އަންނަ މަހުގެ ފަހުކޮޅު، ސްޕެއިނުގެ ކެނޭރިއާ އައިލެންޑުގެ ގަލްދާރުގައި ކުރިއަށްދާ އައިބީސީ ޓުއާ، ގްރޭން ކެނޭރިއާގެ ފްރޮންޓޯން ކިންގް މުބާރާތުގެ ޖޫނިއާ މެންސް އިވެންޓަށް ރާއްޖޭގެ ހުނަރުވެރި ބޮޑީބޯޑަރު، އިޔަން އަހުމަދު ކޮލިފައިވެއްޖެ އެވެ.
އަންނަ މަހުގެ 17-31 އަށް ކުރިއަށްދާ އައިބީސީ ޓޫއާ، ގްރޭން ކެނޭރިއާ ފްރޮންޓޯން ކިންގްގެ ޖޫނިއާ މެންސް ކެޓަގަރީ އަށް ކޮލިފައިވި، ޖޫނިއާ މެންސް ކެޓަގަރީގެ ބޮޑީބޯޑަރުންގެ ލިސްޓު، އައިބީސީން ވަނީ އާންމުކޮށްފަ އެވެ. ލިސްޓުގެ 10 ވަނައިގައި އޮތީ ގައުމީ ބޮޑީބޯޑިން ޓީމުގައި ހިމެނޭ އިޔަން އެވެ.
އިޔަން ވަނީ މިދިޔަ އޮގަސްޓް މަހު، ކ. ތުލުސްދޫގައި ކުރިއަށްދިޔަ އައިބީސީ ޓުއާ، މޯލްޑިވްސް ޕްރޯ 2026 ގެ ޖޫނިއާ މެންސް ރައިސިން ސީރީސް އިވެންޓްގެ ޗެމްޕިއަންކަން ހޯދައިފަ އެވެ. އޭޝިއާގެ ސަރަަހައްދުގެ އެތުލީޓުންނަށް ހާއްސަކުރި ޖޫނިއާ އިވެންޓުގައި ވާދަކުރީ ހަމައެކަނި ރާއްޖޭގެ ތިން އެތުލީޓުންނެވެ. އެއީ، އިޔަންގެ އިތުރުން، ނޫހު މުހައްމަދު ދުނައިމް އިރުޝާދު އަދި ދާއިން އަބްދުލް ފައްތާހު އެވެ.
ތުލުސްދޫގެ މަޝްހޫރު ސާފް ޕޮއިންޓް، "ކޯކްސް" ރާޅުގަނޑުގައި ކުރިއަށްދިޔަ ފައިނަލް ހީޓުގައި، މިދިޔަ އަހަރުގެ ޖޫނިއާ ލީގުގެ ޗެމްޕިއަންކަން ހޯދި އިޔަން ކާމިޔާބުކުރީ، 0.15 ޕޮއިންޓުގެ ފަރަގަކުންނެވެ. އިޔަންގެ އެންމެ ރަނގަޅު ދެ ރާޅުގެ ސްކޯ، 7.0 އާއި 6.90 އާ އެކު، ޖުމްލަ ޕޮއިންޓުގެ އަދަދަކީ، 13.90 އެވެ. އިޔަންގެ މައްޗަށް މި ފަހަރުގެ ބުރުނު ޝިކާރު ބޮޑީބޯޑިން ޗެލެންޖުގެ ޖޫނިއާ ބައިގެ ޗެމްޕިއަންކަން ހޯދި ނޫހު އަށް ސްކޯކުރެވުނީ، 13.75 ޕޮއިންޓެވެ. ނޫހުގެ އެންމެ ރަނގަޅު ދެ ރާޅުގެ ސްކޯ އަކީ، 6.25 އާއި 7.50 ޕޮއިންޓެވެ.
މިދިޔަ އަހަރުގެ ގައުމީ ބޮޑީބޯޑިން ލީގުގެ ޖޫނިއާ ޗެމްޕިއަން، އިޔަން ވަނީ، މި އަހަރުގެ ފެބްރުއަރީ މަހު، މޮރޮކޯ ވޯލްޑް ބޮޑީބޯޑް ޗެމްޕިއަންޝިޕުގެ ޖޫނިއާ ބައިގައި ދެ ވަނަ ބުރުގައި ވާދަކޮށްފަ އެވެ. އެ ގޮތުން، އެއް ވަނަ ބުރުގެ ހީޓު 8ގައި ވާދަކޮށް އިޔަން ވަނީ ދެ ވަނަ އަށް ގޮސްފަ އެވެ. އެއް ވަނަ އަށް ދިޔަ ފްރާންސްގެ ޔޯހަން ބަޗެލާޑަށް 9.75 ޕޮއިންޓް ލިބުނުއިރު، ދެ ވަަނަ ހޯދި އިޔަން އަށް ވަނީ 5.45 ޕޮއިންޓް ލިބިފަ އެވެ. ތިން ވަނަ އަށް ދިޔަ މޮރޮކޯގެ ހާޖީ ޔާސީން އަށް 3.25 ޕޮއިންޓް އަދި ފުލުން ނިންމި، ނާނީ އާދަމް އަށް ލިބުނީ 1 ޕޮއިންޓެވެ. ދެ ވަނަ ބުރުގައި އިޔަން ދިޔައީ ވާދަކުރި ހީޓުގެ ތިން ވަނަ އެވެ. އެއް ވަނަ އަށް ދިޔަ ފްރާންސްގެ ލޫކާ ޒަނިނޮއްޓޯ އަށް 15.65 ޕޮއިންޓް ލިބުނުއިރު، ދެ ވަަނަ ހޯދި އެމެރިކާގެ ޑޭވީ އެންޑަސަން އަށް ވަނީ 10.35 ޕޮއިންޓް ލިބިފަ އެވެ. ލޫކާ އަކީ މިދިޔަ އަހަރުގެ މޮރޮކޯ އިވެންޓްގެ ޖޫނިއާ އެއް ވަނަ އެވެ.
