އަންނަ ހޮނިހިރުދުވަހު ބާއްވާ ލޯކަލް ކައުންސިލްތަކުގެ އިންތިހާބު މިނިވަން ނުވާނެ ކަމަށާއި ވޯޓު އޮޅުވާލާނެ ކަމަށް ކުރާ ތުހުމަތުތައް ދޮގުކުރައްވައި ވަކި މީހަކު ހޮވަން އިލެކްޝަންސް ކޮމިޝަނުން އެއްވެސް ކަމެއް ނުކުރާނެ ކަމަށް ކޮމިޝަންގެ ރައީސް އަހްމަދު ޝަރީފް ވިދާޅުވެއްޖެ އެވެ.
ރިޔާސީ އިންތިހާބު އޮޅުވާލި ކަމުގެ ތުހުމަތަށް ބާރު ދެމުން އިދިކޮޅު ޕީޕީއެމާއި ޕީއެންސީން ދަނީ މި އިންތިހާބު "ވަގަށް ނަގާފާނެ" ކަމަށް ބުނަމުންނެވެ. އިދިކޮޅަށް ނިސްބަތްވާ މެންބަރުން ރައްޔިތުންގެ މަޖިލީހުގައި ވެސް ވަނީ މި ތުހުމަތުތައް ކުރައްވައިފަ އެވެ.
އިންތިހާބާ މެދު ކުރާ ޝައްކުތަކަށް ރައްދު ދެއްވައި އީސީގެ ރައީސް "އަދަދު" އަށް ވިދާޅުވީ ވޯޓުލާ މަރުކަޒަށް ވޯޓު ފޮށި ގެންދާ ހިސާބުން ކޮމިޝަނުގެ ބާރު ކެނޑޭ ކަމަށެވެ. އޭގެ ފަހުން ވޯޓު ފޮއްޓަށް ބާރު ހިންގޭނީ ފޮށީގެ ވެރިޔާ އާއި އޮފިޝަލުންނަށް ކަމަށް އޭނާ ވިދާޅުވި އެވެ.
"އޮފިޝަލުންނަށް ގިނައިން ތިބޭނީ ރަށަކުން އަޅުގަނޑުމެން ރެކްރޫޓް ކޮށްފައި ތިބޭ މީހުން. އެ މީހުން ވޯޓް ގުނާނީ އާއްމު ރައްޔިތުންގެ ކުރިމަތީގަ.. އަޅުގަނޑު ދަންނަވަން މިއުޅޭ ވާހަކައަކީ ރައްޔިތުންލާ ވޯޓެއް އެތާ ތިބި މީހުންނަކަށް އޮޅުވައެއް ނުލެވޭނެއޭ. ކޮމިޝަނަކަށް ވެސް އޮޅުވައެއް ނުލެވޭނެ،" އޭނާ ވިދާޅުވި އެވެ.
"ރައްޔިތުން ވޯޓުލުމުގައި ރައްޔިތުން ހަދާ މަކަރެއް ހެދޭނީ. ކޮމިޝަނަކަށް އޮޅުވައެއް ނުލެވޭނެ."
ޝަރީފް ވިދާޅުވި ގޮތުގައި ވޯޓުލުމަށް ރާއްޖޭގައި ގެންގުޅޭ ގާނޫނީ އޮނިގަނޑަށް ވުރެ ފުރިހަމަ ނިޒާމެއް މުޅި ދުނިޔޭގައި ވެސް މަދުވާނެ އެވެ. އެހެންކަމުން ވޯޓު އޮޅުވާ ނުލެވޭނެކަމުގެ 100 ޕަސެންޓް ޔަގީންކަން އެބައޮތް ކަމަށް އޭނާ ވިދާޅުވި އެވެ.
އިލެކްޝަންސް ކޮމިޝަނުން ވަކި ބައެއް ހޮވަން ވެގެން ކޮށްދެވޭނެ އެއްވެސް ކަމެއް ނެތް. އިލެކްޝަންސް ކޮމިޝަނުގެ މުވައްޒަފަކު ނުވަތަ މެމްބަރަކު މިވެނި ކަމެއް ކޮށްދޭނެ ކަމަށް ބުނާ ކަމަށް ވަންޏާ އެއީ ދޮގެއް. ނުކުރެވޭނެ އެކަމެއް. -- ޝަރީފް
މިފަހަރުގެ އިންތިހާބަކީ ބުރަބޮޑު އަދި ހަރަދު ވެސް ބޮޑު އިންތިހާބެކެވެ. މިދިޔަ އަހަރުގެ އޭޕްރީލް މަހުގެ ކުރީކޮޅު ބާއްވަން އުޅުނު ކައުންސިލްތަކުގެ އިންތިހާބު ފަސް ކުރަން ޖެހުނީ ކޮވިޑްގެ ސަބަބުންނެވެ. އަންނަ ހޮނިހިރު ދުވަހު ހާއްސަ އިންތިޒާމުތަކެއްގެ ދަށުން އިންތިހާބު ބާއްވަނީ އެތައް ތާރީހެއް ކުރިން ކަނޑައަޅައި ފަސް ކުރުމަށް ފަހުގަ އެވެ.
މި އިންތިހާބުގައި 273،128 މީހުންނަށް ވޯޓްލުމުގެ ހައްގު ލިބިގެންވެ އެވެ. އޭގެ ތެރެއިން 5،134 މީހުންނަކީ އިންތިހާބު މި އަހަރަށް ފަސް ކުރުމުން އެ މުއްދަތުގެ ތެރޭގައި 18 އަހަރު ފުރުނު މީހުންނެވެ.
