ކ. ތުލުސްދޫގައި މިހާރު ކުރިއަށްދާ އިންޓަނޭޝަނަލް ބޮޑީބޯޑިން ކޯޕަރޭޝަން (އައިބީސީ)ގެ ވޯލްޑް ޓުއާ އިވެންޓެއް ކަމަށްވާ މޯލްޑިވްސް ޕްރޯ 2026 ގެ ރައިސިން ސީރީސް އިވެންޓްގެ ސެމީ ފައިނަލުން ގައުމީ ބޮޑީބޯޑިން ޓީމުގެ އަލީ ހުޝްރުވާން (ކުޑަ އައްޔަ) އާއި އާމިން އުމަރު މޫސާ ޖާގަ ހޯދައިފި އެވެ.
އިއްޔެ ބާއްވަން މަސައްކަތް ކުރި ކުއާޓާ ފައިނަލްގެ ހީޓުތައް ކުރިއަށްގެންދަން ޖެހުނީ މޫސުމާއި ރާޅުގެ ކަންކަމަށް ބެލުމަށް ފަހު މިއަދު އެވެ.
މި ފަހަރުގެ މޯލްޑިވްސް ޕްރޯ އިވެންޓް، މި މަހު 12 ވަނަ ދުވަހު ފެށިއިރު، މިއީ، ރާޅުގަނޑު ނޫން ސަރަަހެއްދެއްގައި މި މުބާރާތް ކުރިއަށްދާ ފުރަތަމަ ފަހަރެވެ. މި ފަހަރުގެ އިވެންޓްގަައި، ފިރިހެން ރައިސިން ސީރީސް ޑިވިޝަން، އަންހެން ޕްރައިމް ސީރީސް ޑިވިޝަން، ފިރިހެން ޖޫނިއާގެ ރައިސިން ސީރީސް ޑިވިޝަން ކުރިއަށް ދެ އެވެ.
ތުލުސްދޫގެ މަޝްހޫރު ސާފް ޕޮއިންޓް، "ކޯކްސް" ރާޅުގަނޑުގައި ކުރިއަށްދާ މޯލްޑިވްސް ޕްރޯ މި ފަހަރުގެ މުބާރާތުގެ، ރައިސިން ސީރީސްގެ ކުއާޓާ ފައިނަލުން ރާއްޖޭގެ ހަތަރު އެތުލީޓުން ވާދަކުރި އެެވެ. އެ ގޮތުން، ކުއާޓާ ފައިނަލުގެ ފުރަތަމަ ހީޓުގައި ކުޑަ އައްޔަ ވާދަކުރީ ރާއްޖޭގެ އަރަމުން އަންނަ ބޮޑީބޯޑަރު، ނޫހު މުހައްމަދު ދުނައިމް އިރުޝާދްއާ އެެވެ. މި ހީޓުގައި ކުޑަ އައްޔަ، 14.50 ޕޮއިންޓް ސްކޯކުރީ އެންމެ ރަނގަޅު ދެ ރާޅުން، 7.00 އާއި 7.50 ޕޮއިންޓް ހޯދައިގެންނެވެ. ނޫހުގެ އެންމެ ރަނގަޅު ދެ ރާޅަށް ލިބުނީ، 6.50 އާއި 7.10 އާ އެކު ޖުމްލަ، 13.60 ޕޮއިންޓެވެ.
ހީޓު ތިނެއްގައި ރާއްޖޭގެ އެންމެ ފަހުގެ ގައުމީ ބަނޑުފިލާ ޗެލެންޖުގެ ޗެމްޕިއަން، އަޝްރަފް ހަސަން ވާދަކުރީ ކެނަރީ އައިލެންޑްގެ އާރްމީޑޭ ސޮލިވެރެސްއާ އެވެ. މި ހީޓުގައި، އަޝްރަފް ބަލިވީ 0.2 ޕޮއިންޓުގެ ފަރަގަކުންނެވެ. އާރްމީޑޭ ވަނީ އެންމެ ރަނގަޅު ދެ ރާޅުން، 6.75 އާއި 7.10 ހޯދައި، ޖުމްލަ އެކު، 13.85 ޕޮއިންޓް ހޯދައިފަ އެވެ. އަޝްރަފްގެ ސްކޯ އަކީ، 13.65 ޕޮއިންޓެވެ. އެއީ، އޭނާގެ އެންމެ ރަނގަޅު ދެ ރާޅުގައި، 7.50 އާއި 6.15 ޕޮއިންޓް ސްކޯކޮށްގެންނެވެ.
ހީޓު ހަތަރެއްގައި، ރާއްޖޭގެ ގައުމީ ބޮޑީބޯޑިން ލީގުގެ އެންމެ ފަހުގެ ޗެމްޕިއަން، އާމިން ނުކުތީ ފްރާންސްގެ ހޫގޯ ނައުޑޭއާ ދެކޮޅަށެވެ. އާމިން ހީޓު ކާމިޔާބުކުރީ، 0.25 ޕޮއިންޓުންނެވެ. އާމިން އަށް ޖުމްލަ 13.25 ޕޮއިންޓް ލިބުނީ އެންމެ ރަނގަޅު ދެ ރާޅުން، 6.0 އާއި 7.25 ޕޮއިންޓް ހޯދައިގެންނެވެ. އަދި، ހޫގޯ ވަނީ އެންމެ ރަނގަޅު ދެ ރާޅުގެ ޖުމްލަ އެއްކޮށް 13.0 ޕޮއިންޓް ހަމަކޮށްފަ އެެވެ. އެއީ، ރަނގަޅު ދެ ރާޅުގެ ސްކޯ އަށް ބަލާއިރު، 5.50 އާއި 7.50 ޕޮއިންޓެވެ.
ރައިސިން ސީރީސްގެ ސެމީ ފައިނަލް ހީޓުތަކާއި ފައިނަލް ހީޓު އޮތީ މާދަމާ އެވެ. ސެމީ ފައިނަލްގެ ފުރަތަމަ ހީޓުގައި، ކުޑަ އައްޔަ ނުކުންނާނީ، ދުނިޔޭގެ ވަރުގަދަ ބޮޑީބޯޑަރެއް ކަމަށްވާ ފްރާންސްގެ ޕިއޭރް ލުއިސް ކޮސްޓެސްއާ ދެކޮޅަށެވެ. އަދި، ސެމީ ފައިނަލްގެ ދެ ވަނަ ހީޓުގައި، އާމިން ވާދަކުރާނީ، އަޝްރަފް ކައިރިން ކުރިހޯދި އާރްމީޑޭއާ ދެކޮޅަށެެވެ.
