ސަރުކާރުން ތިމަންނާމެންގެ ރަށް ބާކީކޮށްފައި އެހެން ރަށްތައް ތަރައްގީކޮށްދެނީ ކީއްވެކަމާ މެދު ޒަމާނުއްސުރެން އޮންނަ ކަންބޮޑުވުން ނިމި، ރަށްތައް އަމިއްލައަށް ތަރައްގީކުރުމުގެ ފުރުސަތު މި އިންތިހާބާ އެކު ފަހިވާނެ ކަމަށް އެމްޑީޕީގެ ރައީސް އަދި ރައްޔިތުންގެ މަޖިލީހުގެ ރައީސް މުހައްމަދު ނަޝީދު މިރޭ ވިދާޅުވެއްޖެ އެވެ.
އަންނަ ހޮނިހިރުދުވަހު އޮންނަ ލޯކަލް ކައުންސިލް އިންތިހާބަށް އެމްޑީޕީން ފެށި "ރަށްވެހި ފަތިސް" ވާޗުއަލް ކެމްޕޭން، އއ. ރަސްދޫ ފަޅުގައި، ކަންނެލި އޮޑީގައި ތިބެ ނިންމާލަން ބޭއްވި ޖަލްސާގައި ނަޝީދު ވިދާޅުވީ ދެން އަލިވިލޭނީ އެއްވެސް ރަށެއް ބާކީ ނުކުރާނެ ނިޒާމަށް ކަމަށެވެ. އެ ބާރުވެރިކަމާއި މާލީ މިނިވަންކަން ކައުންސިލްތަކަށް މި ވެރިކަމުގައި ދީފައިވާ ކަމަށް އިޝާރާތް ކުރައްވައި ވިދާޅުވި އެވެ.
"މިއީ ތި ބޭފުޅުންގެ ރަށް، ތި ބޭފުޅުން އަމިއްލައަށް ނާރެހަށްލާ ނިޒާމް. ބާކީއެއް ނުވާނެ ނާރެހުގައި ތި ބޭފުޅުން ތިބޭނީ މެދުގައި،" ނަޝީދު ވިދާޅުވި އެވެ.
ރަސްދޫގައި ބޭއްވި ޖަލްސާގައި ރައީސް އިބްރާހިމް މުހައްމަދު ސޯލިހާއި އެމްޑީޕީގެ ރައީސް ނަޝީދު: މި އިންތިހާބަށް ފަހު ލާމަރުކަޒީ ނިޒާމު ހިނގަން ފަށައި ރަށްތަކަށް ބޮޑެތި ބާރުތަކެއް ލިބޭނެ ކަމަށް ވިދާޅުވި. -- ފޮޓޯ | އެމްޑީޕީ
ރައީސް އިބްރާހިމް މުހައްމަދު ސޯލިހް ވެސް ބައިވެރިވެވަޑައިގަތް ޖަލްސާގައި ނަޝީދު ވިދާޅުވި ގޮތުގައި ލާމަރުކަޒީ ނިޒާމަކީ އެމްޑީޕީގެ "ހާއްޔެ"ކެވެ. އެ ހާލީގައި ބިސް ފީކޮށް، ދޫނި އުދުއްސާލާނީ ވެސް އެމްޑީޕީންނެވެ. އެ ހާއްޔަކަށް ޕީޕީއެމަކަށް ބިހެއް ނޭޅޭނެ ކަމަށް ވިދާޅުވެ ލާމަރުކަޒީ ނިޒާމާ ބީރައްޓެހި ޕާޓީއެއް ކަމަށް އަމާޒުކުރާ ފާޑުވިދާޅުވުމަށް ނަޝީދު ބާރުދެއްވި އެވެ.
އެމަނިކުފާނު ވިދާޅުވީ ރާއްޖޭގައި ތަސައްވަރެއް އޮތް ޕާޓީއަކީ ކޮބައިކަން ރައްޔިތުންނަށް ނޯޅޭ ކަމަށެވެ. ރައްޔިތުންނަށް ވާން އެދޭ ގޮތް، ދާން އެދޭ މިސްރާބު ހިތަށް ގެންނަ ބައަކީ ވެސް އެމްޑީޕީ ކަމަށް ވިދާޅުވި އެވެ.
ރާއްޖެ ބަދަލުކުރާނެ ޕާޓީއަކީ، ނަޝީދު ވިދާޅުވި ގޮތުގައި، އެމްޑީޕީ އެވެ. މި އިންތިހާބުގައި ގިނަ ގޮނޑިތައް އެ ޕާޓީން ނަގާނެ ކަމުގެ ޔަގީންކަން އޮތް ކަމަށް ވެސް ވިދާޅުވި އެވެ.
