ނިއު ޒީލެންޑާ ދެކޮޅަށް ކުޅޭ މެޗަށް ނެގި ސްކޮޑުގައި ހިމެނުމުންނާއި ކްލަބުން އަނބުރާ ކުޅުންތެރިން ގެންދަން ނިންމުމުގެ އިތުރުން އަނިޔާގެ މައްސަލަތަކާ ހެދި މިހާރު ކުރިއަށްދާ ޓެކްނޯ ސާފް ޗެމްޕިއަންޝިޕް 2026 ގައި ވާދަކުރާ އިންޑިއާ ފުޓްބޯޅަ ޓީމަށް ދެރަ ހާލަތެއް ކުރިމަތިވެއްޖެ އެވެ.
ފީފާ ބްރޭކުގެ ކުރިން ސާފް ޗެމްޕިއަންޝިޕް ފަށާތީ އާއި އިންޑިއާގެ ސީނިއާ ޓީމު މި މަހު ނިއު ޒީލެންޑާ ދެކޮޅަށް ކުޅޭ ދެ މެޗަށް އެ ގައުމަށް ދާތީވެ، އިންޑިއާ އިން ސާފް ޗެމްޕިއަންޝިޕަށް ފޮނުވީ ދެ ވަނަ ފަންތީގެ ޓީމެކެވެ. ތޭވީސް އަހަރުގެ ކުޅުންތެރިން ވެސް ގިނައިން ހިމެނޭ ގޮތަށް އިންޑިއާ އިން މި ފަހަރުގެ ސާފް ޗެމްޕިއަންޝިޕަށް ސްކޮޑު އެކުލަވާލިއިރު، ގައުމީ ޓީމާ އެކު މުބާރާތެއްގައި ފުރަތަމަ ފަހަރަށް ކުޅޭ ކުޅުންތެރިން ވެސް ހިމެނެ އެވެ.
އެ ހާލަތުގައި ނުކުމެ ވެސް އިންޑިއާ އިން ވަނީ 3-2 އިން ޕާކިސްތާން ބަލިކޮށް، މުބާރާތުގެ ސެމީ ފައިނަލްގެ ފުރުސަތު ބޮޑުކޮށްފަ އެވެ. އެކަމަކު، އޭގެ ފަހުން، އަނެއްކާ ވެސް އިންޑިއާ އަށް މި ވަނީ އިތުރު ކަންތައްތަކެއް ދިމާވެ، ސާފް ޗެމްޕިއަންޝިޕްްގައި ކުޅޭ ޓީމަށް އިތުރު ނިކަމެތިކަމެއް ލިބިފަ އެވެ.
އިންޑިއާ އިން މި މަހު 12 އާއި 15 ވަނަ ދުވަހު ނިއު ޒީލެންޑާ ކުޅޭ މެޗަށް ނެގި ސްކޮޑުގައި ސާފް ޗެމްޕިއަންޝިޕްގައި ކުޅޭ ޓީމުގެ ތިން ކުޅުންތެރިއަކު ވަނީ ހިމަނައިފަ އެވެ. އެއީ، ޕާކިސްތާނާ ދެކޮޅަށް އިންޑިއާގެ ކެޕްޓަންކަން ކުރި ބިޖޯއި ވަރްގީސް އާއި އެ މެޗުގައި ދެ ގޯލު ޖެހި މުހައްމަދު ސުހައިލް އަދި ފަހުން ސާފް ސްކޮޑާ ގުޅެން ނިންމާފައި އޮތް ލިސްޓަން ކޮލާސޯ އެވެ. އޭގެ އިތުރުން، ސާފް ސްކޮޑުގައި ހިމެނި ޓޮމްބާ ސިންގް އަށް ވެސް ނުކުޅެވޭނެ އެވެ.
މި މައްސަލަތައް މިހެން އޮއްވައި، އަނިޔާއާ ހެދި ބެންގަލޫރުގެ ސުރޭޝް ސިންގް އާއި ރޮނީ ކަރްބުޑޯން އަށް ސާފްގައި ނުކުޅެވޭނެކަން ވަނީ ޔަގީންވެފަ އެވެ.
އޭގެ ފަހުން، މުމްބައި ސިޓީ އަށް ކުޅޭ ފާރޫކް ޗޯދުރީ އާއި ނައުފަލް ޕީއެން އަދި ވަލްޕުއިއާ، ސާފް ޗެމްޕިއަންޝިޕްގެ ސްކޮޑުގައި ތިއްބައި އަލުން އަނބުރާ ކްލަބަށް ގެންނަން ވަނީ ނިންމައިފަ އެވެ. އިންޑިއާގެ މީޑިއާ ރިޕޯޓްތައް ބުނާގޮތުން، އިންޓަނޭޝަނަލް ބްރޭކްގައި މި ތިން ކުޅުންތެރިން ކްލަބާ އެކު ތިބޭނެކަން ކުރިން ވެސް އިންޑިއާ ފުޓްބޯޅަ ފެޑެރޭޝަން އަށް މުމްބައި ސިޓީން އޮތީ އަންގައިފަ އެވެ.
މިއާ އެކު، މިހާ ގިނަ ކުޅުންތެރިން އިންޑިއާގެ ސްކޮޑުން ބާކީވުމާ އެކު، ބުދަ ދުވަހު، ރާއްޖެއާ ދެކޮޅަށް ކުޅޭ ގްރޫޕް ސްޓޭޖުގެ ފަހު މެޗުގައި، އިންޑިއާ އިން ކުޅޭނީ ގިނަ އަދަދެއްގެ ކުޅުންތެރިން ނެތި އެވެ. ސާފް ޗެމްޕިއަންޝިޕަށް އިންޑިއާ އިން ރަޖިސްޓްރީ ކުރި 28 ކުޅުންތެރިންގެ ސްކޮޑުގެ ތެރެއިން، 12 ވަރަކަށް ކުޅުންތެރިން އެ މެޗުގައި ނުފެނުމުގެ ފުރުސަތު ބޮޑެވެ.
