އިދިކޮޅު މޯލްޑިވިއަން ޑިމޮކްރެޓިކް ޕާޓީގެ ވަގުތީ ޗެއާޕާސަނަކު ހޮވަން ބޭއްވި ގައުމީ މަޖިލީހުގެ ބައްދަލުވުމުގައި އެ މަގާމަށް ވާދަކުރި ދިއްދޫ ދާއިރާގެ ރައީސްކަން ކުރައްވާ އަބްދުالله ވަހީދު (ދިއްދޫ ވައްޑޭ) އަށް ބޭނުންވާ ވަރަށް ވޯޓު ލިބިފައިވާ ކަމަށް އެ ބައްދަލުވުމުގެ ރިޔާސަތު ބެލެހެއްޓެވި އެ ޕާޓީގެ ޑެޕިއުޓީ ޗެއާޕާސަން އިބްރާހިމް ވަހީދު (މަދަނަ އިބުރޭ) ވިދާޅުވެއްޖެ އެވެ.
ހުކުރު ދުވަހުގެ ރޭ ބޭއްވި ގައުމީ މަޖިލީހުގެ ބައްދަލުވުން ހޫނުވެ، ނިޒާމު ގެއްލުނު ކަމަށް ބުނެ ޖަލްސާ ހުއްޓާލި އެވެ. ވަގުތީ ޗެއާޕާސަނެއް އިންތިހާބުވި ކަމަށް އިއުލާނެއް ނުކުރެ އެވެ. ބައްދަލުވުން ހޫނުވީ ވަގުތީ ޗެއާއަކު އިންތިހާބު ކުރުމަށް ނެގި ވޯޓާ ގުޅިގެންނެވެ.
އެމްޑީޕީގެ ގައުމީ މަޖިލީހުގެ ބައެއް މެންބަރުން އެ ރޭ ވައްޑޭއަށް މަރުހަބާ ކިއިރު އަނެއް ބައި މެންބަރުން ވަނީ އޭނާއަށް ވޯޓު ހަމަނުވާ ކަމަށް ބުނެފަ އެވެ. އެ މައްސަލާގައި ކަން ހިނގައިދިޔަ ގޮތުގެ ރިޕޯޓެއް އިބުރޭ ވަނީ އެމްޑީޕީގެ ރައީސް އަބްދުالله ޝާހިދަށް ފޮނުވާފަ އެވެ. އެ ރިޕޯޓުގެ ކޮޕީއެއް އަދަދު ނޫހަށް ވަނީ ލިބިފަ އެވެ.
ރައްޔިތުންގެ މަޖިލީހުގެ ކުރީގެ ރައީސް މުހައްމަދު އަސްލަމް އާއި ހަނިމާދޫ ދާއިރާގެ މެންބަރު އަބްދުލްޣަފޫރު މޫސާ އަދި އާއި ދިއްދޫ ވައްޑެގެ ނަން އެ މަގާމަށް ހުށަހެޅުނެވެ. އޭގެ ތެރެއިން ފުރަތަމަ ވޯޓަށް އެހީ ދިއްދޫ ވައްޑޭގެ ނަމަށެވެ.
އިބުރޭ ފޮނުވި ރިޕޯޓުގައިވާ ގޮތުން އެ ރޭ ގައުމީ މަޖިލީހަށް ހާޒިރުވީ 97 މެންބަރުންނެވެ. އޭގެ ތެރެއިން އެއް މެންބަރަކު ވޯޓުގައި ބައިވެރި ނުވެ ޖަލްސާ ދޫކޮށް ވަޑައިގެންނެވި ކަމަށާއި އެހެންވެ އެ މެންބަރާއި ރިޔާސަތު އުނިކުރުމުން ވޯޓުލުމުގެ ހައްގު ލިބިފައި ތިބި 95 މެންބަރުން ތިބި ކަމަށް އެ ރިޕޯޓުގައި ބުނެ އެވެ.
ވޯޓު ގުނުމުގައި އޮޅުންތަކެއް އެރި ކަމަށާއި އަދި އިދާރީ މުވައްޒަފުން ވެސް އެކިފަހަރު އެކި އަދަދު ރިޔާސަތަށް ގެނައި ކަމަށް އެ ރިޕޯޓުގައި ބުނެފައިވެ އެވެ. އެގޮތުން ފުރަތަމަ ގެނައި އަދަދަކީ 32 ކަމަށާއި ދެން ގެނައި އަދަދަކީ 47 ކަމަށް ރިޕޯޓުގައި ބުނެފައިވެ އެވެ.
ބައްދަލުވުން ކުރިއަށްގެންދިޔުމުގެ މާހައުލެއް ނެތިގެން ބައްދަލުވުން މެދުކަނޑާލުމަށް ފަހު އިތުރަށް ބެލިބެލުމުން ދިއްދޫ ވައްޑޭއަށް 49 ވޯޓު ލިބުނު ކަމަށް އިބުރޭގެ ރިޕޯޓުގައި ބުނެފައިވެ އެވެ.
"ނަމަވެސް އެއް މެންބަރަކު ފަހުން ރިޓްރެކްޓް ކުރިކަމަށް ބުނާތީ އެ ވޯޓު އުނިކުރުމުން ދިއްދޫ ދާއިރާގެ ރައީސް އަބްދުالله ވަހީދު ޗެއާޕާސަން ކަމަށް އިންތިހާބު ކުރުމަށް ލިބިފައިވަނީ 48 ވޯޓެވެ. މި ދެންނެވި ރިޓްރެކްޓް ކުރި މެންބަރުގެ ވޯޓާއެކު އެ ވަގުތު ބައްދަލުވުމުގައި ވޯޓު ނުލައްވާ ތިބީ 47 މެންބަރުންނެވެ. އަދި ޖަލްސާގެ ހާޒިރީން އެނގެނީ ޖަލްސާގައި އެ ވަގުތު ވޯޓު ހައްގުވާ މެންބަރުންގެ އަދަދަދކީ 95 ކަމެވެ،" އިބުރޭ ލިޔުއްވާފައިވެ އެވެ.
އެ ވޯޓުގެ ނަތީޖާއިން ވަގުތީ ޗެއާޕާސަންގެ މަގާމަށް ދިއްދޫ ވައްޑޭއަށް ބައްދަލުވުމުގައި ބައިވެރިވި މެންބަރުންގެ އަގުލަބިއްޔަތު ވޯޓު ލިބިފައިވާ ކަމަށް އިބުރޭ ވަނީ ރިޕޯޓުގައި ހިމަނާފަ އެވެ.
"ބައްދަލުވުމުގައި ކަން ހިނގައިދިޔަ ގޮތުގެ ސަބަބުން ވަނީ ހަމަނުޖެހުމަކަށް ގޮސްފަ. އަދި މިިކަމުގައި ހޯދަން ޖެހެނީ ސިޔާސީ ހައްލެއް ކަމުގައި ފެންނާތީ ޕާޓީގެ ރައީސް މިކަމަށް ހައްލެއް ހޯއްދަވައިދެއްވުމަށް އެދި ދެންނެވީމެ،" އިބުރޭގެ ރިޕޯޓުގައި ބުނެފައިވެ އެވެ.
ދިއްދޫ ވައްޑޭ ވަނީ އޭނާގެ ކެންޑިޑެސީ އަނބުރާ ގެންގޮސްފަ އެވެ. އެއީ ޕާޓީގެ އެއްބައިވަންތަކަން ދެމެހެއްޓުމުގެ ބޭނުމުގައި ނިންމި ނިންމުމެއް ކަމަށް ވައްޑޭގެ ސިޓީގައި ބުނެފައިވެ އެވެ.
