ގަލްފުގެ ގައުމުތަކުގައި ގާއިމުކޮށްފައިވާ އެމެރިކާގެ އަސްކަރީ މަރުކަޒުތަކަށް އަމާޒުކޮށް އިރާނުން ދެމުން އަންނަ ރައްދު ހަމަލާތަކާ ގުޅިގެން އެ ގައުމުތަކަށް ގުޅައި ރާއްޖެ އެ ގައުމުތަކާއެކު އޮތްކަން ހާމަކުރަމުން ދަނީ ދިވެހި ރައްޔިތުންގެ ފަރާތުން ކަމަށް ރައީސް މުހައްމަދު މުއިއްޒު ވިދާޅުވެއްޖެ އެވެ.

ޖުމުލަ 304 ދުވަސް ފަހުން ރައީސް އޮފީހުގައި މުއިއްޒު ބޭއްވި ނޫސްވެރިންގެ ބައްދަލުވުމެއްގައި ގިނަ އަދަދެއްގެ ސުވާލުތައް ނޫސްވެރިން އަމާޒުކުރީ އިރާނަށް އެމެރިކާ އާއި އިޒްރޭލުން ދެމުންދާ ހަމަލާތަކާ ގުޅޭގޮތުންނެވެ.

އިރާނުން ދޭ ހަމަލާތައް މުއިއްޒު ކުށްވެރި ކުރެއްވިއިރު އެ ގައުމުން ރައްދު ހަމަލާތައް އަމާޒުކުރަމުން ދަނީ ގަލްފުގެ ގައުމުތަކުގައި ގާއިމުކޮށްފައިވާ އެމެރިކާގެ އަސްކަރީ މަރުކަޒުތަކަށެވެ. އިރާނަށް ހަމަލާދިނުމަށް އިޒްރޭލާއި އެމެރިކާއިން ބޭނުން ކުރަމުން އަންނަނީ އެ ބޭސްތަކެވެ.

އަރަބި އިސްލާމީ ގައުމުތަކުގެ ވެރިންނަށް ގުޅައި އެ ގައުމުތަކާއެކު ދިވެހި ރައްޔިތުން ތިބިކަން ހާމަކުރާނެ ކަމަށް މުއިއްޒު މިއަދު ވިދާޅުވި އެވެ. އިރާނުން ދޭ ހަމަލާތަކުގައި ބޮޑެތި ގެއްލުންތަކެއް ލިބެމުންދާ ކަމަށް ވެސް މުއިއްޒު ވިދާޅުވި އެވެ.

އެއާއެކު ޗެނަލް 13ގެ ނޫސްވެރިޔަކު ސުވާލުކުރީ ދިވެހި ރައްޔިތުންގެ ފަރާތުން އެކަމުގައި ވަކި ސްޓޭންޑެއް މުއިއްޒު ނެންގެވީ ކީއްވެގެންތޯ ސުވާލު ކުރުމަށެވެ. އެއީ ގިނަ އަދަދެއްގެ ދިވެހިން މިވަގުތު ހިނގަމުންދާ ހަނގުރާމައިގައި އިރާނާއެކު ތިބިކަން ހާމަކުރަމުންދާތީ އެވެ.

"އަޅުގަނޑު ރައްޔިތުން ހޮވާފައި ހުރި މީހެއް ވީމައި އަޅުގަނޑަށް ރައްޔިތުންގެ ސްޓޭންޑު ނެގޭނެ ނޫންތޯ. މުޅި ގައުމުގެ ހުރިހާ ރައްޔިތުން ވޯޓު ދިނީ. ދެން މެޖޯރިޓީ ރައްޔިތުންގެ ވޯޓު ލިބިގެން އަންނަނީ މަގާމަށް. ދެން ހުރިހާ ރައްޔިތުންގެ ފަރާތުންނު އަޅުގަނޑު ވާހަކަ ދައްކާނީ،" މުއިއްޒު ޖަވާބު ދެއްވި އެވެ.

މުއިއްޒު އެގޮތަށް ޖަވާބު ދެއްވުމުން ނޫސްވެރިޔާ ވަނީ އެކި ކަންކަމުގައި ރައްޔިތުން ޖެހޭ ފަޅި ތަފާތުވެދާނެ ކަމަށް މުއިއްޒުގެ އަރިހުގައި ދަންނަވާފަ އެވެ. އެކަމަކު މުއިއްޒު ވިދާޅުވީ "ތަފާތެއް ނުވާނެ" ކަމަށެވެ.

އެއަށްފަހު އިރާނުން ދޭ ހަމަލާތައް ގޯސް ކަމަށާއި އިޒްްރޭލަކީ ޓެރަރިސްޓު ގައުމެއް ކަމަށް މުއިއްޒު ވިދާޅުވި އެވެ. އަދި އެމެރިކާއިން ދޭ ހަމަލާތައް ވެސް ގޯސްކަމަށް މުއިއްޒު ފާހަގަކުރެއްވި އެވެ.

އިރާނުން ވަނީ ގަލްފުގެ ގައުމުތަކަށް ހަމަލާ އަމާޒުނުކުރާނެ ކަމުގެ ޔަގީންކަން ދީފަ އެވެ. ބޭސްތަކަށް ދެމުންދާ ހަމަލާތައް ހުއްޓުވުމުގައި ބައެއް ފަހަރު މިސައިލްތަކުގެ ބައިބައި އާންމުން އުޅޭ ސަރަހައްދުތަކަށް ވެއްޓި އެކި ވަރުގެ ގެއްލުން އަންނަނީ ވަމުންނެވެ.

އިޒްރޭލާއި އެމެރިކާއިން އިރާނަށް ހޮނިހިރު ދިން ހަމަލާތަކުގައި އެ ގައުމުގެ ރޫހާނީ ލީޑަރު އާޔަތުﷲ އަލީ ޚާމަނާއީ، 86، އަވަހާރަކޮށްލުމުން ދިވެހި ސަރުކާރުން ތައުޒިޔާ ނުކިޔާތީ އާންމުން އަންނަނީ ނުރުހުން ފާޅުކުރަމުންނެވެ.

ޚާމަނާއީއަކީ އިރާނުގެ އެންމެ މަތީ ވެރިޔާ އެވެ. އާންމު އުސޫލެއްގެ ގޮތުން އިސްލާމީ ގައުމެއްގެ މަތީ ވެރިޔަކު އަވަހާރަވުމުން ރަސްމީ ގޮތުން ދިވެހި ސަރުކާރުން ތައުޒިޔާގެ މެސެޖު ފޮނުވަ އެވެ. އަދި އެކަން ހާމަކުރެ އެވެ.

އެކި ދައުލަތްތަކުގެ މަތީ ވެރިން އަވަހާރަވުމުން ތިން ދުވަސް ވަންދެން ދިވެހި ދިދަ ބައިދަނޑިއަށް ތިރިކުރުމަށް ވެސް މީގެ ކުރިން ސަރުކާރުތަކުން އަންގާފައިވެ އެވެ. މުއިއްޒުގެ ސަރުކާރުން ވެސް މެއި 2024، ގައި އިރާނުގެ ރައީސަކަށް ހުންނެވި އިބްރާހިމް ރައީސީ އަވަހާރަވުމުން އަމަލުކުރީ އެގޮތަށެވެ.

ނަމަވެސް، މިފަހަރު އެގޮތަށް އަމަލުނުކުރީ ކީއްވެގެން ކަމެއް ސަރުކާރަށް ސާފުކޮށްދެވިފައެއް ނުވެ އެވެ. ހަމަލާތަކާ ގުޅިގެން ނެރުނު ބަޔާނުގައި އިސްވެ ހަމަލާދިން އިޒްރޭލާއި އެމެރިކާގެ ނަން ވެސް ދިވެހި ސަރުކާރުން ގެނެސްފައި ނުވެ އެވެ.