އިޒްރޭލުން ވެރިވެގަނެފައިވާ ފަލަސްތީނުގެ އިރުމަތީ ގުދުސްގެ ސަރަހައްދެއްގައި ޔަހޫދީން އާބާދު ކުރުމާ ދެކޮޅަށް މުޒާހަރާ ކުރަމުން ދިޔަ އިޒްރޭލުގެ ގާނޫނު ހަދާ މަޖިލީހުގެ މެމްބަރަކަށް ފުލުހުން އަނިޔާކޮށްފި އެވެ.
ފުލުހުން އަނިޔާކުރި އޮފާ ކާސިފްއަކީ ގިނަ އަދަދެއްގެ އަރަބިން ހިމެނޭ އަރަބް ޖޮއިންޓް ލިސްޓު ޕާޓީގެ މެމްބަރެކެވެ. އޭނާ މުޒާހަރާ ކުރަމުން ދިޔެއީ އިޒްރޭލުން ވެރިވެގަނެފައިވާ އިރުމަތީ ގުދުސްގެ ޝެއިހް ޖައްރާ ސަރަހައްދުގައި ޔަހޫދީން އާބާދު ކުރުމާ ދެކޮޅަށެވެ.
"އެމީހުން އަޅުގަނޑަށް އަނިޔާ ކުރަން ފެށީ، އައިނު ވެސް ބިންދާލީ. އެމީހުން ތިބީ މޮޔަވެފައި،" ޗެނަލް13 އަށް ދެއްވި އިންޓަވިއުއެއްގައި ކާސިފް އިއްޔެ ވިދާޅުވި ކަމަށް އަލްޖަޒީރާގައި ވެއެވެ.
އަޅުގަނޑަކީ ގާނޫނު ހަދާ މަޖިލީހުގެ މެމްބަރެއް ނަމަވެސް އެމީހުންނަށް ވަރިހަމަ -- އޮފާ ކާސިފް
ފުލުހުން ކާސިފްއަށް އަނިޔާ ކުރާ މަންޒަރު ފެންނަ ވީޑިއޯގައި އޭނާގެ ލޯމަތިވެ ދުޅަވެ، ޓީޝާޓް ވީދި، އައިނު ހަލާކުވެފައިވާ މަންޒަރު ފެނެ އެވެ.
ކާސިފްގެ ތަރުޖަމާނު އިތައި އަކްނިން އޭއެފްޕީއަށް ވިދާޅުވީ ޒަހަމްތަކަށް ހޮސްޕިޓަލުގައި ފަރުވާ ދޭން ޖެހުނު ކަމަށެވެ. އަދި އެއްވުމުގައި ހަމަނުޖެހުން އުފެއްދީ ފުލުހުން ކަމަށް ތުހުމަތު ކުރެއްވި އެވެ.
ފުލުހުން ނެރުނު ބަޔާނެއްގައި ބުނީ މިހާތަނަށް ބެލި ބެލުމުން "މުޒާހަރާގެ ބައިވެރިއަކު ފުލުހަކަށް ހަމަލާ ދިން ކަމަށް" އެނގިފައިވާ ކަމަށެވެ. ހަމަލާދިނީ ގާނޫނު ހަދާ މަޖިލީހުގެ މެމްބަރެއް ކަން އެނގުމާއެކު ފުލުހުންގެ ހައްޔަރުން ދޫކޮށްލި ކަމަށް ވެސް އެ ބަޔާނުގައި ވެއެވެ.
ފުލުހުން އެހެން ބުނި ނަމަވެސް އެ މައްސަލަ ތަހުގީގު ކުރަން ގޮވާލާ، ކާސިފްގެ ދިފާއުގައި އިޒްރޭލުގެ ގިނަ ސިޔާސީ ވެރިން އަންނަނީ ވާހަކަދައްކަވަމުންނެވެ.
ފަލަސްތީނުގެ ބައެއްގެ ގޮތުގައި އޮތް އިރުމަތީ ގުދުސްއަށް އިޒްރޭލުން ވެރިވެގަތީ 1967 ގައި ހިންގި ހަނގުރާމައަކަށް ފަހު އެވެ. ގިނަ ގައުމުތަކާއި އދ. އިން ވެސް އިޒްރޭލުން އެތަނަށް ވެރިވެގަނެފައި އޮތް އޮތުން ބަލައެއް ނުގަނެ އެވެ.
އިޒްރޭލުން ދެކޭ ގޮތުގައި މުޅި ގުދުސްއަކީ ޔަހޫދީންގެ ވެރިރަށެވެ. ނަމަވެސް ފަލަސްތީނުން ބޭނުންވަނީ އިރުމަތީ ގުދުސްއަކީ ފަލަސްތީނު ދައުލަތުގެ ވެރިރަށުގެ ގޮތަށް ހެދުމަށެވެ.
މިހާރު ޔަހޫދީން އާބާދު ކުރަމުންދާ އިރުމަތީ ގުދުސްގެ ޝެއިހް ޖައްރާގައި 3،000 އަށް ވުރެ ގިނަ ފަލަސްތީނު ރައްޔިތުން ދިރިއުޅެ އެވެ. ނަމަވެސް އިޒްރޭލުގެ ކޯޓުތަކުން އަންނަނީ އެ މީހުން ގެތަކުން ނިކުތުމަށް އަންގަމުންނެވެ.
އެ ތަނުގައި ޔަހޫދީން އާބާދު ކުރުމުގެ މަސައްކަތް ފެށީ 2001 ގައެވެ. އިޒްރޭލުން ބޭނުންވަނީ ގުދުސްގެ އާބާދީގެ 70 ޕަސަންޓަކީ ޔަހޫދީންނަށް ހެދުމަށެވެ. އަދި އާބާދީގައި ފަލަސްތީނު ރައްޔިތުންގެ ނިސްބަތް އެންމެ ގިނަވެގެން 30 ޕަސަންޓަށް ކުޑަ ކުރުމަށެވެ.
