ހޮނިހިރު ދުވަހު ރާއްޖޭގައި ބޭއްވި ލޯކަލް ކައުންސިލްތަކުގެ އިންތިހާބުގައި ރައްޔިތުން ވޯޓުލީ ގޮތް ސަރުކާރުން ބަލައިގަންނަ ކަމަށާއި މަސައްކަތް ކުރާނީ ރައްޔިތުންގެ ވިންދާ އެއްކޮށް ކަމަށް ބުނުމުން މާލޭގެ އިންތިހާބީ މޭޔަރު ޑރ. މުހައްމަދު މުއިއްޒު އެކަން ބަލައިގެންފި އެވެ.
މާލޭ މޭޔަރު ކަމުގެ ގޮނޑި ގާތްގަނޑަކަށް 60 ޕަސެންޓު ވޯޓާއެކު ކާމިޔާބު ކުރެއްވި އިދިކޮޅު ޕްރޮގްރެސިވް ޕާޓީ އޮފް މޯލްޑިވްސްގެ ކެންޑިޑޭޓު މުއިއްޒު "އަދަދު" އަށް ދެއްވި އިންޓަވިއުއެއްގައި ވިދާޅުވީ، ސަރުކާރުގެ ފަރާތުން މިހާތަނަށް ފެނިފައި ވަނީ "ޕޮޒިޓިވް" އިޝާރާތްތަކެއް ކަމަށެވެ.
"ސަރުކާރުގެ ވާހަކަތައް އެއީ އަޅުގަނޑު ވަރަށް ބަލައިގަންނަ ވާހަކަތަކެއް. އަޅުގަނޑު ދެކެން ޖެހޭނީ ޕޮޒިޓިވްކޮށް، މަސައްކަތް ފަށައިގަނެ، ރައްޔިތުންގެ އެދުމަށް ވާސިލްވުމަށް ހުރަސްނޭޅޭހާ ދުވަހަކު،" މުއިއްޒު ވިދާޅުވި އެވެ.
ކައުންސިލްތަކުގެ އިންތިހާބާ ގުޅިގެން ރައީސް އޮފީހުން އިއްޔެ ނެރުނު ބަޔާނެއްގައި ބުނެފައި ވަނީ ލާމަރުކަޒީ ނިޒާމުން ގައުމު ހިންގުމަށް އިންތިހާބުވި ހުރިހާ ކެންޑިޑޭޓުންނަކަށް ރައީސް އިބްރާހިމް މުހައްމަދު ސޯލިހު އެއްބާރުލުން ދެއްވާނެ ކަމަށެވެ.
"މި އިންތިހާބުގައި ރައްޔިތުން ލީ ވޯޓާއި ރައްޔިތުންގެ އިހްސާސްތައް ފުރިހަމައަށް ސަރުކާރުން ބަލައިގަނެ، އަދި، ރައްޔިތުންގެ ވިންދާ އެއްގޮތަށް ސަރުކާރުގެ ހިންގުން ކުރިއަށް ގެންދާނެކަމުގެ ފުރިހަމަ ޔަގީންކަން [ރައީސް ސޯލިހު] އަރުވަ އެވެ،" އެ ބަޔާނުގައިވެ އެވެ.
މުއިއްޒު ވިދާޅުވީ ރައީސް އޮފީހުން ނެރުނު ބަޔާނުގެ މާނައަކީ، ސަރުކާރާމެދު ރައްޔިތުންގެ ހިތުގައި އޮތް ހިތްހަމަނުޖެހުން ސަރުކާރުން ބަލައިގަތުމެވެ.
"ސަރުކާރުގެ ބަޔާނުން އަޅުގަނޑަށް ދޭހަވަނީ، ސަރުކާރުން މިހާތަނަށް މަސައްކަތް ކުރަމުން އައި ގޮތާމެދު ރައްޔިތުންގެ ތެރޭގައި އޮތް ހިތްހަމަނުޖެހުން ބަލައިގަންނަމޭ. އަޅުގަނޑަށް ވެސް އެއްބާރުލުން ދޭނަމޭ،" އޭނާ ވިދާޅުވި އެވެ.
ރައްޔިތުން އެދޭ ގޮތަށް މަސައްކަތް ކުރާ ނަމަ ސަރުކާރާއެކު މަސައްކަތް ކުރެއްވުމަށް ތައްޔާރަށް ހުންނެވި ކަމަށް ވެސް މުއިއްޒު ވިދާޅުވި އެވެ.
"އަޅުގަނޑު އަބަދުވެސް ދައްކަމުން އައި ވާހަކައަކީ، އަޅުގަނޑު މަސައްކަތް ކުރާނީ ރައްޔިތުންގެ ފަޅީގައި ހުރެގެން، ރައްޔިތުންގެ އެދޭ ކަންކަން ކުރުމަށް އަޅުގަނޑު އިސް ނަގައިގެން، ސަރުކާރުގެ ފަރާތުން ރައްޔިތުންގެ އެދުންތައް ފުރިހަމަ ކޮށްދެވޭތޯ،" މުއިއްޒު އޭނާގެ ވިސްނުން ހާމަ ކުރެއްވަމުން ވިދާޅުވި އެވެ.
ރައީސް ސޯލިހުގެ އިތުރުން، ވެރިކަން ކުރާ މައި ޕާޓީ އެމްޑީޕީގެ ރައީސް އަދި ކުރީގެ ރައީސް މުހައްމަދު ނަޝީދު ވެސް ވަނީ އެމްޑީޕީގެ ކޮންޓްރޯލް ނެތް ކައުންސިލްތަކަށް ހުރަސްނާޅުއްވާނެ ކަމުގެ ޔަގީންކަން ދެއްވައިފަ އެވެ.
އިއްޔެ ބޭއްވި ނޫސްވެރިންގެ ބައްދަލުވުމެއްގައި ނޫސްވެރިއަކު ކުރި ސުވާލަކަށް ޖަވާބު ދެއްވަމުން ނަޝީދު ވިދާޅުވީ، އިދިކޮޅަށް އަގުލަބިއްޔަތު މާލޭ ސިޓީ ކައުންސިލުން ކާމިޔާބު ޕްރޮގްރާމެއް ކުރިއަށް ގެންދާނަމަ، އެކަމަށް އެމްޑީޕީން ވެސް އަދި ސަރުކާރުން ވެސް ހުރަހެއް ނާޅާނެ ކަމަށެވެ.
"އަޅުގަނޑުމެންނަށް މި އޮތް ދެ އަހަރުގެ ތެރޭގައި މުއިއްޒު ނިކަމެތިކޮށްލެވިދާނެ. އެކަމަކު އެކަން ކޮށްފިނަމަ ހަގީގަތުގަ ނިކަމެތިވެގެންދާނީ ރައްޔިތުން،" ނަޝީދު އިއްޔެ ވިދާޅުވި އެވެ.
ހޮނިހިރު ދުވަހުގެ އިންތިހާބުގައި މުޅި ރާއްޖޭގެ ގިނަ ކައުންސިލްތަކެއްގެ މެޖޯރިޓީ އެމްޑީޕީއަށް ލިބުނު ނަމަވެސް ބޮޑެތި ކައުންސިލްތަކެއްގެ ބާރު ވަނީ ގެއްލިފަ އެވެ. އެގޮތުން މާލޭ ސިޓީ ކައުންސިލްގެ އަގުލަބިއްޔަތު ލިބުނީ ވެސް އިދިކޮޅު ޕީޕީއެމަށެވެ.
