ރާއްޖޭގެ ބޮޑީބޯޑިން ތާރީހުގައި ބޭއްވި ފުރަތަމަ ޖޫނިއާ ބޮޑީބޯޑިން އިވެންޓުގެ ޗެމްޕިއަންކަން، ބުރުނު ޝިކާރު ބޮޑީބޯޑިން ޗެލެންޖު 2026 ގެ ޖޫނިއާ ޑިވިޝަނުގައި ހޯދައި، ހުނަރުވެރި ޒުވާން ބޯޑީބޯޑަރު، ޒޯހާ އަޒްލީ، މޫދު ކުޅިވަރުގެ ތާރީހުން ހާއްސަ ޖާގައެއް ހޯދައިފި އެވެ.
ރާއްޖޭގެ ބޮޑީބޯޑިންގެ ބެލެނިވެރިފަރާތް، މޯލްޑިވްސް ބޮޑީބޯޑިން އެސޯސިއޭޝަން (އެމްބީބީއޭ) އިން މި ފަަހަރުގެ ބުރުނު ޝިކާރު ޗެލެންޖުގައި އެންމެ ހާއްސަ އެއް ކަމެއްގެ ގޮތުގައި ކޮށްފައިވާ ކަމަކީ، ޖޫނިއާ އަންހެން ޑިވިޝަނެއް އިތުުރުކުރުމެވެ. ޖޫނިއާ ވިމެންސް ޑިވިޝަން ތައާރަފްކުރުމާ އެކު ލިބިގެންދިޔަ ތަރުހީބު ވެސް ބޮޑެވެ. މި ޑިވިޝަނުގައި ޖުމްލަ އެކު، 10 އެތުލީޓުން ވާދަކުރި އެވެ. މިއީ، ބޮޑީބޯޑިންގެ އަންހެން ޑިވިޝަނުގެ މުސްތަގުބަލަށް ބަލާއިރު، ބޮޑު ހިތްހަމަޖެހުމެކެވެ.
އިއްޔެ ކުރިއަށްދިޔަ މުބާރާތުގެ ފަހު ހީޓުތަކުގެ ތެރެއިން އެންމެ ގިނަ ބަޔެއްގެ ސަމާލުކަން ހުއްޓުނު އެއް އިވެންޓަކީ، ޖޫނިއާ އަންހެން ޑިވިޝަނުގެ ފައިނަލެވެ. ޒޯހާ ވަނީ 5.57 ޕޮއިންޓުގެ ފަރަގުން މި ޑިިވިޝަންގެ ޗެމްޕިއަންކަން ހޯދައިފަ އެވެ. ޖުމްލަ އެކު، ޒޯހާ ވަނީ ހަތް ރާޅުއަޅައި، އެންމެ ރަނގަޅު ދެ ރާޅުގެ ޕޮއިންޓްތައް ކަމަށްވާ 6.17 އާއި 5.57 ޕޮއިންޓުގެ ޖުމްލަ އެއްކޮށްލައިގެން 11.74 ޕޮއިންޓް ސްކޯކޮށްފަ އެވެ. އޭނާއާ އެކު ފައިނަލުގައި ވާދަކުރި ޒާހާ ޒައިދުލް ހަލީލް އަށް ލިބުނީ 6.17 ޕޮއިންޓެވެ. ޒާހާ، ހަތަރު ރާޅު އެޅިއިރު، އެންމެ ރަނގަޅު ދެ ރާޅުގެ ޖުމްލައާ އެކު، އޭނާ އަށް ވަނީ 6.17 ޕޮއިންޓް ލިބިފަ އެވެ.
ޒޯހާ، މި ފަހަރުގެ މުބާރާތުގައި އެންމެ ރަނގަޅު ސްކޯއެއް ހެދީ، ތިން ވަނަ ބުރުގައި ވާދަކުރިއިރު އެވެ. އެ ހީޓުގައި އޭނާ ވަނީ ޖުމްލަ އެކު، 12.16 ޕޮއިންޓް ސްކޯކޮށްފަ އެވެ. އެއީ، އެންމެ ރަނގަޅު ދެ ރާޅަށް ބަލާއިރު، 5.33 އާއި 6.83 ޕޮއިންޓެވެ.
ތާރީހީ ކާމިޔާބެއް ހޯދުމަށް ފަހު، ޒޯހާ ބުނެފައިވަނީ ބޭނުންވަނީ މުސްތަގުބަލުގައި އިތުރު ކާމިޔާބީތައް ހޯދުމަށް ކަމަށާއި އާއިލާގެ އެކި މީހުންނަކީ ރާޅާއަޅާ މީހުން ކަމަށާއި އެ މީހުންނެކޭ އެއްގޮތަށް ކުރިއަށްދިއުމަށް ކަމަށެވެ.
ބުރުނު ޝިކާރު ބޮޑީބޯޑިން ޗެލެންޖުގެ މެންސް އޯޕަން ކާމިޔާބުކުރީ އާމިން އުމަރު މޫސާ އެވެ. ޖޫނިއާ ފިިރިހެން ޗެމްޕިއަނަކީ، ނޫހް މުހައްމަދު ދުނައިމް އިރުޝާދު އެވެ. އަދި، ޑްރޮޕްނީގެ ޗެމްޕިއަންކަން ހޯދީ އެ ޑިވިޝަނުގައި އަބަދުވެސް ކާމިޔާބީ ތަކުރާރުކުރަމުން އަންނަ ރާއްޖޭގައި އުފެދުނު އެންމެ މޮޅު ބޮޑީބޯޑަރު، އަލީ ހުޝްރުވާން އަހުމަދު (ކުޑަ އައްޔަ) އެވެ.
