި ޕީޕީއެމްގެ ޓިކެޓްގައި އޭނާ ކައުންސިލްގައި ކުރި މަސައްކަތް ރައްޔިތުން ބަލައިގަތީ ކަމަށް ހަސަން ގަބޫލު ކުރައްވަ އެވެ.
ޝާން އާއި އޭނާގެ ބޭބެ ވާދަ ކުރުމަކީ ހަސަން ހޮވުނު ސަބަބު ކަމަށް އޭނާ ގަބޫލެއް ނުކުރައްވަ އެވެ.
"އެ ދެ މީހުންގެ ވޯޓް އެއްކުރީމައި ވެސް އަޅުގަނޑާ ވާދައެއް ނުކުރެވޭ. އެހެންވީމަ އެހެންވެ އެއް ނޫން ހޮވުނީއެއް،" ހަސަން ބުންޏެވެ.
ހަސަން ވިދާޅުވި ގޮތުގައި އޭނާ އިސްކަން ދޭނީ ރައްޔިތުންގެ ހިޔާލު ހޯދައިގެން މަސައްކަތް ކުރުމަށެވެ.
