ކޮވިޑް-19 ވެކްސިން ދިވެހިރާއްޖޭގައި ޖެހި މީހުންގެ އަދަދު 240،000 އަށް ވުރެ ގިނަވެފައިވާއިރު ވެސް ބަލިޖެހޭ މީހުންގެ ނިސްބަތް ދަށް ނުވާ ކަމަށް ހެލްތު ޕްރޮޓެކްޝަން އެޖެންސީގެ ހިސާބުތަކުން ދައްކައިފި އެވެ.
މުޅި ދުނިޔެ ހުއްޓުމަކަށް ގެނައި ކޮވިޑް-19 އާ ދެކޮޅަށް އިންޑިއާގެ ކުންފުންޏަކުން ތައްޔާރުކޮށްފައިވާ ކޮވިޝީލްޑްގެ ފުރަތަމަ ޑޯޒު މިއަދާ ހަމައަށް 243،749 މީހުންނަށް ޖަހާފައިވާ ކަމަށް އެޗްޕީއޭ އިން ރޭ ވަނީ ބުނެފަ އެވެ. މިއީ ދިވެހިރާއްޖޭގައި ދިރިއުޅޭ މީހުންގެ ތެރެއިން 45.9 ޕަސެންޓު މީހުންނެވެ.
ނަމަވެސް އެޗްޕީއޭގެ ހިސާބުތަކުގައިވާ ގޮތުން ހޮނިހިރު ދުވަހު ނެގި 3570 ސާމްޕަލުން 103 މީހަކު ބައްޔަށް ޕޮޒިޓިވްވެފައިވާކަން ވަނީ ޔަގީންވެފަ އެވެ. ފެބްރުއަރީ ފަހުކޮޅުން ފަށައިގެން ކޮންމެ ދުވަހަކު ކަހަލަ ގޮތަކަށް ކޮވިޑް-19 އަށް ޕޮޒިޓިވްވާ މީހުންގެ އަދަދު އުޅެނީ 100 އިން މަތީގަ އެވެ.
ވެކްސިނާއެކު ބަލިޖެހޭ މީހުންގެ ނިސްބަތް ދަށް ވާނީ ކޮންއިރަކުކަން ބުނެދިނުން އުނދަގޫ. ވެކްސިން ޖަހައިގެން، ބަލި ޖެހޭ މީހުންގެ އަދަދު މަދު ކުރަން ބޭނުން ނަމަ، އާބާދީގެ ބޮޑު ބައެއް ވެކްސިން ޖަހަންޖެހޭ. -- އެޗްޕީއޭގެ ތަރުޖަމާނު ޑރ. ނަޒްލާ ރަފީގް
ކޮވިޝީލްޑް ދެ ޑޯޒު ހަމަކޮށްފައިވާ މީހުންނަށް ކޮވިޑް-19 އިން ރައްކާތެރިކަން ލިބުމުގެ ގާތްގަނޑަކަށް 83 ޕަސެންޓު ފުރުސަތު އޮންނަ އިރު، ފުރަތަމަ ޑޯޒާއި ދެ ވަނަ ޑޯޒާ ދެމެދު ހިނގާ މުއްދަތުގައި ވެކްސިނުން 60 ޕަސެންޓު ސަލާމަތްތެރިކަން ލިބޭ ކަމަށްވެ އެވެ.
އެކަމަކު ބަލި ޖެހޭ މީހުންގެ ނިސްބަތް މަދުވާނީ ވެކްސިން ޖެހުން، ލޮކްޑައުން އަދި މުޖްތަމައުއަށް ވިސްނައި އަޅާ ފިޔަވަޅުގެ އިތުރުން ކޮންމެ މީހަކު ވެސް، ވިސްނައިގެން، އާންމު ސަލާމަތްތެރި ކަމަށް އަޅާ ފިޔަވަޅުތަކަށް ކޮންމެ ދުވަހަކު ވެސް ސަމާލުވެގެން ކަމަށް އެޗްޕީއޭ އިން ބުންޏެވެ.
"މިސާލަކަށް ސްކޫލްތައް ބަންދު ކުރުމުން ސްކޫލުން އެކަކު އަނެކަކާ ދިމާވުމެއް ނޯންނާނެ. އެކަމަކު ސްކޫލް ބަންދު ދުވަސްތަކުގައި ތިމާގެ މީހުންގެ ގެތަކަށް މި ކުދިން ގެންގޮސްފިއްޔާ ގިނަ މީހުންނާ ދިމާވުމުގެ ފުރުސަތު އޮންނާނެ ބަލި ޖެހުމުގެ ފުރުސަތާ ވެސް އެކު،" ޑރ. ނަޒްލާ "އަދަދު"އަށް ވިދާޅުވި އެވެ.
"ވެހިކަލް ދުއްވުން މަނާ ކުރުމާއި ކާފިއު ހިންގުމުގައި ވެސް ކަންތައް އޮތީ މިހެން. ވެހިކަލް ދުއްވުން މަނާ ގަޑީގައި ވެސް މިސާލަކަށް ގިނަ ބަޔަކު ބޭރަށް ނިކުންނަ ނަމަ، އެކަކު އަނެކަކާ ދިމާވުން މަދު ކުރަން މި އަޅާ ފިޔަވަޅުތަކުން އަސަރެއް ނުކުރާނެ."
ކޮރޯނާ ވައިރަސް 2019 ވަނަ އަހަރު ފަހުކޮޅު ދުނިޔޭގައި ފެތުރެންފެށުމާއެކު ވެކްސިން ހެދުމުގެ ދިރާސާތައް ސައިންޓިސްޓުން ވަނީ ކުރަން ފަށައިފަ އެވެ. އެންމެ ފުރަތަމަ ވެކްސިން އުފައްދާފައި ވަނީ ޗައިނާއިންނެވެ. ފަހުން އޮކްފޯޑް ޔުނިވާސިޓީން، ބޭސް ކުންފުނި އަސްޓްރާޒެނެކާއާ ގުޅިގެން ވެކްސިން އުފެއްދި އެވެ. އަދި މޮޑާނާއިން ފައިޒާ ވެކްސިން ހަދާފައިވާ އިރު ޖޯންސަންސް އެންޑް ޖޯންސަންސް އިން ވެސް ވަނީ ވެކްސިނެއް އުފައްދައިފަ އެވެ.
ރާއްޖޭގައި ބޭނުންކުރާ ކޮވިޝީލްޑް އުފައްދާފައިވާ ކޮރޯނާ ވައިރަހުގެ ކަށިތަކުން ނަގާ ޕްރޮޓީން ރާމާމަކުނަށް ޖެހޭ ރޯގާގެ މަރާލާފައިވާ ވައިރަހެއްގެ ތެރެއަށް ލައިގެންނެވެ. މި ވެކްސިން ހަށިގަނޑަށް ވަނުމުން، އޭގެ ސަބަބުން އިންސާނާގެ ހަށިގަނޑަށް ވައިރަހެއް ނުވަދެ އެވެ. އަދި ދިފާއީ ނިޒާމުން އެންޓިބޮޑީސް އުފައްދަން މަގުފަހިވެ އެވެ.
ޗައިނާއިން ރާއްޖެއަށް ހަދިޔާކޮށްފައިވާ ސައިނަފޯމް އުފައްދާފައި ވަނީ ކޮރޯނާ ވައިރަހަށް ބަދަލުތަކެއް ގެނެސްގެނެވެ. ކޮރޯނާ ވައިރަހަށް ކެމިކަލެއް އަޅާލުމުން އެ އިންއެކްޓިވްވެ އެވެ. ނަމަވެސް އޭގެ ބޭރު ފަށަލައިގަ ހުންނަ ކަށިތަކަށް ގެއްލުމެއް ނުވެ އެވެ. މިހެން ހެދުމުން ވައިރަހަށް ރެޕްލިކޭޓް ކުރުމުގެ ބާރު ކެނޑެ އެވެ. އަދި ހަށިގަނޑަށް މި ވެކްސިން ވަނުމުން ދިފާއީ ނިޒާމުން ކޮރޯނާ ވައިރަހަށް އެންޓިބޮޑީސް އުފައްދަން ދަސްވެ އެވެ.
