މެންދުރުގެ ގަދައަވީގައި ނުކުމެ އެ ޒުވާނާ ވޯޓު ކިއޫގައި ހުރުމުން، ބަލާ މީހާއަށް ފެންނާނީ ގައުމު ހިންގުމުގައި ބަސްބުނަން ލިބުނު ފުރުސަތުގެ ބޭނުން ހިފަން ޒުވާނަކު ކެތްމަދުވެފައި ހުރި މަންޒަރެވެ. އެކަމަކު ސ. މީދޫ އަށް އުފަން ހައްވާ ޖީލާން، 19 އަށް އޭނާގެ އަލަތު ވޯޓުގެ ތަޖުރިބާއާ މެދު އިހުސާސްކުރަންވީ ކޮން ގޮތަކަށް ކަމެއް ޔަގީނެއް ނޫނެވެ.
އޭނާ ހެޔޮ ފާހަގަ ޖަހާފައި ނިކުތީ، އާއިލާ އިން ދެއްކި އެންމެ ރަނގަޅު ކެންޑިޑޭޓުންނަށެވެ. ވޯޓު ލާން ދިޔައީ ހަޔާތުގައި ވޯޓުލާން ލިބޭ ފުރަތަމަ ފަހަރަކީ މިއީ ކަމަށްވާތީ މިއީ ކިހިނެއް ހިނގާ ކަމެއްތޯ އަމިއްލަ އަށް ތަޖުރިބާ ކޮށްލުމަށެވެ.
"ނޭނގެ ކީކޭ ކަމެއް ބުނަންވީ؟ އަހަންނަށް ފާހަގަވީ ވޯޓު ލުމާ ބެހޭ ގޮތުން އަހަންނަށް އެނގެން ޖެހޭ ވަރަށް ގިނަ މައުލޫމާތު ލިބިފައި ނެތްކަން. ހުރިހާ އެންމެން ވެސް އަހަރެން ކައިރީގައި ބުނީ މިވެނި މީހަކަށް ވޯޓުލާށޭ، އެވަނި މީހަކަށް ވޯޓު ނުލާށޭ، ވޯޓު ލާން ގޮސް ކަންތައް ކުރަންޖެހެނީ ކިހިނެއް ކަމެއް ވެސް ކިޔައެއް ނުދޭ،" ޖީލާން ބުންޏެވެ.
ދާއިރާގެ ފޮށި ހުރި ތަނަށް ގޮސްފައި ހަދާނެ ގޮތެއް ނޭނގި ހާސްވެގެން އެއް މޭޒަށް ބަލާފަ އަނެއް މޭޒަށް ބަލާފަ، މީހަކު އައިސް އެއްޗެއް ބުނަންދެން ވާންވީ ގޮތް ނޭނގިފަ އޭނާ ހުރީ އެވެ. ޖީލާން އޭނާގެ ފުރަތަމަ ވޯޓު ތަޖުރިބާ ސިފަކުރީ ވާނުވާ ނޭނގޭ "ހާސްކަން ބޮޑު" ކަމެއްގެ ގޮތުގަ އެވެ.
އޭނާގެ ނަޒަރުގައި، އާންމުކޮށް ސިޔާސީ ދާއިރާގެ ތެރޭގައި ފުރާވަރުގެ ޒުވާން ކުދިން ނޫޅޭއިރު، އިންތިހާބުތަކުގައި އަލަށް ވޯޓުލާ ކުދިން ވޯޓަށް ހޭލުންތެރިކުރުން މުހިއްމެވެ. ވޯޓުގެ މުހިއްމު ކަމާއި ވޯޓުލާން ދާއިރު އަމަލުކުރަންޖެހޭ ގޮތްތައް ކިޔައިދޭން ޖެހެ އެވެ. އޭރުން އެމީހުން ވޯޓުލުމާ މެދު ދެކޭ ގޮތް ތަފާތުވާނެ އެވެ.
ހަމައެކަނި އާއިލާއިން ބުނީތީ ބުނާ މީހަކަށް ހެޔޮފާހަގަ އެއް ޖަހާލަން ދާން އޮންނަ ކަމެއްގެ ބަދަލުގައި، ތިމާ އަޅަން ދާ ވޯޓަކީ ކީއްވެ، ކިހާވަރެއްގެ ޒިންމާއެއް އެ ވޯޓާ ގުޅިފައިވާ ކަމެއް ކަން ކުރީބައިގައި ކިޔައިދެވިފައި އޮތް ނަމަ މިއަދު ވޯޓުލާފައި ނިކުތް އިރު ވަރަށް ބޮޑު ހިތްހަމަޖެހުމެއް ލިބުނީސް ކަމަށް ޖީލާން ބުންޏެވެ.
"ވޯޓު ލާން ދިޔައިމަ އަސްލު ވޯޓާ މެދު ފުންކޮށް ވިސްނާލެވުނީ އަލަށް ވެސް. އަސްލު މާބޮޑަކަށް ނުވިސްނަން ކުރިމަތިލާފައި ތިބި މީހުންނަކާ މެދު އެއީ ކޮން ކޮން ބައެއްތޯ އެމީހުން ސޮސައިޓީއަށް ކޮންޓްރިބިއުޓްކުރީ ކިހާ ވަރަކަށްތޯ ބަލަން،" ޖީލާން ބުންޏެވެ.
އޭނާ ބުނީ 18 އަހަރު ފުރިގެން އަލަށް ވޯޓު ލާން ދާ ކުދިންނަށް އެމީހުންނަށް 18 އަހަރު ވުމުން ގާނޫނުން ލިބިދޭ ބޮޑު ޒިންމާއަކީ ކިހާވަރެއްގެ ޒިންމާއެއް ކަން އިހުސާސްކޮށްދޭން މިހާރަށް ވުރެ ބޮޑަށް މަސައްކަތް ކުރާ ދުވަހެއް ދެކެން ބޭނުން ކަމަށެވެ.
ރާއްޖޭގައި ބާއްވާ އިންތިހާބުތަކުގައި 18 އަހަރު ފުރިގެން އަލަށް ވޯޓުލާން ދާކުދިން ބައިވެރިވާލެއް މަދު ކަމުގެ ކަންބޮޑުވުން އަބަދު ވެސް އޮވެ އެވެ.
މިއަދު ވެސް، ވޯޓު ލުމަށް މާލޭގައި ބަހައްޓާފައި ހުރި ގިނަ މަރުކަޒު ތަކުގައި ތިބި އޮފިޝަލުން ބުނީ، މިއަދު، މިހާތަނަށް ވޯޓުލާން ދިޔަ މީހުންގެ ތެރެއިން އުމުރުން 18 އަހަރާއި 20 އަހަރާ ދެމެދުގެ ކުދިން ވޯޓުލާން ނިކުތް އަދަދު ނިސްބަތުން މަދު ކަމަށެވެ.
ޖީލާން މިއަދު އެ ބޭނުންކުރީ ރަށް، އަތޮޅު ނުވަތަ ސިޓީ ހިންގުމަށް އޭނާގެ ބަސް ބުނަން ލިބިފައިވާ ފުރުސަތެވެ. އެކަމަކު ހަގީގީ މާނައަކު ނޫނެވެ. ހަމައެކަނި ކަރުދާސް ކޮޅެއްގައި ފާހަގަލީ އެވެ. ހަގީގީ މާނައިގައި ބަސް ބުނުމުގެ ފުރުސަތު ލިބޭނީ ޖީލާން ދެކޭ ގޮތުގައި، މި ހައްގުގެ ބޭނުން ހިފާނެ ގޮތާއި ސިޔާސަތުތަކުގެ މައުލޫމާތު ރަނގަޅަށް އެނގިގެންނެވެ.
