ސިކުނޑީގެ އެކިއެކި ބަލިތައް ހުންނަ މީހުންނާއި އުމުރުން ދުވަސްވީ މީހުން ބަލަހައްޓަމުން އަންނަ ކ. ގުރައިދޫ މަރުކަޒުގައި ޑޮކްޓަރަކާއި ނަރުހަކު ނެތްތާ ހަތަރު މަހަށް ވުރެން ގިނަ ދުވަސްވެއްޖެ އެވެ.
މީގެއިތުރުން "އަދަދު" އަށް އެނގިފައިވާ ގޮތުގައި ނަފްސާނީ ބަލިތަކަށް ފަރުވާދޭނެ ޑޮކްޓަރަކު ވެސް އެތަނުގައި ނެތްތާ އަހަރަކަށް ވުރެން ގިނަ ދުވަސް ވަނީ ވެފަ އެވެ.
ސިކުނޑީގެ ނުކުޅެދުންތެރިކަން ހުންނަ މީހުންގެ އިތުރުން އުމުރުން ދުވަސްވީ, އަޅާލާނެ މީހެއް ނެތް 197 މީހުން ގުރައިދޫ މަރުކަޒުގައި މިހާރު ވެސް އެބަތިއްބެވެ. އޭގެ ތެރޭގައި ނަފްސާނީ މައްސަލަތައް ހުރި 158 މީހުންނާއި އުމުރުން ދުވަސްވީ 39 މީހުން ހިމެނެ އެވެ.
އެތަނުގެ މުވައްޒަފުންގެ ގޮތުގައި މަަސައްކަތްކުރަނީ 100 އެއްހާ މީހުންނެވެ.
ގުރައިދޫ މަރުކަޒުގެ ހާލަތު ދަށްވެފައިވާ ކަން އެ ރަށުގެ ކައުންސިލްގެ މެމްބަރަކު ނަން ހާމަނުކުރަން އެދިވަޑައިގެން "އަދަދު"އަށް ވަނީ ޔަގީންކޮށްދެއްވައިފަ އެވެ.
މިވީ ދިގު ތާރީހުގައި މިއީ މިހާލަތަކަށް އެ މަރުކަޒު ދިޔަ ފުރަތަމަ ފަހަރު. -- ކައުންސިލަރު
އޭނާ ވިދާޅުވީ އެ މަރުކަޒުގައި ތިބި ބަލި މީހުންނަށް މިހާރު ބޭސް ދެމުން އަންނަނީ އެކަމުގެ ތަޖުރިބާއެއް ނެތް އެތަނުގެ މުވައްޒަފުން ކަމަށެވެ. އިތުރު ފަރުވާއެއް ހޯދަން ޖެހޭ ނަމަ މިހާރު ގެންދަނީ ގުރައިދޫ ސިއްހީ މަރުކަޒަށް ކަމަށް އޭނާ ވިދާޅުވި އެވެ.
"ކުރިން އެއީ ޑޮކްޓަރުންގެ ބެލުމުގެ ދަށުން އަބަދު ބަލަހައްޓަމުން އައި މީހުން. މިހާރު އެކަމެއް ނުވޭ. މިވީ ދިގު ތާރީހުގައި މިއީ މިހާލަތަކަށް އެތަން ދިޔަ ފުރަތަމަ ފަހަރު،" ތިރީސް އަހަރަށް ވުރެން ގިނަ ދުވަސް ވެފައިވާ މަރުކަޒާ ގުޅޭ ގޮތުން ކައުންސިލަރު ވިދާޅުވި އެވެ.
"ވަރަށް ފަހުން ވެސް އެތަނުގެ [އުމުރުން ދުވަސްވީ] ދެ މީހަކު ހާލު ބޮޑުވެގެން ފަރުވާދިން ވާހަކަ އަޑު އެހިން."
ގުރައިދޫ މަރުކަޒުގައި ތިބި މީހުންގެ ތެރޭގައި ގިނައީ ކޮންމެ ދުވަހަކުހެން ބޭސް ކާން ޖެހޭ މީހުންނެވެ. އަދި ސިއްހީ ތަޖުރިބާކާރެއްގެ ލަފާގެ މަތިން ވަކި ގޮތަކަށް އެމީހުން ބަލަހައްޓަން ޖެހެ އެވެ.
އެފަދަ މީހުންނަށް ފަރުވާ ދެއްވާ ޑޮކްޓަރަކު, މި މައްސަލައިގެ ގޮތުން ނަން ނުޖަހަން ޝަރުތުކޮށް ވިދާޅުވީ އެފަދަ މަރުކަޒެއްގައި ތިބޭ މީހުންގެ ކަންކަން ކުރަން ޖެހޭނީ ޑޮކްޓަރެއްގެ ބެލުމުގެ ދަށުން ކަމަށާއި އެތަނުގައި ޑޮކްޓަރެއް ނެތުމަކީ ބަލައިގަނެވޭނެ ކަމެއް ނޫން ކަމަށެވެ. ސްކިޒޮފްރޭނިއާ ފަދަ ބަލިތަކަށް ފަރުވާ ހޯދާ މީހުންނަށް ގަވައިދުން ބޭސް ނުދެވޭ ނަމަ ބުއްދި ފިލައިގެން ދިއުން ފަދަ ކަންކަން ކުރިމަތިވާނެތީ އެކަންކަމަށް ފަރުވާ ކުޑަނުކޮށް ފަރުވާ ދޭން ޖެހޭ ކަމަށް ވެސް ޑޮކްޓަރު ވިދާޅުވި އެވެ.
ސައިކޭޓްރިސްޓެއް ނެތި 14 މަސް، އަދި ޑޮކްޓަރެއް ނަރުހެއް ނެތި ހަތަރު މަސް ވުމަކީ ވަރަށް ދެރަވަރު ދެއްތޯ. އެފަދަ ސެންޓަރެއްގައި އެއީ ކޮންމެހެން ވެސް ލިބެން ޖެހޭނެ ހިދުމަތެއް. -- ޑޮކްޓަރު
ޑޮކްޓަރު ވިދާޅުވީ ގުރައިދޫ މަރުކަޒުގައި ގިނައިން ތިބެނީ އާއިލާތަކުން އަޅާނުލާ މީހުންނަށް ވާތީ އާއި އެ ތަނުގައި ތިބޭ މީހުންގެ ސިއްހީ ހާލަތު ހުރިގޮތުން އެ މީހުންގެ ފަރާތުން ވާހަކަ ދައްކާނެ މީހުން މަދު ކަމަށެވެ. އޭގެ ނަތީޖާއެއްގެ ގޮތުން މިފަދަ މައްސަލަތައް ހައްލު ނުވެ އޮންނަ ކަމުގެ ކަންބޮޑުވުން އޭނާ ފާޅުކުރެއްވި އެވެ.
ސިއްހީ ހިދުމަތް ލިބުން ދަތިވުމުގެ އިތުރުން އެ މަރުކަޒުގައި ކެއުމަށް ބޭނުންކުރާ ތަކެތީގެ ސަޕްލައިއަށް ވެސް މި ފަހުން ދަތިތަކާ ކުރިމަތިވި ކަމަށް ކައުންސިލް މެމްބަރު ވިދާޅުވި އެވެ. މިދިޔަ މަހު ހަފުތާއެއްހާ ދުވަހު އެ މަރުކަޒުގައި ފިޔާ އާއި ލޮނުމެދު ފަދަ ތަކެތި ނާޅައި ރިހަ ކައްކާފައިވާ ކަމަށް ވެސް އޭނާ ވިދާޅުވި އެވެ.
"ފަހުން މުވައްޒަފުން ފިހާރަތަކާއި އެކި ތަންތަނުން އެއްޗެހި ގެނެސްގެން ކެއްކީ،" ކައުންސިލަރު ވިދާޅުވި އެވެ.
އޭނާ ވިދާޅުވި ގޮތުގައި ގުރައިދޫ މަރުކަޒުގެ ހާލަތު ދަށްވެފައި އޮތް މިންވަރު ކައުންސިލުން ވެސް ވަނީ ޖެންޑާ މިނިސްޓްރީގެ ސަމާލުކަމަށް ގެނެސްފަ އެވެ. އެކަމަކު އެދެވޭ ޖަވާބެއް މިހާތަނަށް ކައުންސިލަށް ދީފައެއް ނުވެ އެވެ.
ގުރައިދޫ މަރުކަޒުގެ ހާލަތު ދަށްވެފައިވާ މައްސަލައިގެ ތަފްސީލަށް "އަދަދު" ނޫހުން, އެ މަރުކަޒު ބަލަހައްޓާ ޖެންޑާ މިނިސްޓްރީގައި އެދިފައިވީ ނަމަވެސް އަދި ބަހެއް ނުލިބެ އެވެ. އެކަމަކު މި މައްސަލައިގައި "އަދަދު"ން ކުރި ސުވާލުތަކަށް ޖަވާބު ލިބުނުހާ އަވަހަކަށް އަންގާނެ ކަމަށް ޖެންޑާ މިނިސްޓްރީގެ މީޑިއާ އޮފިޝަލް ވިދާޅުވި އެވެ.
އިންސާނީ ހައްގުތަކުގެ ދިފާއުގައި ވަކާލާތު ކުރައްވާ، މުހައްމަދު ޝިހާބު (ދަމާސް ޝިހާބު)، ވިދާޅުވިގޮތުގައި ގުރައިދޫ މަރުކަޒުގެ ހާލަތު އެގޮތަށް އޮތް ނަމަ އެއީ ވަރަށް ބޮޑު ކަންބޮޑުވުމެއް ކަމަށެވެ. އޭގެން ދައްކައިދެނީ ސަރުކާރުން ކަންކަން ތަންފީޒު ކުރޭތޯ ބަލަންޖެހޭ އިދާރާތައް ފަންގްޝަން ނުކުރާކަން ކަމަށް ވެސް އޭނާ ވިދާޅުވި އެވެ.
މިއީ, ވަރަށް ބޮޑު އިހުމާލެއް ކަމަށް ޝިހާބް ދެކެވަޑައިގަންނަވަ އެވެ.
"ދައުލަތުގެ އެކަން ބަލަން ތިބި މޮނިޓަރިން އިދާރާއިން އެކަން ރައްޔިތުންގެ ސަމާލު ކަމަށް ގެންނަން ޖެހޭ. އެ ކަން ބުނެ ދޭން ޖެހެނީ ހަމައެކަނި ސަރުކާރަކަށް ނޫން. ރައްޔިތުންނަށް ވެސް އަންގަން ޖެހޭ،" އިޖުތިމާއީ މަސައްކަތް ކުރާ ވިލިޖޯލީގެ ޗީފް ވޮލަންޓިއާކަން ވެސް ކުރައްވާ ޝިހާބް ވިދާޅުވި އެވެ.
