މާލޭގެ މޭޔަރު ކަމުގެ މަގާމު ކާމިޔާބު ކުރެއްވި ކުރީގެ ހައުސިން މިނިސްޓަރު ޑރ. މުހައްމަދު މުއިއްޒަށް ރައީސް އިބްރާހިމް މުހައްމަދު ސޯލިހު މަރުހަބާ ވިދާޅުވެއްޖެ އެވެ.
ހަތް އަހަރު ހައުސިން މިނިސްޓަރުކަން ކުރެއްވި މުއިއްޒު، އިންތިހާބު ކާމިޔާބު ކުރެއްވީ އެމްޑީޕީގެ ކެންޑިޑޭޓް އަނަސް އަބްދުލްސައްތާރު ބޮޑު ތަފާތަކުން ބަލި ކުރެއްވުމަށްފަހު އެވެ.
އެމްޑީޕީގެ ވަރަށް ގިނަ އިސް ބޭފުޅުންތަކެއް ނުކުންނަވައި، އެމްޑީޕީގެ އެސްޖީގެ މަގާމު އަދާކުރެއްވި އަނަސްއަށް ކެމްޕެއިންކޮށް ދެއްވި ނަމަވެސް، މުއިއްޒު ވެސް ވަރުގަދަ ކެމްޕެއިނެއް ކުރެއްވި އެވެ.
މާލޭން ބޮޑު ކާމިޔާބީއެއް މުއިއްޒު ހޯއްދަވާފައިވަނިކޮށް، ރޭ އޭނާއަށް ރައީސް ސޯލިހު ގުޅުއްވައި، ވަނީ މަރުހަބާ ވިދާޅުވެފަ އެވެ. ރައީސް އޮފީހުގެ ތަރުޖަމާނު މަބުރޫކު އަޒީޒު ވިދާޅުވި ގޮތުގައި ރައީސް ސޯލިހު ވަނީ އިންތިހާބުވި ހުރިހާ މެންބަރުންނަށް ގުޅުއްވައި މަރުހަބާ ވިދާޅުވެފަ ކަމަށެވެ.
"ލާމަރުކަޒީ ނިޒާމުގެ ތެރެއިން ތަރައްގީގެ މަޝްރޫއުތައް ހިންގުމުގައި ފުރިހަމަ އެއްބާރުލުން ދެއްވާނެ ކަމުގެ ޔަގީންކަން ދެއްވި،" މަބުރޫކު ވިދާޅުވި އެވެ.
ލާމަރުކަޒީ ގާނޫނުން މާލޭ ސިޓީގެ މޭޔަރު ކަމަށް ބޮޑެތި ބާރުތަކެއް ލިބޭއިރު މިއީ ރައީސް ފިޔަވައި އެންމެ ގިނަ ރައްޔިތުންތަކެއް ވޯޓުދޭ މަގާމެވެ. އެ މަގާމު ފިޔަވައި، އަނެއް ތިން ސިޓީގެ މޭޔަރުކަން އެމްޑީޕީއިން ކަށަވަރުކުރި އެވެ.
އެމްޑީޕީގެ ރައީސް މުހައްމަދު ނަޝީދު ވެސް ވަނީ އިންތިހާބުވި މޭޔަރުންނަށް މަރުހަބާ ވިދާޅުވެފަ އެވެ. ނަޝީދު ވިދާޅުވި ގޮތުގައި މާލޭގެ މޭޔަރު މުއިއްޒަށް ދެއްވަން ޖެހޭ ހުރިހާ އެއްބާރުލުމެއް ދެއްވާނެ އެވެ.
އިންތިހާބު ކާމިޔާބު ކުރެއްވުމަށްފަހު، ރޭ ނޫސްވެރިންނަށް މައުލޫމާތު ދެއްވަމުން މުއިއްޒު ވިދާޅުވި ގޮތުގައި އޭނާ މަސައްކަތް ކުރައްވާނީ ސަރުކާރާއެކު ރައްޔިތުންގެ ފަޅީގަ އެވެ. ރައްޔިތުންނަށް ފައިދާވާ ކަންކަމުގައި ސަރުކާރާއެކު އެކަން އިތުރަށް ފުރިހަމަ ކުރުމަށް މަސައްކަތް ކުރައްވާނެ ކަމަށާއި ހަމަ އެގޮތަށް ރައްޔިތުންގެ އަޑު ވެސް އުފުއްލަވާނެ ކަމަށް ވިދާޅުވި އެވެ.
