މެޑްރިޑް (އޭޕްރީލް 9) - ޔުއެފާ ޔޫރޮޕާ ލީގުގައި ރޭ ރަށުންބޭރުގައި ސްޕެއިނުގެ ގްރަނާޑާ 2-0 އިން ބަލިކޮށް މެންޗެސްޓާ ޔުނައިޓެޑް މުބާރާތުގެ ސެމީން ފުރުސަތު ހޯދުމާ ގާތަށް ޖެހިލިއިރު، އަމިއްލަ ދަނޑުގައި އާސެނަލް ކުޅުނު ފުރަތަމަ ލެގުން ފަހު ވަގުތު 1-1 އިން ޗެކް ރިޕަބްލިކްގެ ސްލާވިއާ ޕްރާގްއާ އެއްވަރުވެއްޖެ އެވެ.
ޔުނައިޓެޑުން ސެމީއާ ގާތަށް ޖެހިލިއިރު، އަންނަ ހަފްތާގައި އަމިއްލަ ދަނޑުގައި ކުޅޭ މެޗުގައި އެ ޓީމުގެ ކެޕްޓަން ހެރީ މެގުއާ އާއި ވާތު ބެކް ލޫކް ޝޯ އަދި މިޑްފީލްޑަރު ސްކޮޓް މެކްޓޮމިނޭއި އަށް ނުކުޅެވޭނެ އެވެ. އެއީ ރޭގެ މެޗުގައި ދެެއްކި ރީނދޫ ކާޑުގެ ސަބަބުންނެވެ. އަމިއްލަ ދަނޑުގައި ގްރަނާޑާ އަތުން އެއްވަރުކޮށްލައިގެން ވެސް ޔުނައިޓެޑަށް ސެމީގެ ފުރުސަތު ހޯދޭނެ އެވެ. މިދިޔަ އަހަރުގެ ސެމީން ޔުނައިޓެޑް ބަލިވީ ސެވިއްޔާ އަތުންނެވެ.
މި ފަހަރުގެ ސެމީން ޔުނައިޓެޑަށް ފުރުސަތު ލިބިއްޖެނަމަ އެ ޓީމުން ބައްދަލުކުރަން ޖެހޭނީ ރޯމާ އާއި އަޔަކްސް ކުޅޭ ކުއާޓާ ފައިނަލް މެޗުން މޮޅުވާ ޓީމަކާ ދެކޮޅަށެވެ. ރޭ އަޔަކްސް ދަނޑުގައި ކުޅުނު ފުރަތަމަ ލެގުގެ މެޗުން ރޯމާ ވަނީ 2-1 އިން މޮޅުވެފަ އެވެ.
ގްރަނާޑާ ދަނޑުގައި ކުޅުނު މެޗުގައި ޔުނައިޓެޑުން ލީޑުނެގީ 31 ވަނަ މިނިޓްގައި މާކަސް ރެޝްފޯޑް ޖެހި ގޯލުންނެވެ. އޭނާ މި ގޯލު ޖެހީ ވިކްޓަ ލިންޑެލޯފް ދިން މޮޅު ބޯޅައަކުންނެވެ. ގްރަނާޑާ އަށް ކުޅެމުން އަންނަ ޔަންގެލް ހެރޭރާ ޖެހި ބޯޅައެއް ގޯލުގެ ދަނޑިއަށް އަމާޒުވިއިރު، ރޮބާޓޯ ސޮލްޑާޑޯ ފޮނުވާލި ހަމަލާތައް ގޯލާ ސީދާނުވި އެވެ. އަދި ޗެލްސީގެ ލޯން އެއްބަސްވުމެއްގެ ދަށުން ގްރަނާޑާ އަށް ކުޅެމުން އަންނަ ބްރެޒިލްގެ ވިންގް ކެނެޑީ ޖެހި ޝޮޓްތައް ޔުނައިޓެޑްގެ ގޯލުގައި ހުރި ޑޭވިޑް ޑެހެއާ ވަނީ މަތަކޮށްފަ އެވެ.
ޔުނައިޓެޑްގެ ދެ ވަނަ ގޯލު ޖެހީ އިތުރު ވަގުތުގައި ޕެނަލްޓީ އަކުން ބްރޫނޯ ފެނާންޑޭސް އެވެ. ފެނާންޑޭސް ފޮނުވާލި ޕެނަލްޓީ ގޯލަށް ވަނީ ގްރަނާޑާގެ ގޯލްކީޕަރު ރުއީ ސިލްވާ އަތުގައި ޖެހިފަ އެވެ.
ދެ ވަނަ ހާފުގައި ބަދަލު ކުޅުންތެރިއެއްގެ ގޮތުގައި ކުޅެން އެރި ނިކޮލަސް ޕެޕޭ މެޗުގެ 86 ވަނަ މިނިޓްގައި އާސެނަލަށް ލީޑުނަގައިދިން ނަމަވެސް އެ ޓީމަށް އެ ލީޑުގައި މެޗު ނިންމައިނުލެވުނެވެ. މެޗުގެ އިތުރު ވަގުތުގެ ތިން ވަނަ މިނިޓްގައި ސްލާވިއާ އަށް އެއްވަރުކޮށްދިން ގޯލު ޖެހީ ތޯމަސް ހޯލްސް އެވެ.
ކުއާޓާ ފައިނަލްގެ އަނެއް މެޗުގެ ނަތީޖާ އަށް ބަލާއިރު، ޑިނަމޯ ޒަގްރެބް ދަނޑުގައި ކުޅުނު މެޗުން ވިޔަރެއާލް މޮޅުވީ 1-0 އިންނެވެ. ޑިނަމޯ ޒަގްރެބް ކުއާޓާ އިން ފުރުސަތު ހޯދީ ތިން ވަނަ ބުރުގައި ހޯސޭ މޮރީނިއޯގެ ޓޮޓެންހަމް ހޮޓްސްޕާސް ކަޓުވާލައިފަ އެވެ.
