ކޮވިޑް-19 އާއި އަޑިއަޅައިލި ދުނިޔޭގެ އިޤްތިސާދުގެ ވެސް މާ ބޮޑު ތުރާލެއް ނުލިބި މިދިޔަ އަހަރު ހިންދެމިލި އެއް ސިނާއަތައް ޓެކްނޮލޮޖީ ސިނާއަތު ވާނެއެވެ. ގޭގައި ތިބެގެން މަސައްކަތް ކުރަންޖެހުމާއި ގައިދުރުކަން ބެހެއްޓުން ފަދަ ކަންކަމަށް ގޫގުލް މީޓާއި ޒޫމާއި ވާޗުއަލް އިވެންޓު ފަދަ އައު ވިސްނުންތަކުން ޓެކްނޮލޮޖީ ހޯދައިދިން ލުއިތަކަށް މިއަދު އަހަރެމެން މިތިބީ ކިތަންމެ ރަނގަޅަކަށް ވެސް ހޭނިފަ އެވެ. ކޮންމެއަކަސް އެ ވިސްނުމުގައި، އޭޕްރީލްމަހުގެ "ޓެކް" ކަލަންޑަރުގައި "ބޮޅުއަޅައިލަންޖެހޭ" ބައެއް ތާރީހުތަކަށް ކަޅިއެއް ހިންގައިލުން ކިހިނެއްވާނެހެއްޔެވެ؟
އެޑޯބީ ސަމިޓް 2021 – އޭޕްރީލް 27 - 28
މިއީ ފޮޓޯޝޮޕާއި އިލަސްޓްރޭޓާ ފަދަ ސޮފްޓްވެއާގެ އުފެއްދުންތެރި އެތައް އީޖާދުތަކަކުން އަހަރެމެންނަށް ލުއިފަސޭހަކަން ހޯދައިދިނުމުގެ ފަހަތުގައި އޮތް އެޑޯބީ އިން ކޮންމެ އަހަރަކު އެންމެ އިސްކަމެއްދީގެން ބާއްވާ އެއް ހަރަކާތެވެ. ހިލޭ ބައިވެރިވެވޭގޮތަށް ވާޗުއަލްކޮށް ކުރިއަށް ގެންދާ މި އިވެންޓުގައި މި އަހަރު، މަޢުލޫމާތު ދިނުމުގެ 200 އަށް ވުރެ ގިނަ ދަންފަޅިތަކާއި، ތަމްރީނާއި، މަސައްކަތު ބައްދަލުވުންތައް ކުރިއަށް ދާނެ އެވެ. އޭޕްރީލް 27 އާއި 28 ގައި ބޭއްވުމަށް ތާވަލުކޮށްފައިވާ މި އިވެންޓްގައި ޑިޖިޓަލް ވިޔަފާރި އާއި ޑިޖިޓަލް ކޮންޓެންޓް އުފެއްދުމާއި އެޑޯބީގެ ވިޔަފާރި ހިދުމަތްތަކާއި ގުޅޭ އެންމެ ފަހުގެ މައުލޫމާތުތައް ހިއްސާކުރުމާއި އައު އުފެއްދުންތައް ތަޢާރަފުކުރުމަށް ވަނީ ހަަމަޖެހިފަ އެވެ. ރާއްޖޭގެ "ކްރިއޭޓިވް ކޮމިއުނިޓީ" އަށް ނިސްބަތްވާ ހަމަ ކޮންމެ މީހަކު ވެސް މި އިވެންޓްގެ އަޖުމަ ބަލައިލާން އަދަދުން ދައުވަތު ދެމެވެ.
ރެޑް ހެޓް ސަމިޓް 2021 - އޭޕްރީލް 27 - 28
ވިޔަފާރިތަކާއި ކުންފުނިތަކަށް ހާއްސަކޮށްގެން ހިލޭ ތަރައްގީކޮށް ބޭނުންހިފޭ (އޯޕަން ސޯސް) ސޮފްޓްވެއާ އުފެއްދުމުގައި އެންމެ ވާދަވެރި އެއް ކުންފުނި ރެޑް ހެޓް ގެ މި އިވެންޓް މިއަހަރު ކުރިއަށް ގެންދިއުމަށް ރާވައިފައި އޮތީ ތަފާތު 3 ބަޔަކަށް ބަހައިލައިގެންނެވެ. އޭގެ ތެރެއިން އޭޕްރީލް 27 – 28 މި ދެ ދުވަހު ހިލޭ ބައިވެރީނަށް ހުޅުވައިލައިގެން ކުރިއަށް ގެންދާ ދަންފަޅިތަކުގައި އޯޕަން ސޯސް ޓެކްނޮލޮޖީގެ އެންމެ ފަހުގެ އީޖާދުތަކާއި އެ ދާއިރާގެ ކުރިމަގާ ގުޅޭ ގިނަ މައުލޫމާތުތަކެއް ހިއްސާ ކުރާނެ ކަމަށް ރެޑްހެޓުން ވަނީ އިއުލާނުކޮށްފަ އެވެ. ސިލްސިލާކޮށް ކުރިއަށް ގެންދާ މި ސަމިޓުގެ ބައެއް ހަރަކާތްތައް އަހަރުގެ މެދުތެރެއާއި ފަހުކޮޅަށް ވެސް ވަނީ ތާވަލުކޮށްފަ އެވެ. މިއީ ވެސް ރާއްޖޭގެ ޑިވެލޮޕަރުންނާއި އައިސީޓީ ސިނާޢަތުގެ މަސައްކަތްތެރީންނަށް ބައިވެރިވެލުން މުހިންމު އިވެންޓެެއް ކަމަށް އަދަދުން ދެކެމެވެ.
އިންޓަރޮޕް ޑިޖިޓަލް – ސައިބަރ ސެކިއުރިޓީ އިވެންޓް – އޭޕްރީލް 29
އައިސީޓީ ސިނާއަތުގެ ތަޖުރިބާކާރުންގެ ބަހުން ނަމަ، މިއީ ސައިބަރ ސެކިއުރިޓީ އާއި ޑިޖިޓަލް އުފެއްދުންތަކާއި އީޖާދުތަކުގެ ރައްކާތެރިކަމާ ގުޅުން ހުރި މަސައްކަތްތަކުގައި ޝާމިލުވާ ހަމަ ކޮންމެ މީހަކު ވެސް ޒިޔާރަތްކޮށްލަން ޖެހޭ އިވެންޓެކެވެ. 30 އަހަރުގެ ދިގު މާޒީއެއް އޮތް މި އިވެންޓުގައި މިއަހަރު މައުލޫމާތު ހިއްސާކުރާނެ މުހިންމު ދާއިރާތަކުގެ ތެރޭގައި އިންޓަނެޓާއި ޓެކްނޮލޮޖީގެ އާ ވައްޓަފާޅިތަކުގެ ސަބަބުން ސައިބަ ކްރައިމް ނުވަތަ ޓެކްނޮލޮޖީ ނަހަމަ ގޮތުގައި ބޭނުންކޮށްގެން ކުރާ ކުއްތަކަށް ވިޔަފާރިތަކާއި ކުންފުނިތައް ހޭލުންތެރިކުރުމާއި ޑިޖިޓަލް ފިކުރީމުދާ ރައްކާތެރިކުރުން ހިމެނެ އެވެ.
ބަވަނަވަމުން އަންނަ ދުނިޔޭގެ އެކި ސިނާއަތްތަކާއި މަސައްކަތުގެ މައިދާނުގައި އަބަދު ވެސް އެންމެ ފަހުގެ ސައްހަ މައުލޫމާތާއި އިލްމަށް ބަރޯސާވުމުގެ މުހިންމުކަން ބޮޑުވެފައި އޮތުމާއެކު، އަދަދުގެ އުންމީދަކީ މިފަދަ ހަރަކާތްތަކުގައި ކަމާއި ގުޅުންހުރި ދިވެހީން ބައިވެރިވާ މިންވަރު އިތުރުވެ، އޭގެ ފަރުދީ އަދި އިޖްތިމާއީ ފައިދާ ކުރިމަގުގައި ގައުމަށް ކުރުމެވެ. އަޅުގަނޑުމެން މި އަޅައިލަދިނީ ބޮޅެވެ. ބައިވެރިވުން އޮތީ ތިޔަބޭފުޅުންގެ އަތްމަތީގަ އެވެ.
