ވޭތުވެދިޔަ ދެ އިންތިހާބުގައި އެމްޑީޕީއަށް ދިން ވޯޓުން "ރާހަތެއް" ނުކުރާ ކަމުގެ ވިސްނުމުގައި އެ ޕާޓީގެ ސަޕޯޓަރުންނާއި މެމްބަރުން ތިބި ނަމަ, އެކަން މުރާޖައާކުރަން އެމްޑީޕީގެ ރައީސް އަދި ރައްޔިތުންގެ މަޖިލީހުގެ ރައީސް އިއްޔެ އެދިވަޑައިގެންފި އެވެ.
އެމްޑީޕީން މާލޭގައި ބޭއްވި "ރަށްވެހި ފަތިސް" ކެމްޕޭން ހަރަކާތަކަށް ފަހު, ނޫސްވެރިންނަށް ނަޝީދު ވިދާޅުވީ ލާމަރުކަޒީ ނިޒާމް އެކަށީގެންވާ ގޮތެއްގައި ހިންގަން މިހާތަނަށް އޮތީ ފުރުސަތު ނުލިބި ކަމަށެވެ. އެކަމަކު ގާނޫނަށް މި ވެރިކަމުގައި ގެނައި ބަދަލުތަކާ އެކު މި ނިޒާމުން ތަރައްގީއަށް ފަހިވެފައިވާ ކަމަށް ވިދާޅުވި އެވެ.
އެމަނިކުފާނު ވިދާޅުވި ގޮތުގައި މި އިންތިހާބަށް ފަހު ލާމަރުކަޒީ ނިޒާމު ތަންފީޒުކުރަން ފެށި ސިޓީ ކައުންސިލަށް ބާރުތައް ފުރޮޅުނީމާ ސަރުކާރާއި މިނިސްޓްރީތަކުގެ ބާރު ކުޑަވެގެންދާނެ އެވެ. މާލެއަށް ބެލި ނަމަވެސް ގިނަ މަސައްކަތްތައް އޭރަށް ހިންގާނީ މާލޭ ސިޓީ ކައުންސިލުން ކަމަށް ވިދާޅުވި އެވެ.
"އެހެންވީމަ ކުރީގައި ސަރުކާރަށް ވޯޓު ދީފައިތޯ އޮތީ. އެޖެންޑާ 19 އަށް ވޯޓު ދީފައިތޯ އޮތީ, ރައީސުލްޖުމްހޫރިއްޔާ އަށް ވޯޓު ދީފައިތޯ އޮތީ, އެ ވޯޓުތަކުން އަޅުގަނޑުމެންނަށް މާބޮޑު ރާހަތެއް ކޮށްފައި ނުވާ ކަމަށް ތިޔަ ބޭފުޅުން ވިދާޅުވަމުން ދިޔަ ކަމުގައި ވިޔަސް އަޅުގަނޑު މި ދަންނަވަނީ އަޅުގަނޑު މި ދައްކާ ވާހަކަ އަޑު އައްސަވާށޭ," ނަޝީދު ވިދާޅުވި އެވެ.
ނަޝީދު ވިދާޅުވީ ލާމަރުކަޒީ ނިޒާމު އެމަނިކުފާނަށް ރަނގަޅަށް އެނގިވަޑައިގަންނަވާ ކަމެއް ކަމަށެވެ. މިކަމުގައި އެމްޑީޕީއަށް ވުރެން ތަޖުރިބާ ހުރި, ވިސްނުން ހުރި ބަޔަކު ނެތް ކަމަށް ވިދާޅުވި އެވެ.
"އަނަސް ހޮވަން އަޅުގަނޑުމެން އެންމެންނަށް މަޖުބޫރު. އަދި އެމްޑީޕީގެ ސިޓީ ކައުންސިލެއް އޮތުމަކީ ކޮންމެހެން ބޭނުންތެރިކަމެއް," ނަޝީދު ވިދާޅުވި އެވެ.
"އެއްވެސް ސަބަބަކާ ލައިގެން އެމްޑީޕީގެ ސަޕޯޓަރެއް ވެސް ޕާޓީގެ މެމްބަރެއް ވެސް އެހެން ގޮތަކަށް މިފަހަރު ވިސްނާކަމަށް ވަނީ ވިއްޔާ އަޅުގަނޑު ދަންނަވާނީ އަލުން އަނބުރާ މުރާޖައާ ކުރައްވާށޭ, ތި ބޭފުޅާގެ އަމިއްލަ ވިސްނުން. ވިސްނަވާށޭ އަޅުގަނޑުމެން މި ދައްކަނީ ކޮން ވާހަކައެއްތޯ."
އަންނަ ހޮނިހިރުދުވަހު ބާއްވާ އިންތިހާބުގައި މާލޭގެ މޭޔަރުގެ ގޮނޑިއަށް އަނަސްއާ, އިދިކޮޅު ޕީޕީއެމްގެ ޓިކެޓުގައި ވާދަކުރައްވަނީ ކުރީގެ ހައުސިން މިނިސްޓަރު ޑރ. މުހައްމަދު މުއިއްޒެވެ.
ނަޝީދު ވިދާޅުވި ގޮތުގައި މާލޭ ރައްޔިތުންނަށް މުހިއްމުވާ ބޯހިޔާވަކަމާއި ގެދޮރުވެރިކަން ހިންގުމަށް އެމްޑީޕީގެ ސަރުކާރެއްގައި އަބަދުވެސް މަސައްކަތް ކުރާނެ އެވެ. ސިޓީ ކައުންސިލް މުއައްސަސާއެއްގެ ގޮތުގައި ތަރައްގީކުރުމުގެ ވިސްނުމާ ގުޅިފައި އޮތީ އެކަން ކަމަށް ނަޝީދު ވިދާޅުވި އެވެ.
އެކި ޑިޕާޓްމަންޓްތައް އުފައްދައި ސެކްރެޓަރީ ޖެނެރަލަކާ އެކު ހިންގާނެ އެތަނުގައި ހިމެނޭ ބޯޑުތަކުގައި މާލޭގެ ކުރީގެ މޭޔަރުންނާއި ކަމުވޮށިވެގެންވާ ބޭފުޅުން ތިއްބަވާނެ ކަމަށް ވިދާޅުވި އެވެ. އެމްޑީޕީން ހަދަން މިއުޅެނީ "ވަކި ބާވަތެއްގެ ވަޑާމެއް" ކަަމަށާއި އެއަށް ކިޔަމުން އައީ ރައްޔިތުންނަށް ތާހިރު ދިރިއުޅުމެއް ހޯދައިދިނުން ކަމަށް ވިދާޅުވި އެވެ.
"ކޮންތާކުންތޯ ގޯތި ލިބޭނީ. އާދެ, ގޯތި ލިބޭނެ ބައިވަރު ގޮތްތައް ވެސް އަޅުގަނޑުމެންނަށް ހޯދޭނެ," ނަޝީދު ވިދާޅުވި އެވެ.
އެކަމަކު ގަބޫލުކުރަން ޖެހޭ ހަގީގަތީ, ނަޝީދު ވިދާޅުވި ގޮތުގައި, އެއްވެސް ގައުމެއްގެ ސިޓީއަކުން އެންމެން ބޭނުންވާ ވަރަކަށް ގޯއްޗެއް ނުދެވޭނެ އެވެ. އެ ކަންކަމާ އެކު އެމްޑީޕީން މި އިންތިހާބު ކާމިޔާބުކޮށް މިސްރާބެއް އޮތް ކަމަށް ވިދާޅުވި އެވެ.
ކައުންސިލް އިންތިހާބަށް އެމްޑީޕީން ވަނީ ޕީޕީއެމަށް ވުރެން ގާތްގަނޑަކަށް 100 ކެންޑިޑޭޓުން އިތުރަށް ނެރެފަ އެވެ. އެމްޑީޕީން ބުނަނީ އިންތިހާބު ކާމިޔާބުކުރާނީ 80 ޕަސެންޓުން ކަމަށެވެ. އެކަމަކު ދެ އިންތިހާބުގައި ވޯޓުދީފައިވާ އެމްޑީޕީގެ ވައުދުތައް ނުފުއްދޭތީ މި އިންތިހާބުގައި ރައްޔިތުން ބޮޑު އަޣުލަބިއްޔަތެއް ދޭނީ ޕީޕީއެމަށް ކަމަށް އެ ޕާޓީން ވަނީ ބުނެފަ އެވެ.
އިދިކޮޅު ޕީޕީއެމާއި ޕީއެންސީގެ އަމާޒަކީ މާލެ ސިޓީ ކައުންސިލްގެ މެޖޯރިޓީއާ އެކު ވާދަކުރާ ގިނަ ގޮނޑިތަކެއް ކާމިޔާބުކުރުމެވެ.
