ހެދި ބޮޑުވުމުގައި ހާއްސަ އެހީތެރިކަން ބޭނުންވާ ކުދިންނަށް ފަރުވާ ދޭން އައްޑޫ ސިޓީގައި ޗައިލްޑް ޑިވެލޮޕްމެންޓް ސެންޓަރެއް ހުޅުވުމާ ބޭހޭ ގޮތުން ސަރުކާރުގެ ކަމާބެހޭ ބޭފުޅުންނާ ނައިބު ރައީސް ފައިސަލް ނަސީމް މިއަދު މަޝްވަރާ ކުރައްވައިފި އެވެ.
ވާޗުއަލްކޮށް ބޭއްވި ބައްދަލުވުމުގައި ނައިބު ރައީސް ވިދާޅުވީ ހެދި ބޮޑުވުމުގައި ހާއްސަ އެހީތެރިކަން ބޭނުންވާ ކުދިންނަށް ފަރުވާ ލިބޭނެ ގޮތް ހެދުމަކީ ސަރުކާރުގެ ވަރަށް ބޮޑު އަމާޒެއް ކަމަށެވެ. އައްޑޫގައި ހަދާ ސެންޓަރު ހިންގަން ހަމަޖައްސާފައި ވަނީ އައްޑޫ އިކުއިޓޯރިއަލް ހޮސްޕިޓަލް (އޭއީއެޗް)ގެ ބެލުމުގެ ދަށުންނެވެ.
އެ ސެންޓަރުގައި ހިދުމަތް ދޭން ނިންމާފައި ވަނީ ކްލިނިކަލް ސައިކޮލޮޖިސްޓަކާއި އޮކިއުޕޭޝަނަލް ތެރަޕިސްޓެއްގެ އިތުރުން ސްޕީޗް ތެރަޕިސްޓެއް ހިމެނޭ މަލްޓި ޑިސިޕްލިނަރީ ޓީމަކުންނެވެ.
މި ސެންޓަރަކީ ކުދިންގެ ހެދި ބޮޑުވުމަށް ބޭނުންވާ ހުރިހާ ފަރުވާ އެއް ލިބޭނެ ގޮތަށް އިސްކަންދީގެން ހަދާ ތަނެކެވެ. އަދި ސްޕެޝަލް ނީޑްސް ކްލާސްތަކާއި އެފަދަ ކަންކަމާ ގުޅުން ހުރި ހުރިހާ މީހުންނާ ގުޅިގެން މަސައްކަތް ކުރުމަށް ވަނީ ހަމަޖެހިފަ އެވެ.
ނައިބު ރައީސް ބޭއްވެވި ވާޗުއަލް ބައްދަލުވުމުގައި ބައިވެރިވެވަޑައިގަތް ބޭފުޅުންގެ ތެރޭގައި އެޑިއުކޭޝަން މިނިސްޓަރު ޑރ. އައިޝަތު އަލީ އާއި ޖެންޑާ މިނިސްޓަރު އައިޝަތު މުހައްމަދު ދީދީ އާއި ރައީސް އޮފީހުގެ ސޯޝަލް ޕޮލިސީ އެޑްވައިޒަރު ޑރ. މުސްތަފާ ލުތުފީ އާއި ރައީސް އޮފީހުގެ މިނިސްޓަރު އަލީ ޝިޔާމާއި އައްޑޫގެ ކަމާ ގުޅޭ ދާއިރާގެ ބޭފުޅުން އަދި ރައްޔިތުންގެ މަޖިލީހުގެ އައްޑޫ އަށް ނިސްބަތްވެވަޑައިގަންނަވާ މެމްބަރުން ވެސް ބައިވެރިވެވަޑައިގަތެވެ.
