ވެންޓިލޭޓަރުތަކެއް ގަންނަން ސަރުކާރުން ހަވާލު ކުރި 30 މިލިއަން ރުފިޔާ ގެއްލުވާލި މައްސަލައިގައި ކުރީގެ ހެލްތު މިނިސްޓަރު އަބްދުﷲ އަމީނަށް ޖިނާއީ ދައުވާ ނުކުރުމުން ފާޑުކިޔުން އަމާޒުވެފައި އޮއްވައި، އިސްތިއުފާ ދެއްވަން ތައްޔާރަށް ހުންނެވި ކަމަށް ޕްރޮސެކިއުޓާ ޖެނެރަލް ހުސެއިން ޝަމީމް ވިދާޅުވެއްޖެ އެވެ.
ވެންޓިލޭޓަރުތަކެއް ގަތުމަށް ޑުބާއީގެ ކުންފުންޏަކާ އެޑްވާންސަށް 30 މިލިއަން ރުފިޔާ ދިނުމަށްފަހު ހަވާލު ކުރުމުން އެ މެޝިނުތަކެއް އަދި ވެސް ނުލިބެ އެވެ. ގާތްގަނޑަކަށް 75 މެޝިން ގަންނަން ހަވާލު ކުރުމުން ދިނީ ބޭނުން ނުކުރެވޭ ހާލަތުގައި އޮތް 11 ވެންޓިލޭޓަރެކެވެ.
އެ މައްސަލައިގައި އެއިރުގެ ހެލްތު މިނިސްޓަރު އަމީނާއި އޭނާގެ 10 މުވައްޒަފުންނަށް ދައުވާ ކުރުމަށް އެންޓި ކޮރަޕްޝަން ކޮމިޝަނުން އެދުމުން ކޯޓަށް މައްސަލަ ނުފޮނުވައި ޝަމީމް ވިދާޅުވީ އެ މައްސަލައިގައި ކުށުގެ އުންސުރުތައް ހަމަނުވާތީ ދައުވާ ކުރެވެން ނެތް ކަމަށެވެ.
"އަޅުގަނޑުމެން ބެލިއިރު ތަހުގީގަށް ލިބިފައިވާ މައުލޫމާތުތަކުން އެ ފައިސާ ވަތް ތަނެއް ހޯދިފައެއް ނެތް، ފައިސާ ވަތް ތަނެއް އަދިވެސް ހޯދައިފިނަމަ ދައުވާ ކުރާނަން، މި މައްސަލަ އެއްކޮށް ނިމުނީއެއް ނޫން،" ރާއްޖެ ޓީވީގެ ޝޯއެއްގައި ވާހަކަ ދައްކަވަމުން ޝަމީމް ވިދާޅުވި އެވެ.
އިސްތިއުފާ ދެއްވަން ތައްޔާރަށް ހުންނެވި ކަމަށް ޝަމީމް ވިދާޅުވީ ވެންޓިލޭޓަރުތަކުގެ މައްސަލައިގައި އޭނާ އިސްތިއުފާ ދެއްވަންޖެހޭ ކަމަށް މަޖިލީހުގެ ރައީސް މުހައްމަދު ނަޝީދު ވިދާޅުވެފައި އޮއްވަ އެވެ.
ވެންޓިލޭޓަރު މައްސަލާގައި ނަޝީދުގެ ނުރުހުން އާންމު ކުރައްވާފައިވަނީ އެ މައްސަލަ އޭސީސީއިން ދެވަނަ ފަހަރަށް މައްސަލަ ތަހުގީގު ކުރުމަށްފަހު ދައުވާ ކުރަން ޕްރޮސިކިއުޓާ ޖެނަރަލްގެ އޮފީހަށް ފޮނުވުމުން އެ މައްސަލަ ބޭރުކޮށްލާފައިވާތީ އެވެ.
"އަޅުގަނޑު އިސްތިއުފާ ދިނުމާ ބެހޭ އުސޫލުގައި އޮތް ގޮތަށް ކަންތައް ކުރާނަން، އެއީ ޕްރޮސެސްއެއް އޮންނަ ކަމެއް، އަޅުގަނޑުގެ މާބޮޑު ޝައުގުވެރިކަމެއް ހުރީއެއް ނޫން މި މަގާމުގަ ހުންނަން، އެކަމަކު އަޅުގަނޑު ކުރަން ނުޖެހޭ ކަމެއް ނުކުރެވޭނެ،" ޝަމީމް ވިދާޅުވި އެވެ.
ޝަމީމް ވިދާޅުވީ ވެންޓިލޭޓަރުތަކުގެ ފައިސާ ލިބުނު ބައެއް ހޯދުމުގެ މަސައްކަތް މިހާރު ވެސް އޭސީސީގެ ފަރާތުން ކުރަމުންދާ ކަމަށާއި އެހެންކަމުން ސާބިތު ކުރެވޭނެ ކަމުގެ ޔަގީން އޮއްވައި ދައުވާ ކުރުމުގެ ބޭނުމެއް ނެތް ކަމަށެވެ. އޭސީސީއިން އިތުރަށް ކުރާ ތަހުގީގުން ފައިސާ ލިބުނު މީހުން ސާފުވި ނަމަވެސް މިވަގުތު ދައުވާކޮށްފިނަމަ ފަހުން ދައުވާ ނުކުރެވޭނެކަން ވެސް ޝަމީމް ފާހަގަ ކުރެއްވި އެވެ. ގާނޫނު އަސާސީގައިވާ ގޮތުން އެ ކުށަކަށް ދެ ފަހަރަކަށް ދައުވާއެއް ނުކުރެވޭނެ އެވެ.
ވެންޓިލޭޓަރުތަކުގެ މައްސަލާގައި ދައުވާ ނުކުރުމުގެ އެއްވެސް މަސްލަހަތެއް ނެތް ކަމަށް ޝަމީމް ފާހަގަ ކުރައްވަމުން ވިދާޅުވީ މައްސަލާގައި ތުހުމަތުވާ އެއްވެސް މީހަކީ އޭނާއާ ގުޅުން ހުރި، އަދި ދަންނަ ވެސް ބައެއް ނޫން ކަމަށެވެ. އެހެންކަމުން ދައުވާނުކޮށް އަނބުރާ ފޮނުވާލުމަކީ ވަކި މީހަކަށްޓަކައި ކުރެއްވި ކަމެއް ނޫން ކަމަށް ޝަމީމް ވިދާޅުވި އެވެ.
މައްސަލާގައި އޭސީސީއިން އެދުނީ، އޭރުގެ ހެލްތު މިނިސްޓަރު އަބްދުﷲ އަމީނާއި އެ މިނިސްޓްރީގެ 11 މުވައްޒަފެއްގެ މައްޗަށް ދައުވާ އުފުލުމަށެވެ. އެމީހުންގެ ދައުވާ ކުރެވޭ މިންވަރަށް ހެކި ނެތް ކަމަށް ބުނެ އެންމެ ފުރަތަމަ ވެސް ޕްރޮސިކިއުޓާ ޖެނަރަލްގެ އޮފީހުން މައްސަލަ އަނބުރާ ފޮނުވާލި އެވެ. މައްސަލަ ރިވިއުކޮށް ދިނުމަށް އޭސީސީއިން އެދުނު ނަމަވެސް ދައުވާއެއް ސާބިތު ކުރެވޭ މިންވަރަށް އުންސުރުތައް ނެތް ކަމަށް ބުނެ މައްސަލަ އަނެއްކާވެސް ވަނީ އޭސީސީއަށް އަނބުރާ ފޮނުވާފަ އެވެ.
ރާއްޖޭގައި ކޮވިޑްގެ ހާލަތު ގޯސްވެގެންދާނެ ކަމުގެ ބިރު އޮތް ވަގުތެއްގައި ދުބާއީގެ އެގްޒެކިއުޓާސް ކުންފުންޏާ ހަވާލުކުރީ 75 ވެންޓިލޭޓަރު ހޯދުމަށެވެ. އެކަމަށް އެދުނު މުއްދަތު ހަމަވިތާ އެތައް ދުވަހެއް ފަހުން އެ ކުންފުނިން ރާއްޖެއަށް ފޮނުވީ 15 ވެންޓިލޭޓަރެވެ. ބާކީ 60 ވެންޓިލޭޓަރު އަދިވެސް ނުލިބެ އެވެ.
އެ ކުންފުނިން ވެންޓިލޭޓަރުތައް ފޮނުވުމަށް 34 މިލިއަން ރުފިޔާގެ ބިޑެއް ހުށަހެޅުމުން މާލިއްޔަތު ގާވައިދާ ހިލާފަށް އެއްބަސްވުމުގައި ސޮއިނުކޮށް 30 މިލިއަން ރުފިޔާ، އެ ކުންފުންޏަށް ދޫކުރި އެވެ. އެ ކުންފުންޏަށް އެ މަސައްކަތް ހަވާލުކޮށްފައިވަނީ ޑަބްލިއުއެޗްއޯގެ ލަފާގެ މަތިން ކަމަށް ހެލްތު މިނިސްޓްރީއިން ބުނެފައިވާއިރު އެފަދަ ލަފާއެއް ދީފައިނުވާނެ ކަމަށް ޑަބްލިއުއެޗްއޯއިން ވަނީ ބުނެފަ އެވެ.
ވެންޓިލޭޓަރު މައްސަލަ ހޫނުވެ، އޭރުގެ ހެލްތު މިނިސްޓަރު އަބްދުﷲ އަމީން ވަނީ އިސްތިއުފާ ވެސް ދެއްވާފަ އެވެ. އޭނާ އިސްތިއުފާ ދެއްވީ މަސައްކަތުން އެކަހެރިވެ ހުންނެވުމަށްފަހު އެވެ. މި މައްސަލާގައި ސަރުކާރަށް އާންމު ރައްޔިތުންނާއި އިދިކޮޅުގެ ފާޑުކިޔުންތައް ވެސް ވަރަށް ބޮޑަށް ވަނީ އަމާޒުވެފަ އެވެ. އިދިކޮޅުން ތުހުމަތު ކުރާ ގޮތުގައި ވެންޓިލޭޓަރު ކޮރަޕްޝަންގައި މުޅި ސަރުކާރު ވަނީ ޝާމިލުވެފަ އެވެ.
