ޗީފް ސްޓެޓިސްޓީޝަންގެ މަގާމަށް ކުރިމަތިލުމުގެ ފުރުސަތު ރައީސް އޮފީހުން ހުޅުވާލައިފި އެވެ.
ޗީފް ސްޓެޓިސްޓީޝަންއަކީ 2021 ވަނަ އަހަރު ފާސްކޮށް ގެޒެޓުކުރި ތަފާސްހިސާބުތަކުގެ ގާނޫނުގެ ދަށުން އުފައްދާފައިވާ ސްޓެޓިސްޓިކްސް ބިއުރޯގެ އެންމެ އިސް މަގާމެވެ. އެ މަގާމުގައި ހުންނަވާ ބޭފުޅާއަކީ ދައުވާކުރުމާއި ދައުވާ ލިބިގަތުމުގެ ބާރު ލިބިފައިވާ ބޭފުޅެކެވެ.
ޗީފް ސްޓެޓިސްޓީޝަންގެ މަގާމަށް އެންމެ ފުރަތަމަ ބޭފުޅަކު އައްޔަނުކުރީ އޯގަސްޓު 21، 2021 ގަ އެވެ. އެ މަގާމުގައި ހުންނަވާ ބޭފުޅެއްގެ ދައުރު ހަމަވާނީ ފަސް އަހަރުންނެވެ. އެ މަގާމުގައި މި ވަގުތު ހުންނެވީ އާއިޝަތު ހަސަން އެވެ.
އެ މަގާމަށް ކުރިމަތިލުމުގެ ސުންގަޑިއަކީ މި މަހުގެ 28 ވަނަ ދުވަހުގެ މެންދުރު 12:00 އެވެ. އެ މަގާމަށް ކުރިމަތިލުމުގެ ފޯމު ރައީސް އޮފީހުގެ ރިސެޕްޝަނުންނާއި ވެބްސައިޓުން ލިބޭނެ އެވެ.
އެ މަގާމަށް އައްޔަނުކުރެވޭަނީ އިންތިހާބުކުރެވޭ ނުވަތަ އައްޔަނުކުރެވޭ މަގާމެއް ފުރަމުން ނުދާ، ސަރުކާރުގެ ނުވަތަ އަމިއްލަ ކުންފުންޏެއް ހިންގުމުގައި އިސްކޮށް ހަރަކާތްތެރި ނުވާ ސިޔާސީ ޕާޓީއަކަށް ނިސްބަތް ނުވާ އުމުރުން 35 އަހަރު ފުރިފައިވާ މީހަކަށެވެ.
ސިޔާސީ ޕާޓީއަކަށް ނިސްބަތްވާ މީހެއް، އަދި، އިންތިހާބީ ނުވަތަ އައްޔަނުކުރެވޭ މަގާމެއްގައި ހުރި މީހަކު އެ މަގާމަށް އައްޔަނުކުރަން ނިންމައިފި ނަމަ، އެމީހަކު އެ ޕާޓީއަކުން ވަކިވެ، މަގާމު ދޫކޮށްލުން ލާޒިމުވާނެ އެވެ.
ޗީފް ސްޓެޓިސްޓީޝަންގެ މަގާމަށް ކުރިމަތިލާ މީހާއަކީ ތަފާސްހިސާބުތަކުގެ ރޮނގުން ނުވަތަ އިކޮނޮމިކްސް، ޑެމޮގްރަފީ ނުވަތަ ހިސާބު އިލްމުގެ ދާއިރާއިން ފުރަތަމަ ޑިގްރީ ނުވަތަ އެއާ އެއް ފެންވަރުގެ ފާހެއް އޮންނަ މީހަކަށް ވާންޖެހޭނެ އެވެ.
ކުރިމަތިލާ މީހުންގެ ތެރެއިން އެ މަގާމަށް ބޭފުޅަކު އައްޔަނުކުރާނީ ރައީސުލްޖުމްހޫރިއްޔާ އެވެ.
