ކޮވިޑް-19 އިން ރައްކާތެރިވުމަށް ދެމުން އަންނަ ވެކްސިންގެ ދެ ވަނަ ޑޯޒް ދޭން މިއަދު ފަށައިފި އެވެ.
ހެލްތް ޕްރޮޓެކްޝަން އެޖެންސީ (އެޗްޕީއޭ) އިން ބުނިގޮތުގައި ދެވަނަ ޑޯޒް މިހާރު ދެނީ ފެބްރުއަރީ އެކަކުން ހަތަރު ވަނަ ދުވަހާ ދެމެދު ފުރަތަމަ ޑޯޒް ޖަހާފައިވާ މީހުންނަށެވެ.
ދެ ވަނަ ޑޯޒް ދެނީ ސޯޝަލް ސެންޓަރާއި، ނެޝެނަލް އާޓް ގެލެރީ އާއި ހުޅުމާލެ ފްލޫ ކްލިނިކްގެ އިތުރުން ވިލިމާލެ ޒުވާނުންގެ މަރުކަޒްގަ އެވެ.
ވެކްސިން ޖަހަން އަންނައިރު ވެކްސިން ކާޑާއެކު އައިޑީ ކާޑް ނުވަތަ ޕާސްޕޯޓް ނުވަތަ ލައިސަންސް ކާޑް ގެންދިއުމަށް އެޗްޕީއޭން އެދެ އެވެ.
ރާއްޖޭގައި ކޮވިޑް-19 ވެކްސިން ދޭން ފެށީ ފެބްރުއަރީ މަހުން ފެށިގެންނެވެ. އެންމެ ފުރަތަމަ ކޮވިޝީލްޑް ވެކްސިން ދިންއިރު، ފަހުން ވަނީ ޗައިނާގެ ސިނޮފާމް ވެކްސިން ވެސް ދޭން ފަށައިފަ އެވެ.
ކޮވިޝީލްޑް ވެކްސިން ޖެހި މީހުންނަށް އަށް ހަފްތާ ފަހުން ދެ ވަނަ ޑޯޒް ޖަހައި ދޭއިރު ސިނޮފާމް ޖެހި މީހުންނަށް 2-4 ހަފްތާގެ ތެރޭގައި ދެވަނަ ޑޯޒް ޖަހައިދެ އެވެ.
ވެކްސިންގެ ދެ ޑޯޒް ފުރިހަމަ ކުރުމުން ކަރަންޓީން ނުވެ އަތޮޅުތެރެއަށް ދިއުމުގެ ހުއްދަ ދިނުންފަދަ ލުއިތަކެއް ދޭން ވަނީ ނިންމާފަ އެވެ.
ކޮވިޑް ވެކްސިނަށް ބޮޑު ތަރުހީބެއް ލިބިގެންދިޔައިރު މިހާތަނަށް ދެ ލައްކައަށް ވުރެ ގިނަ މީހުން ވަނީ ރާއްޖޭން ވެކްސިން ޖަހައިފަ އެވެ. މާލޭގެ އިތުރުން ރާއްޖޭގެ ހުރިހާ ރަށެއްގައި ވެސް ވަނީ ވެކްސިން ދީފަ އެވެ.
ވެކްސިންގެ ދެވަނަ ޑޯޒް މިއަދު ދޭން ފަށާފައިވާއިރު ކޮވިޑް-19އަށް މީހުން ޕޮޒިޓިވްވާ އަދަދު ވަނީ އިތުރުވާން ފަށައިފަ އެވެ. މިހާރު އެންމެ ބޮޑަށް ބަލި ފެތުރެނީ ރަށްތަކުގަ އެވެ.
