ކާޑޭޝިއަން-ޖެނާ އާއިލާ އިން އަނެއްކާ ވެސް މިވަނީ ލަގްޒަރީ މަޖައްލާތަކުގެ ފަލަ ސުރުހީތަކުން ޖާގަ ހޯދާފަ އެވެ. ދުނިޔޭގެ ބިލިއަނަރުންގެ ލިސްޓުން އެ އާއިލާގެ ދެ ވަނަ އަށް އެންމެ ހަގު، ކައިލީ ޖެނާގެ ނަން ނެގި ތާ އަހަރެއް ނުވަނީސް ކިމް ކާޑޭޝިއަން މި ވަނީ އެ ލިސްޓަށް އަރައި އާއިލާއަށް ގެއްލުނު މަގާމު އަލުން ހޯދައިދީފަ އެވެ.
ކިމް އާއި ކާންޔޭގެ ވަރީގެ މައްސަލަ ހޮލީވުޑް "ގްލޭމް ވޯލްޑު"ގެ ބޮޑު ވާހަކަ އަށް ވެފައި އޮއްވައި ފޯބްސް އިން އެންމެ ފަހުން އިއުލާނުކުރި ބިލިއަނަރުންގެ ލިސްޓުގައި އޭނާގެ ނަން ހިމަނާފައިވަނީ މިލްކިއްޔާތުގައި އެއް ބިލިއަން ޑޮލަރު ހުރި ކަމަށް އަންދާޒާކޮށްފަ އެވެ. ކިމް އަކީ 2017 ވަނަ އަހަރުން ފެށިގެން "ކޭކޭ ޑަބްލިއު އެންޑް ސްކިމްސް" ގެ ނަމުގައި އަމިއްލަ ބްރޭންޑެއް އުފައްދައި ކޮންމެޓިކްސް އާއި ބޮޑީޝޭޕް ވެއާ ސާމާނު ވިއްކަމުން އަންނަ ކާމިޔާބު ވިޔަފާރިވެރި އެކެވެ.
ފޯބްސް އިން ލަފާކޮށްފައިވާ ގޮތުން، ކިމްގެ މިލްކިއްޔާތުގައި 2020 ވަނަ އަހަރުގެ އޮކްޓޯބަރު ހިސާބުގައި ހުރީ 780 މިލިއަން ޑޮލަރެވެ. އެހެންވެ، މި ދެމެދުގައި ހޯދާފައިވާ ކުރިއެރުން ވެސް ވަނީ ފާހަގަކޮށްފަ އެވެ.
އުމުރުން 40 އަހަރުގެ ކިމް، ބިލިއަނަރުންގެ ލިސްޓަށް އެރި އިރު، އޭނާގެ ފިރިމީހާ ކާންޔޭ ވެސްޓަކީ މިހާރު ވެސް މި ލިސްޓުގައި ހިމެނޭ ނަމެކެވެ.
ކިމްގެ ކޮސްމެޓިކްސް ވިޔަފާރި "ކޭކޭ ޑަބްލިޔު" 2017 ވަނަ އަހަރު ފަށައިގެން ހިންގަމުން އައީ އޮންލައިން ވިޔަފާރިއެއްގެ ގޮތުގަ އެވެ. އޭނާގެ ބޮޑީ ޝޭޕް ވެއާގެ އުފެއްދުންތައް ބާޒާރަށް ނެރުނީ 2019 ވަނަ އަހަރު އެވެ. އޮންލައިންކޮށް ވިޔަފާރި ކުރުމަށްފަހު މިދިޔަ ހަފްތާގައި ޕޯސްޓުކުރި ބީޗް ފޮޓޯ އަކާ އެކު ކިމް ވަނީ، ލޮސްއެންޖެލިސް ގައި އޭނާގެ ބިކިނީ އާއި ބޮޑީ ވެއާ އުފެއްދުންތައް ވިއްކާ ޕޮޕް އަޕް ފިހާރައެއް ހުޅުވާފައިވާކަން އިއުލާންކޮށްފަ އެވެ.
