"މީޑިއާނެޓް އޮރިޖިނަލްސް" ގެ ފުރަތަމަ ފީޗާ ފިލްމް "މަރްޔަމް" މީޑިއާނެޓުގެ މަލްޓި-ސްކްރީން އެޕްލިކޭޝަނަށް ބުރާސްފަތި ދުވަހު ރިލީޒްކޮށްފި އެވެ.
މި ޕޮލިޓިކަލް ތުރިލާ އަކީ ރާއްޖެ އެކަމަކަށް ގޮސް ހުސްވެފައިވާ ސިޔާސީ ދާއިރާގެ ހާދިސާއަކަށް، ސައްތައިން ސައްތަ ބިނާކޮށް ރާއްޖޭގައި އުފެއްދި ފުރަތަމަ ފިލްމެވެ.
ފިލްމުގައި ދައްކަނީ ހިޔާލީ ދާއިރާއެއް ކަމަށްވާ ކަނޑިފަރު ދާއިރާގެ ރައްޔިތުންގެ މަޖިލީހުގެ މެމްބަރުކަމަށް ނުކުންނަ މަރްޔަމް ކިޔާ ކެންޑިޑޭޓެއްގެ ވާހަކަ އެވެ. ސިޔާސީ ދާއިރާގެ އެއްވެސް ތަޖުރިބާއެއް ނެތި މަރްޔަމް، ދާއިރާގެ ނުފޫޒު ގަދަ ސިޔާސީ މީހަކާ ދެކޮޅަށް ނުކުތުމުން ދެން ވާނެ ގޮތް ޖެހޭނީ ފިލްމުން ބަލާލާށެވެ.
އިބްރާހިމް ވިޝާމް (ކަނޑި) ޑައިރެކްޓްކުރި މި ފިލްމުގައި މަރްޔަމްގެ ރޯލު ކުޅެފައިވަނީ ޑާކްރެއިންގެ ފިލްމުތަކުން މަޝްހޫރުކަން ހޯދި މަރިޔަމް މަޖުދާ އެވެ. އިދިކޮޅު ސިޔާސީ މީހާގެ ބައި ކުޅެނީ ތަޖުރިބާކާރު އެކްޓަރު އަހުމަދު ސައީދެވެ. މ. މުލަކުގައި ޝޫޓްކޮށްފައިވާ މި ފިލްމުގެ ބައެއް ރޯލްތަކަށް އެ ރަށުގެ މީހުން ވެސް ވަނީ ކާސްޓްކޮށްފަ އެވެ.
ފިލްމުގެ ކޯ ޕްރޮޑިއުސަރު އަދި ސްކްރީން-ލިޔުންތެރިޔާ އަހުމަދު ޒަރީރު "އަދަދު" އަށް ބުނި ގޮތުގައި މިއީ ސިނެމާ އަށް އުފެއްދި ފިލްމެއް ކަމަށާއި އެކަމަކު ކޮވިޑުގެ ހާލަތުގެ ސަބަބުން ސިނަމާގައި ބަންދު ބޯޑު އަޅުވާފައިވާތީވެ ސްޓްރީމިން އަށް ދިޔައީ ކަމަށެވެ.
"މީޑިއާނެޓުގެ މަލްޓި-ސްކްރީން ސްޓްރީމިން އަކީ ވެބުން ވެސް ފެންނަ އަދި ޓީވީ އަށް ވެސް ކާސްޓް ކުރެވޭ ސާވިސްއެއް. އެހެންވެ ސިމަކާ އަކަށް ނުގޮސް ސިނަމާގެ ތަޖުރިބާ ބެލުންތެރިންނަށް އެންމެ ބޮޑަށް ކުރެވޭނީ މަލްޓި-ސްކްރީން އިން ކަމަށްވާތީ އޭގައި މި ރިލީޒް ކުރީ،" ޒަރީރު ބުންޏެވެ.
އެކަމަކު ސިނެމާތައް ހުޅުވުމުން، ހާއްސަ ދައުވަތު ދީގެން ދެ ތިން ޝޯ ބޮޑު ސްކްރީނުގައި އަޅުވާނެ ކަމަށް ޒަރީރު ބުންޏެވެ.
ޒަރީރާއި ހަސަން އަދި ކަނޑިގެ "އެއް ކާފު" ސްޓޫޑިއޯ އިން އުފެއްދި މި ފިލްމުގައި ހިމެނޭ ލަވަތައް ވަނީ މިހާރު ސްޕޮޓިފައި އާއި އައި-ޓިއުންސް އަށް ދޫކޮށްލައިފަ އެވެ. ލަވަތަކުގެ މެލޮޑީ އާއި ލިރިކްސް ހަދައި އަދި ކިޔާފައިވަނީ ނަސްމާ އަބްދުލްމުހުސިން (ނައްކޮ) އެވެ.
