ފަނޑިޔާރުގޭގެ އެންމެ މުހިންމު މަގުސަދަކީ ކޯޓުތަކުގައި ލަސްވެފައިވާ މައްސަލަތަކަށް އަވަހަށް އިންސާފު ހޯދައިދިނުން ކަމަށާއި މިވަގުތު ރާއްޖޭގެ ކޯޓުތަކުގައި އެއް އަހަރަށް ވުރެ ގިނަ ދުވަސްވެފައިވާ 13،032 މައްސަލަ ރާއްޖޭގެ ކޯޓުތަކުގެ ބެކްލޮގުގައި ހިމެނޭ ކަމަށް އުއްތަމަ ފަނޑިޔާރު އަބްދުލްޣަނީ މުހައްމަދު ވިދާޅުވެއްޖެ އެވެ.

ޝަރުއީ ދާއިރާގެ އަހަރު ފެށުމުގެ ގޮތުން ރޭ ބޭއްވި ރަސްމިއްޔާތުގައި އުއްތަމަ ފަނޑިޔާރު ދެއްކެވި ވާހަކައިގައި ވަނީ ކޯޓުތަކުން އެންމެ އިސްކަމެއް ދެނީ އަވަހަށް މައްސަލަތައް ނިންމުމަށް ކަމަށް ވިދާޅުވެފަ އެވެ.

"އެންމެ އިސްކަމެއް ދީގެން އަޅުގަނޑު ކުރަން ބޭނުންވާ ކަމަކީ މި ދެންނެވި 13،032 މައްސަލައިގެ އިންސާފު އަވަސްކަމާއެކު ގާއިމުކުރުން. މިކަން ކުރުމަށް އަޅުގަނޑުމެން ކަނޑައަޅާފައި ވަނީ 2026 ވަނަ އަހަރު ކޯޓުތަކުގައި އަލަށް ރަޖިސްޓްރީވާނެ ކަމަށް ލަފާކުރެވޭ 21،000 އަށްވުރެ ގިނަ މައްސަލައިގެ އިންސާފު އަވަސް ކަމާއެކު ފޯރުކޮށްދިނުމުގެ ބުރަ މަސައްކަތް މަޑުޖެހުމެއް ނެތި ކުރިއަށްދާނެ ގޮތަށް،" ފަނޑިޔާރު ޣަނީ ވިދާޅުވި އެވެ.

އެ މަސައްކަތް ކުރުމުގެ ގޮތުން ހާއްސަ ޓާސްކް ފޯހެއް މިއަދު އެކުލަވާލާނެ ކަމަށާއި މައްސަލަތައް ލަސްވެފައިވާ ސަބަބުތައް ސީދާ ފަނޑިޔާރުންގެ އަރިހުން އެ ޓާސްކް ފޯހުން ދެނެގަންނާނެ ކަމަށް އުއްތަމަ ފަނޑިޔާރު ހާމަކުރެއްވި އެވެ.

"މި މަސައްކަތުގެ ތެރެއިން އަޅުގަނޑުމެންގެ އިޖުތިމާއީ ކަންބޮޑުވުމެއް ކަމުގައި ފާހަގަކުރެވޭ ޝަރީއަތް ނިމެންދެން ބަންދުކޮށްފައިވާ މީހުންގެ މައްސަލަތަކަށް ވެސް ހައްލު ލިބިގެންދާނެ،" ފަނޑިޔާރު ޣަނީ ވިދާޅުވި އެވެ.

މި އަހަރު ނިމުމުގެ ކުރިން ބެކްލޮގް ސާފުކުރުމަކީ އަމާޒެއް ކަމަށް ވެސް އުއްތަމަ ފަނޑިޔާރު ވިދާޅުވި އެވެ.