ދުބާއީގެ އެގްޒެކިއުޓާސް ޖެނެރަލްއާ ހަވާލުކޮށްގެން ވެންޓިލޭޓަރުތައް ގެނައުމުގައި ހިޔާނާތް ހިންގާފައިވާ ކަމަށް ތުހުމަތުކުރާ މައްސަލައިގައި ޕްރޮސިކިއުޓަ ޖެނެރަލްގެ އޮފީހުން އެންގި ކަންކަން ފުރިހަމަ ކުރަމުން އަންނަ ކަމަށް އެންޓި ކޮރަޕްޝަން ކޮމިޝަން (އޭސީސީ)ން މިއަދު ބުނެފި އެވެ.
ދައުވާކޮށްދޭން އޭސީސީން އެދުނު ވެންޓިލޭޓަރު މައްސަލައިގައި ދެ ފަހަރަށް ވެސް ދައުވާނުކުރަން ނިންމައި ޕީޖީ އޮފީހުން އެންގީ އިތުރު ކަންކަން ފުރިހަމަ ކުރާށެވެ.
އޭސީސީގެ މީޑިއާ އޮފިޝަލް ހަސަން މަނިކު ވިދާޅުވީ ޕީޖީން އަންގާފައިވާ ގޮތަށް މައްސަލަ ކުރިއަށް އެބަގެންދާ ކަމަށެވެ.
އެނގިފައިވާ ގޮތުގައި ޕީޖީ އޮފީހުން މިފަހަރު އެންގީ އެގްޒިކިއުޓާސް ޖެނެރަލްއާ އެކު ހެލްތު މިނިސްޓްރީން ވީ އެއްބަސްވުމުގެ މައްސަަލަ އާއި ފައިސާ ދައުރުވި ގޮތް ބަލާށެވެ.
ވެންޓިލޭޓަރު މައްސަލައިގައި އޭސީސީން ދައުވާކޮށްދޭން އެދުނީ ކުރީގެ ހެލްތު މިނިސްޓަރު އަބްދުﷲ އަމީން ހިމެނޭ ގޮތުން 11 މީހެއްގެ މައްޗަށެވެ.
ޕްރޮސިކިއުޓަ ޖެނެރަލް ހުސެއިން ޝަމީމް ކުރިން ވިދާޅުވެފައިވާ ގޮތުގައި، އެ މައްސަލައިގައި ތުހުމަތުކުރި ކުށް ސާބިތުކުރެވޭނެ ހެއްކާ އެކު ހުށަހެޅި ނަމަ މިނިސްޓަރު އަމީނާއި ދެން ތިއްބެވި ބޭފުޅުންގެ މައްޗަށް ވެސް ދައުވާ އުފުއްލަވާނެ އެވެ. އެކަމަކު އޭސީސީގެ މުޅި ތަހުގީގުން ފާހަގަވެފައި އޮތީ، ޕީޖީ ވިދާޅުވި ގޮތުގައި، އަމަލުކުރި ގޮތުން އަރާފައި ހުރި އޮޅުންތައް ނުވަތަ މައްސަލަތަކެކެވެ.
ކޮރަޕްޝަންގެ ދައުވާ އުފުލިއިރު، އެއްވެސް މީހަކަށް މާލީ މަންފާއެއް ލިބުނު ކަން ސާބިތުކޮށްދެވޭނެ އެއްވެސް ހެއްކެއް ނެތް ކަމަށް ޕީޖީ ވިދާޅުވެފައިވެ އެވެ.
ވެންޓިލޭޓަރު ހޯދަން އެގްޒެކިއުޓާސްއާ އެކު ހެލްތު މިނިސްޓްރީން އެއްބަސްވީ 34 މިލިއަން ރުފިޔާ އަށެވެ. މީގެތެރެއިން 30 މިލިއަން ރުފިޔާ އެ ކުންފުންޏަށް އެޑްވާންސްގެ ގޮތުގައި ދޫކުރީ ބޭންކް ގެރެންޓީއަކާ ނުލަ އެވެ. މިއީ ގޯސްކޮށް ހިންގާފައިވާ މުއާމަލާތެއް ކަން އޮޑިޓް ރިޕޯޓުގައި ވަނިކޮށް އޭސީސީން މި މައްސަލަ ތަހުގީގުކޮށް ހިޔާނާތް ހިންގާފައިވާ ކަމުގެ ތުހުމަތުތަކާ އެކު ދައުވާ އުފުލައިދޭން އެދުނީ ހެއްކާ އެކުގައި ކަަމަށް އޭސީސީން ބުނެފައިވެ އެވެ.
އެ ކޮމިޝަނުން ބުނެފައިވާ ގޮތުގައި، ދައުވާ ކުރަން ފޮނުވީ، ދައުލަތުގެ މާލިއްޔަތުގެ ގަވާއިދާ ހިލާފުވެ، ވަކި ފަރާތަކަށް ނާޖާއިޒު މަންފާއެއް ހޯދައިދިން ކަމަށް އެކަށީގެންވާ މިންވަރަށް ހެއްކާއި ގަރީނާ ހުރި ކަމަށް ތަހުގީގަށް ސާބިތުވާތީ އެވެ.
އެގްޒެކިއުޓާސްއާއެކު ހެލްތު މިނިސްޓްރީން އެއްބަސްވީ 75 ވެންޓިލޭޓަރު ގެންނާށެވެ. އެކަމަކު އެ ކުންފުނިން ރާއްޖެ ފޮނުވީ 15 ވެންޓިލޭޓަރެވެ. ބާކީ ވެންޓިލޭޓަރުތައް ނުލިބުނު މައްސަލަ އިންޓަނޭޝަނަލް އާބިޓްރޭޝަނަށް ހުށަހަޅައިގެން ކުރިއަށް ގެންދަން ސަރުކާރުން ވަނީ ނިންމައިފަ އެވެ.
