މަސައްކަތް ކުރައްވާނީ ރައްޔިތުންގެ ފަޅީގައި ހުރެގެން ސަރުކާރާއެކުގައި ކަމަށް މާލޭ މޭޔަރު ކަމުގެ އިންތިހާބު ކާމިޔާބު ކުރެއްވި ޑރ. މުހައްމަދު މުއިއްޒު މިރޭ ވިދާޅުވެއްޖެ އެވެ.
ޕީޕީއެމް އޮފީހުގައި މިރޭ ބޭއްވި ނޫސްވެރިންގެ ބައްދަލުވުމުގައި ކުރީގެ ހައުސިން މިނިސްޓަރު މުއިއްޒު ވިދާޅުވީ އޭނާ މޭޔަރު ކަމަށް ވާދަ ކުރެއްވީ މާލެއަށް ދިމާވެފައިވާ މައްސަލަތަކަށް ހައްލު ހޯދައި ދިނުމަށްޓަކައި ކަމަށާއި އެ ފުރުސަތު މާލޭ ރައްޔިތުން ދިނީތީ އުފާ ކުރައްވާ ކަމަށެވެ.
"މާލޭގެ ހުރިހާ ރައްޔިތުންނަށް ހިތުގެ ފުންމިނުން ޝުކުރު ދަންނަވަން. އަޅުގަނޑު އުފާވަނީ ފުރުސަތު ދެއްވީތީ. އަޅުގަނޑަށް އިތުބާރު ކުރެއްވީތީ. ތި ބޭފުޅުން ކުރެއްވި އިތުބާރު އަޅުގަނޑު އިހުލާސްތެރިކަމާއެކު ދަމަހައްޓާނަން،" ހޮވުނު އެހެން ކެންޑިޑޭޓުންނާއެކު ބޭއްވި ނޫސްވެރިންގެ ބައްދަލުވުމުގައި މުއިއްޒު ވިދާޅުވި އެވެ.
މާލޭ ސިޓީ ކައުންސިލްގެ ގޮނޑިތައް ކާމިޔާބު ކުރި އިދިކޮޅު ކޯލިޝަންގެ ކެންޑިޑޭޓުންނާއި އެ ކޯލިޝަންގެ ވެރިން-- މުއިއްޒު ވިދާޅުވީ ތަފާތު ދައްކާނެ ކަމަށް-- ފޮޓޯ: އާއިމް/އަދަދު
ވައުދުތަކަށް އަލި އަޅުއްވާލައްވައި މުއިއްޒު ވިދާޅުވީ މާލޭގެ ރައްޔިތުން ވޯޓު ދިނީ ގުޅިފަޅަކީ ގެދޮރުގެ މަންޒިލަކަށް ހަދަން ބޭނުންވާތީ ކަމަށެވެ. އެހެންކަމުން ރަސްމީކޮށް މަސައްކަތް ފަށާ ދުވަހު ގުޅިފަޅަކީ ގެދޮރުގެ މަންޒިލަކަށް ހަދައި ދިނުމަށް ސަރުކާރާއެކު މަސައްކަތް ކުރައްވާނެ ކަމަށް އޭނާ ވިދާޅުވި އެވެ.
މުއިއްޒު ވިދާޅުވީ މާލޭ ރައްޔިތުންގެ އުއްމީދުތައް ހާސިލްކޮށް ދިނުމަށް މަސައްކަތް ކުރައްވާނީ ހޮވުނު 18 މެމްބަރުންނާ ގުޅިގެން ކަމަށެވެ.
އޭނާ ވިދާޅުވީ ހޮވުނު ކައުންސިލަރުން ވާނީ ޒިންމާދާރު ބަޔަކަށް ކަމަށާއި ކުރިއަށް އޮތީ އުޖާލާ ދުވަސްތަކެއް ކަމަށެވެ.
އަޅުގަނޑު ޔަގީންކަން ދެން، ސިޓީ ކައުންސިލަށް އިންތިހާބުވި 18 ކައުންސިލަރުންނާއެކު، ޓީމެއްގެ ގޮތުގައި މަސައްކަތްކޮށް ނަތީޖާ ނެރޭނަން. ސަރުކާރުން ކުރިޔަސް ރައްޔިތުންނަށް ފައިދާ ހުރި ކަންކަމަށް ފުރިހަމަ އެއްބާރުލުން ދޭނަން
މާލޭގެ އިންތިހާބެއް ފުރަތަމަ ފަހަރަށް އިދިކޮޅަށް ކާމިޔާބު ކުރެވުނުއިރު މުއިއްޒު ވިދާޅުވީ މިއަދު ރައްޔިތުން ނިންމި ނިންމުމަކީ ވަރަށް ތާރީހީ ނިންމުމެއް ކަމަށެވެ. އަމިއްލަ އެޖެންޑާއަކަށްވުރެ ގައުމުގެ އެޖެންޑާ އިސްކުރަންޖެހޭ ކަމަށް ވެސް މުއިއްޒު ވިދާޅުވި އެވެ.
ފަސް އަހަރުގެ ޖަލު ހުކުމެއް ތަންފީޒު ކުރައްވަމުން ގެންދަވާ ކުރީގެ ރައީސް އަބްދުﷲ ޔާމީން މިނިވަން ކޮށްދެއްވައި އިންސާފު ގާއިމުކޮށް ދިނުމަށް ވެސް މުއިއްޒު ސަރުކާރަށް ގޮވާލެއްވި އެވެ.
