ކޮވިޑާ ގުޅިގެން ރާއްޖެ ގެންނަން ހަވާލުކުރި ވެންޓިލޭޓަރުތަކުގެ މައްސަލާގައި ތުހުމަތުކުރާ ކޮރަޕްޝަން ފޮރުވަން ސަރުކާރުން މަސައްކަތް ކުރާ ނަމަ އެމްޑީޕީ އެފަދަ ސަރުކާރާ އެކު ނޯންނާނެ ކަމުގެ އިންޒާރު އެ ޕާޓީގެ ރައީސް މުހައްމަދު ނަޝީދު މިއަދު ދެއްވައިފި އެވެ.
ރައްޔިތުންގެ މަޖިލީހުގެ ރައީސްކަން ވެސް ކުރައްވާ، ނަޝީދު މިގޮތަށް އިންޒާރު ދެއްވަމުން މިއަދު ކުރެއްވި ޓްވީޓްގައި ވިދާޅުވީ، ވެންޓިލޭޓަރުގެ މައްސަލާގައި މަތި ޖެހުނަ ދީފި ނަމަ ރާއްޖޭގެ ރައްޔިތުންނަށް އިތުރަށް ލިބޭނެ ގެއްލުން ބޮޑު ކަމަށެވެ.
"ސަރުކާރު މިކަމުގައި ބައިވެރިވާތަން ފެންނަނީ، ވައްކަން ކުރާ ސަރުކާރާ އެކީ އެމްޑީޕީ އޮންނާކަށް ނޭދޭނެ،" ނަޝީދު ވިދާޅުވި އެވެ.
ވެންޓިލޭޓަރު މައްސަލައިގައި ދައުވާނުކުރަން ޕީޖީ ހުސެން ޝަމީމްގެ ނިންމެވުމާ އެކު ހިތްހަމަޖެހިވަޑައިނުގެން ނަޝީދު ވަނީ އެމްޑީޕީގެ ޕާލަމެންޓްރީ ގްރޫޕްގެ މެމްބަރުން ތިއްބަވާ ވަޓްސްއެޕް ގްރޫޕްގައި, ޝަމީމް އިސްތިއުފާ ދެއްވަންޖެހޭ ޖެހޭ ކަމަށް ވިދާޅުވެފަ އެވެ.
ނަޝީދު ވިދާޅުވި ގޮތުގައި ޝަމީމް ވަނީ ފޭލްވެފަ އެވެ.
"މިކަން ބަދަލު ކުރަންޖެހޭ، ރައްޔިތުންނާ އެކުގަ އަޅުގަނޑު މިކަމުގައި ދޫދޭކަށް ނެތިން،" ނަޝީދު ވިދާޅުވި އެވެ.
ވެންޓިލޭޓަރު މައްސަލައިގައި ނަޝީދުގެ ނުރުހުން އާންމު ކުރައްވާފައި ވަނީ އެ މައްސަލަ އެންޓި ކޮރަޕްޝަން ކޮމިޝަން (އޭސީސީ)އިން ދެވަނަ ފަހަރަށް މައްސަލަ ތަހުގީގު ކުރުމަށްފަހު ދައުވާ ކުރަން ޕްރޮސިކިއުޓާ ޖެނަރަލްގެ އޮފީހަށް ފޮނުވުމުން އެ މައްސަލަ ބޭރުކޮށްލާފައިވާތީ އެވެ.
މައްސަލާގައި އޭސީސީން އެދުނީ، އޭރުގެ ހެލްތު މިނިސްޓަރު އަބްދުﷲ އަމީނާއި އެ މިނިސްޓްރީގެ 11 މުވައްޒަފެއްގެ މައްޗަށް ދައުވާ އުފުލުމަށެވެ.
އެ މީހުންގެ ދައުވާ ކުރެވޭ މިންވަރަށް ހެކި ނެތް ކަމަށް ބުނެ އެންމެ ފުރަތަމަ ވެސް ޕްރޮސިކިއުޓާ ޖެނަރަލްގެ އޮފީހުން މައްސަލަ އަނބުރާ ފޮނުވާލި އެވެ. މައްސަލަ ރިވިއުކޮށް ދިނުމަށް އޭސީސީއިން އެދުނު ނަމަވެސް ދައުވާއެއް ސާބިތު ކުރެވޭ މިންވަރަށް އުންސުރުތައް ނެތް ކަމަށް ބުނެ މައްސަލަ އަނެއްކާވެސް ވަނީ އޭސީސީއަށް އަނބުރާ ފޮނުވާފަ އެވެ.
"މައްސަލަ އަލުން ރިވިއުކޮށް ބެލިއިރު، އާ މައުލޫމާތާއި، މައްސަލައިގައި ކުރިން ހޯދިފައިވާ ހެކި ގަރީނާގެ މައްޗަށް ބަލައި، ޖިނާއީ ކުށެއްގައި ސާބިތުކޮށްދޭންޖެހޭ އުުންސުރުތައް ސާބިތުކޮށްދެވިދާނެ ކަމަށް ނުފެންނާތީ އާއި، މައްސަލާގައި ދައުވާ ނުކުރުމަށް މި އޮފީހުން ނިންމި ސަބަބުތައް އެގޮތުގައި ދެމިއޮތްކަމަށް ފެންނާތީ އާއި، އެ ނިންމުމަށް ބަދަލު ނުގެންނަށް މި އޮފީހުން ވަނީ ނިންމާފައި،" ޕްރޮސިކިއުޓާ ޖެނަރަލް އޮފީހުގެ ޕަބްލިކް ޕްރޮސިކިއުޓާ އަހުމަދު ޝަފީއު ވިދާޅުވި އެވެ.
ރާއްޖޭގައި ކޮވިޑްގެ ހާލަތު ގޯސްވެގެންދާނެ ކަމުގެ ބިރު އޮތް ވަގުތެއްގައި ދުބާއީގެ އެގްޒެކިއުޓާސް ކުންފުންޏާ ހަވާލުކުރީ 75 ވެންޓިލޭޓަރު ހޯދުމަށެވެ. އެކަމަށް އެދުނު މުއްދަތު ހަމަވިތާ އެތައް ދުވަހެއް ފަހުން އެ ކުންފުނިން ރާއްޖެއަށް ފޮނުވީ 15 ވެންޓިލޭޓަރެވެ. ބާކީ 60 ވެންޓިލޭޓަރު އަދިވެސް ނުލިބެ އެވެ.
އެ ކުންފުނިން ވެންޓިލޭޓަރުތައް ފޮނުވުމަށް 34 މިލިއަން ރުފިޔާގެ ބިޑެއް ހުށަހެޅުމުން މާލިއްޔަތު ގާވައިދާ ހިލާފަށް އެއްބަސްވުމުގައި ސޮއިނުކޮށް 30 މިލިއަން ރުފިޔާ، އެ ކުންފުންޏަށް ދޫކުރި އެވެ. އެ ކުންފުންޏަށް އެ މަސައްކަތް ހަވާލުކޮށްފައިވަނީ ޑަބްލިއުއެޗްއޯގެ ލަފާގެ މަތިން ކަމަށް ހެލްތު މިނިސްޓްރީއިން ބުނެފައިވާއިރު އެފަދަ ލަފާއެއް ދީފައިނުވާނެ ކަމަށް ޑަބްލިއުއެޗްއޯއިން ވަނީ ބުނެފަ އެވެ.
ވެންޓިލޭޓަރު މައްސަލަ ހޫނުވެ، އޭރުގެ ހެލްތު މިނިސްޓަރު އަބްދުﷲ އަމީން ވަނީ އިސްތިއުފާ ދެއްވާފަ އެވެ. އޭނާ އިސްތިއުފާ ދެއްވީ މަސައްކަތުން އެކަހެރިވެ ހުންނެވުމަށްފަހު އެވެ. މި މައްސަލާގައި ސަރުކާރަށް އާންމު ރައްޔިތުންނާއި އިދިކޮޅުގެ ފާޑުކިޔުންތައް ވެސް ވަރަށް ބޮޑަށް ވަނީ އަމާޒުވެފަ އެވެ. އިދިކޮޅުން ތުހުމަތު ކުރާ ގޮތުގައި ވެންޓިލޭޓަރު ކޮރަޕްޝަންގައި މުޅި ސަރުކާރު ވަނީ ޝާމިލުވެފަ އެވެ.
