ބެލްގްރޭޑް (އޭޕްރީލް 3) - މިދިޔަ ހަފްތާގައި ވޯލްޑް ކަޕް ކޮލިފައިން މެޗެއްގެ ތެރެއިން ޕޯޗުގަލްގެ ތަރި ކްރިސްޓިއާނޯ ރޮނާލްޑޯ އެއްލާލި ކެޕްޓަން ބޭންޑް ނީލަމެއްގައި ވިއްކާލުމަށް ފަހު އެ ފައިސާ ހަ މަހުގެ ކުޑަކުއްޖެއްގެ ބޭސް ފަރުވާ އަށް ހަރަދުކުރަން ނިންމައިފި އެވެ.
ސާބިއާ އާއި ޕޯޗުގަލް 2-2 އިން އެއްވަރުވި މެޗުގެ އިތުރު ވަގުތުގައި ރޮނާލްޑޯ ޖެހި ބޯޅައެއް ވަނީ ގޯލުގެ ރޮނގު ހުރަސްކޮށްފަ އެވެ. އެކަމަކު އެ މެޗުގައި ގޯލް ލައިން ޓެކްނޮލޮޖީ ނެތުމުން ރެފްރީ އާއި ލައިންސްމަން އަށް ނުފެންނާތީ އެ ގޯލު ބަލައިނުގަންނަން ނިންމި އެވެ. އެކަމާ ވަރަށް ބޮޑަށް ރޮނާލްޑޯ ހިތްހަމަނުޖެހުން ފާޅުކޮށް ދަނޑުން ފޭބިއިރު, އޭނާ ވަނީ ކެޕްޓަން ބޭންޑް ވެސް ދަނޑު މައްޗަށް އެއްލާލައިފަ އެވެ.
އެ ކެޕްޓަން ބޭންޑް ލިބުނީ ދަނޑުގެ ފަޔާފައިޓަރެއްގެ ޑިއުޓީގައި ހުރި ޖޯޖް ވުކްސެވިޗް އަށެވެ. ކެޕްޓަން ބޭންޑް ލިބުމާ އެކު ވުކްސެވިޗް ނިންމީ އެ ގައުމުގައި އެހީއަށް ބޭނުންވެފައިވާ ހަ މަހުގެ ކުޑަކުއްޖެއް ކަމަށްވާ ގަވްރީއޯގެ ބޭސް ފަރުވާ އަށް ފައިސާ ހޯދަން އެ ކެޕްޓަން ބޭންޑް ދިނުމަށެވެ. އެ ގޮތުން ސާބިއާގެ އިންސާނީ ހައްގުތަކަށް މަސައްކަތްކުރާ ގްރޫޕެއް މެދުވެރިކޮށް ނީލަމުގައި އެ ކެޕްޓަން ބޭންޑް ވިއްކާލާފައިވަނީ 75000 ޑޮލަރަށެވެ.
ސްޕައިނަލް މަސްކިއުލާ ބައްޔަަކަށް ފަރުވާ ހޯދަމުން އަންނަ ހަ މަހުގެ ގަވްރީއޯގެ ބޭސް ފަރުވާ އަށް ޖުމްލަ 2.1 މިލިއަން ޕައުންޑް ހަރަދުވެ އެވެ. ވުކްސެވިޗް ބުނީ އޭނާ ދަނޑުގައި މަސައްކަތްކުރާއިރު, ކުޅުންތެރިންގެ ފަރާތުން ލިބޭ އެ ފަދަ ކޮންމެ އެއްޗެއް އޭނާ އަންނަނީ ގަވްރީއޯގެ ބޭސް ފަރުވާ އަށް ފައިސާ ހޯދަން ވިއްކަމުންނެވެ. އެ ގޮތުން މީގެ ކުރިން ސާބިއާ ގައުމީ ޓީމުގެ ބައެއް ކުޅުންތެރިންގެ ޖޯޒީ ވެސް ވިއްކާފައިވާނެ ކަމަށް ވުކްސެވިޗް ބުންޏެވެ.
ގަވްރީއޯގެ މަންމަ ސާބިއާގެ ޓީވީ އަކަށް ދިން އިންޓަވިއުއްގައި ބުނީ ރޮނާލްޑޯ ފަދަ ކުޅުންތެރިއެއްގެ ކެޕްޓަން ބޭންޑް ވިއްކައިގެން ގަވްރީއޯގެ ބޭސްފަރުވާ އަށް ހަރަދުކުރުމާ އެކު ގިނަ އެހެން މީހުންގެ ދީލަތި އެހީތައް ވެސް ލިބެމުން އަންނަ ކަމަށާއި އުއްމީދަކީ ވީ އެންމެ އަވަހަކަށް ހުރިހާ ހަރަދެއް ހަމަޖެހޭވަރަށް ފައިސާ ލިބުން ކަމަށެވެ.
"ރޮނާލްޑޯގެ ކެޕްޓަން ބޭންޑްގެ އެ ވާހަކަ އަށް ފަހު ނުދަންނަ އެތައް ބައެއް މިހާރު އެހީތެރިކަން ފޯރުކޮށްދޭ," ގަވްރީއޯގެ މަންމަ ބުންޏެވެ.
ދުނިޔޭގެ ފުޓްބޯޅައިގައި އުފެދުނު އެންމެ މޮޅު އެއް ކުޅުންތެރިޔާ ރޮނާލްޑޯ ކެޕްޓަން ބޭންޑް އެއްލާލުމުން އޭނާ އަތުން ޕޯޗުގަލްގެ ކެޕްޓަންކަން އަތުލަން ނުވިސްނަންތޯ ނޫސްވެރިއަކު ސުވާލުކުރުމުން ޕޯޗުގަލްގެ ކޯޗު ފެނާންޑޯ ސަންޓޯސް ވަނީ އެ ގޮތަށް ކަން ކުރަންޖެހޭ އެއްވެސް ސަބަބެއް ނެތް ކަމަށް ބުނެފަ އެވެ.
