ގައުމީ ބޮޑީބޯޑިން ލީގުގެ ފުރަތަމަ މުބާރާތް ކަމަށްވާ "ބުރުނު ޝިކާރު ބޮޑީބޯޑިން ޗެލެންޖް 2026" ގެ ޑްރޮޕްނީ ކެޓަގަރީ ކާމިޔާބުކޮށް، ރާއްޖޭގައި އުފެދުނު އެންމެ ކުޅަދާނަ ބޮޑީބޯޑަރު، އަލީ ހުޝްރުވާން އަހުމަދު (ކުޑަ އައްޔަ)، މި ކެޓަގަރީގައި އޭނާގެ ފުރިހަމަ ރެކޯޑް ދަމަހައްޓައިފި އެވެ.
މޯލްޑިވްސް ބޮޑީބޯޑިން އެސޯސިއޭޝަން (އެމްބީބީއޭ) އިން 2022 ވަނަ އަހަރު ޑްރޮޕްނީ ޑިވިޝަން ފެށި ފަހުން، ހުރިހާ މުބާރާތެއްގެ މި ޑިވިޝަންގެ ޗެމްޕިއަންކަން ހޯދަމުން އަންނަނީ ކުޑަ އައްޔަ އެވެ.
އެ ގޮތުން، ކުޑަ އައްޔަ ވަނީ، ޑްރޮޕްނީގެ 11 ޓައިޓަލް ހޯދައިފަ އެވެ. މީގެ އިތުރުން، ކުޑަ އައްޔަ ވަނީ މާލޭގައި ކުރިއަށްދިޔަ އައިބީސީ ވިޒިޓް މޯލްޑިވްސް ޕްރޯ 2022 މުބާރާތުގެ ޑްރޮޕްނީ ޑިވިޝަނުގެ ސެމީ ފައިނަލުގައި ވާދަކޮށް، ދުނިޔޭގެ ރޭންކިންގެ 12 ވަނަ އަށް އެ ފަހަރު ޖެހިލައިފަ އެވެ.
ޑްރޮޕް-ނީ ޑިވިޝަންގައި ކުޑަ އައްޔަ ދުނިޔޭގެ 12 ވަނަ އަށް
އިންޓަނޭޝަނަލް ބޮޑީބޯޑިން ކޯޕަރޭޝަން (އައިބީސީ)ގެ ދުނިޔޭގެ ރޭންކިންގައި ޑްރޮޕް-ނީ ކެޓަގަރީގެ މި އަހަރު 12 ވަނަ ބޮޑީބޯޑަރުގެ މަގާމު ރާއްޖޭގެ އެއް ވަނަ ބޮޑީބޯޑަރު އަލީ ހުޝްރުވާން (ކުޑަ އައްޔަ) އަށް ވަނީ ލިބިފައި.
މި ފަހަރުގެ ބުރުނު ޝިކާރު ބޮޑީބޯޑިން ޗެލެންޖުގެ ޑްރޮޕްނީ ފައިނަލުގައި ކުޑަ އައްޔަ ނުކުތީ، މިދިޔަ އަހަރުގެ ގައުމީ ބޮޑީބޯޑިން ލީގުގެ ޗެމްޕިއަން އަދި މި ފަހަރުގެ ބުރުނު ޝިކާރުގެ މެންސް އޯޕަން ޓައިޓަލް ހޯދި، އާމިން އުމަރު މޫސާއާ ދެކޮޅަށެވެ.
ފައިނަލުގައި ކުޑަ އައްޔަގެ ސްކޯ އަކީ، 13.67 ޕޮއިންޓެވެ. ޖުމްލަ އެކު، ކުޑަ އައްޔަ ހަތް ރާޅު އެޅިއިރު، އެންމެ ރަނގަޅު ދެ ރާޅަށް ލިބުނު ސްކޯ އިން އޭނާ ވަނީ، 8.00 އާއި 5.67 ޕޮއިންޓް ހޯދައިފަ އެވެ. ކުޑަ އައްޔަ ފައިނަލުން މޮޅުވީ، 8.63 ޕޮއިންޓުގެ ފަރަގަކުންނެވެ. އާމިން އަށް ސްކޯކުރެވުނީ 5.04 ޕޮއިންޓެވެ. އާމިން ވެސް ހަތް ރާޅު އެޅިއިރު، އެންމެ ރަނގަޅު ދެ ރާޅަށް ލިބުނީ، 2.67 އާއި 2.37 ޕޮއިންޓެވެ.
ޑްރޮޕްނީ ޑިވިޝަނުގައި މި ފަހަރު ކުޑަ އައްޔަ ވަނީ އެވްރެޖްކޮށް ވާދަކުރި ކޮންމެ ހީޓެއްގައި ނުވަ ޕޮއިންޓް ސްކޯކޮށްފަ އެވެ. އޭނާގެ ސްކޯރިން އެންމެ ރަނގަޅީ ފައިނަލް ހީޓުގަ އެވެ. ކުޑަ އައްޔަ އާއި އާމިން ވަނީ ފައިނަލުގެ ކުރިން ކުއާާޓާ ފައިނަލުގެ ހީޓު އެކެއްގައި ވާދަކޮށްފަ އެވެ. ކުޑަ އައްޔަ، އެ ހީޓުގެ އެއް ވަނަ ހޯދީ 9.20 ޕޮއިންޓުންނެވެ. އާމިން އަށް ދެ ވަނަ ލިބުނީ 4.33 ޕޮއިންޓާ އެކު އެެވެ. މި ހީޓުގެ ފުލަށް ދިޔައީ، މި ފަހަރުގެ ބުރުނު ޝިކާރުގެ ޖޫނިއާ ޗެމްޕިއަން، ނޫހް މުހައްމަދު ދުނައިމް އިރުޝާދު އެވެ. ނޫހް ވަނީ 3.70 ޕޮއިންޓް ސްކޯކޮށްފަ އެވެ.
މި ފަހަރުގެ ބުރުނު ޝިކާރު ބޮޑީބޯޑިން ޗެލެންޖުގައި ކުޑަ އައްޔަ، މެންސް އޯޕަން ޑިވިޝަނުން ކެޓީ ސެމީ ފައިނަލުންނެވެ. އެއީ، މުބާރާތުގެ ރަނަރަޕަށް ދިޔަ، އަސްވާން މުހައްމަދު (ދޫނި) އަތުން ބަލިވުމުންނެވެ. އަސްވާން، މި ސެމީން މޮޅުވީ 0.9 ޕޮއިންޓުގެ ފަރަގަކުންނެވެ. އަސްވާން، 11.50 ޕޮއިންޓް ސްކޯކުރިއިރު، ކުޑަ އައްޔަގެ ސްކޯ އަކީ، 10.60 ޕޮއިންޓެވެ.
