މޫސުމަށް އަންނަ ބަދަލުތައް ކުޑަ ކުރުމަށް އިއާދަކުރަނިވި ހަކަތަ ބޭނުން ކުރުމުގައި އިންޑިއާއަކީ އެހެން ގައުމުތަކަށް މިސާލެއް ކަމަށް ވިދާޅުވެ، މޫސުމާ ބެހޭ ކަންކަމަށް ކަނޑައަޅާފައިވާ އެމެރިކާ ރައީސްގެ ހާއްދަ މަންދޫބް ޖޯން ކެރީ ތައުރީފު ކުރައްވައިފި އެވެ.
އޯޒޯން ފަށަލައަށް ގެއްލުންދޭ ވިހަ މާއްދާތައް އެންމެ ގިނައިން ބޭރުކުރާ ގައުމުތަކަކީ ޗައިނާ، އެމެރިކާ އަދި އިންޑިއާ އެވެ. 2050 ގެ ކުރިން ވިހަ ގޭސް ބޭރު ކުރާ މިންވަރު މަދު ކުރަން ގިނަ ގައުމުތަކުން ވަނީ ލަނޑުދަނޑި ކަނޑައަޅާފަ އެވެ.
މޫސުމަށް އަންނަ ބަދަލުތަކާ ގުޅޭ ގޮތުން ގައުމުތަކުގެ ލީޑަރުންނާއެކު އެމެރިކާގެ ރައީސް ޖޯ ބައިޑެން ބާއްވަވާ ބައްދަލުވުމެއް މި މަހު އޮންނާނެ އެވެ. އެ ބައްދަލުވުމުގެ ކުރިން ކެރީ ގެންދަވަނީ ގައުމުތަކުގެ އިސްވެރިންނާއެކު މަޝްވަރާ ބައްދަލުވުންތައް ބާއްވަމުންނެވެ.
އެފަދަ ބައްދަލުވުމެއްގައި ކެރީ ވިދާޅުވީ އިންޑިއާއިން ދަނީ ލަނޑުދަނޑިއަށް ވާސިލްވަމުން ކަމަށާއި އިންޑިއާއަކީ އިއާދަކުރަނިވި ހަކަތައިގެ ދާއިރާގައި ދުނިޔޭގެ ލީޑަރެއް ކަމަށެވެ.
އިއާދަކުރަނިވި ހަކަތަ ބޭނުން ކުރުމުގައި އިންޑިއާއިން އިސް ދައުރެއް އަދާ ކުރި ނަމަވެސް، އެ ގައުމުން ހަކަތަ ބޭނުން ކުރާ މިންވަރު އަދިވެސް އިތުރުވާނެ ކަމަށް ބެލެވޭތީ 2050 ގެ ކުރިން ވިހަ ގޭސް ބޭރުކުރުން ނެޓް ޒީރޯއަށް ތިރިކުރަން އިންޑިއާއިން އަޒުމްކަނޑައަޅާފައެއް ނުވެ އެވެ.
އެމެރިކާއިން މަސައްކަތް ކުރަމުން ދަނީ ގައުމުތަކުގެ ތަރައްގީ އަންދާޒާ ކުރުމަށް ފަހު އެންމެ އެކަށީގެންވާ ލަނޑުދަނޑިތައް ކަނޑައެޅުމަށެވެ. ރައީސް ބައިޑެން އާއެކު ގައުމުތަކުގެ ވެރިން މި މަހު 22 ގައި ބާއްވަވާ ބައްދަލުވުމުގެ ކުރިން ލަނޑުދަނޑިތައް ކަނޑައެޅޭތޯ ދަނީ ބަލަމުންނެވެ.
މި މަހު އެމެރިކާއިން އިސްނަގައިގެން މޫސުމަށް އަންނަ ބަދަލާ ގުޅޭ މުހިއްމު ބައްދަލުވުމެއް ބާއްވާއިރު، މި އަހަރުގެ ފަހުކޮޅު އދ. ގެ ކްލައިމެޓް ސަމިޓު ވެސް އޮންނާނެ އެވެ.
