ކަނޑައެޅިގެން ގާނޫނާ ހިލާފަށް ކަމެއް ކުރާ ކަމުގެ ހެއްކާއެކު މެނުވީ މުއައްސަސާތަކުގެ މަސްއޫލިއްޔަތްތަކުގެ ތެރެއަށް ކޯޓަކުން ނުވަދެވޭނެ ކަމަށް ސިވިލް ކޯޓުން ކަނޑައަޅައިފި އެވެ.
ކޯޓުން އެގޮތަށް ނިންމީ، ހައި ކޯޓުގެ ފަނޑިޔާރެއްގެ މަގާމަށް ޏ. ފުވައްމުލަކު، ގޯލްޑަންގޭޓް، މުހައްމަދު ޝަހީދު އައްޔަން ކުރުން ހުއްޓުވަން އެދުނު ވަގުތީ އަމުރަށް ގޮތެއް ކަނޑައެޅުމުގެ ތެރޭގަ އެވެ. ކޯޓުން ނިންމީ އެ އަމުރު ނެރެދެވޭނެ ތަނެއް ނެތް ކަމަށެވެ.
އެ މައްސަލައިގައި ގޮތެއް ކަނޑައަޅުއްވަމުން ސިވިލް ކޯޓުގެ އިސް ގާޒީ މަރިޔަމް ވަހީދު ވިދާޅުވެފައި ވަނީ، ފަނޑިޔާރެއްގެ މަގާމަށް ޝަހީދު އައްޔަން ކުރަން ޖުޑީޝަލް ސާވިސް ކޮމިޝަނުން ނިންމާފައި ވަނީ ގާނޫނާ ހިލާފަށް ކަމަށް ބެލެވޭނެ އެއްވެސް ހެއްކެއް މައްސަލަ ހުށަހެޅި ފަރާތުން ކޯޓަށް ހުށަހަޅާފައިނުވާ ކަމަށެވެ.
"ކަނޑައެޅިގެން ގާނޫނީ އިމުން ބޭރުން އަދި އެކަށައެޅިފައިވާ އިޖުރާއަތާ ހިލާފަށް ކަމެއް ކުރާކަމުގެ ސާބިތު ހެއްކާއެކު މެނުވީ ގާނޫނުއަސާސީ އިން ބާރު ލިބިގެން މެންޑޭޓް ކަނޑައެޅިފައިވާ މުއައްސަސާތަކުގެ ގާނޫނީ މަސްއޫލިއްޔަތުގެ ތެރެއަށް ކޯޓުތަކުން ވަނުމަކީ ގާނޫނުއަސާސީ ތަސައްވަރުކޮށްފައި އޮތް ގޮތެއް ނޫން. އަދި އެއީ ދުސްތޫރީ ދައުލަތެއްގައި ގަބޫލު ކުރެވޭނެ އުސޫލެއް ވެސް ނޫން،" ގާޒީ މަރިޔަމް ވިދާޅުވެފައިވެ އެވެ.
އެ މައްސަލަ ހުށަހެޅި ފަރާތުން ބުނެފައި ވަނީ، ޝަހީދުއަކީ ސިޔާސީ ޕާޓީއެއްގެ މެންބަރެއް ކަމަށާއި އޭނާއަކީ ސިޔާސީ މަގާމެއްގައި ހުރި މީހަކަށްވާތީ، ފަނޑިޔާރުކަމުގެ ޝަރުތު ހަމަވާ ކަމަށެވެ. ނަމަވެސް އޭނާއަކީ ސިޔާސީ ޕާޓީއެއްގެ މެންބަރެއް ނޫންކަން އިލެކްޝަންސް ކޮމިޝަނުން އަންގާފައިވާ ކަމަށާއި ފަނޑިޔާރެއްގެ މަގާމަށް ކުރިމަތިލިއިރު، ސިޔާސީ މަގާމެއްގައި ނެތްކަން އެނގޭ ކަމަށް ކޯޓުން ބުންޏެވެ.
އޭގެ އިތުރުން، ފަނޑިޔާރެއްގެ މަގާމަށް ކުރިމަތިލާން ޝަހީދު ހުށަހެޅި އެޕްލިކޭޝަން އަނބުރާ ގެންގޮސްފައިވާތީ އެ މައްސަލައިގައި ކޯޓުން ގޮތެއް ނިންމަންޖެހޭ ހަލާތެއް މިހާރު ނެތް ކަމަށް ވެސް ސިވިލް ކޯޓުން ކަނޑައެޅި އެވެ.
ހައި ކޯޓުގެ ފަނޑިޔާރެއްގެ މަގާމަށް ކުރިމަތިލުމަށްފަހު ޝަހީދު ހުށަހެޅި އެޕްލިކޭޝަން އަނބުރާ ގެންދިޔައީ ފާޑުކިޔުން އަމާޒުވާން ފެށުމުންނެވެ. އޭނާއަކީ ވެރިކަން ހިންގާ ޕީއެންސީގައި މަސައްކަތް ކުރަމުންދިޔަ އަދި ފަނޑިޔާރުގެ މަގާމަށް ކުރިމަތިލުމުގެ ކުރިން ޑެޕިއުޓީ މިނިސްޓަރެއްގެ މަގާމުގައި ހުރި މީހެކެވެ.
