ފުލުހުންގެ ޑެޕިއުޓީ ކޮމިޝަނަރުގެ މަގާމުގައި ހުންނެވި ފަރުހާދު ފިކުރީ އިސްތިއުފާދޭން ރައީސް ޑރ. މުހައްމަދު މުއިއްޒުގެ ފަރާތުން މީގެ ދުވަސްތަކެއް ކުރިން އެންގެވިކަން އެނގިއްޖެ އެވެ.
އަދަދު ނޫހަށް ކަށަވަރުވެފައިވާ ގޮތުގައި މަގާމުން އިސްތިއުފާ ދެއްވައި، ފުލުހުންގެ ހިދުމަތުން ރިޓަޔާ ކުރައްވަން ރައީސް މުއިއްޒުގެ ފަރާތުން ފަރުހާދަށް އެންގެވީ ރައީސް އޮފީހުގެ މިނިސްޓަރު އަލީ އާރިފް އެވެ. މިކަން ތަފާތު ތިން މަސްދަރަކުން މި ނޫހަށް ކަށަވަރުކޮށްދީފައި ވެ އެވެ.
މިކަމާ ގުޅިގެން ރައީސް އޮފީހުގެ ތަރުޖަމާނު ހީނާ ވަލީދު އާ ސުވާލުކުރުމުން އޭނާ ވިދާޅުވީ އެކަމާ ގުޅޭ މައުލޫމާތެއް އެނގިފައި ނުވާ ކަމަށެވެ.
ފަރުހާދުއަށް މި ނޫހުން ގުޅުމުން އަދި މެސެޖު ކުރުމުން ވެސް ޖަވާބެއް ދެއްވާފައި ނުވެ އެވެ.
މައުލޫމާތު ލިބިފައިވާ ގޮތުގައި ފަރުހާދު އިސްތިއުފާ ދެއްވަން ރައީސް އެންގެވީ އޭނާގެ މަސްލަހަތު އޮތް މައްސަލައެއްގައި އަމަލުކުރެއްވި ގޮތަކާ ގުޅިގެންނެވެ. މިކަން ހިނގާދިޔައީ ކުރީގެ ކޮމިޝަނަރު އަލީ ޝުޖާއު މަގާމުގައި ހުންނަވަނިކޮށެވެ.
ޝުޖާއު އިސްތިއުފާ ދެއްވުމުން އެކްޓިން ކޮމިޝަނަރުގެ މަގާމަށް ފުރަތަމަ އައްޔަން ކުރީ ފަރުހާދެވެ. ނަމަވެސް ގަޑިއިރެއްގެ ތެރޭގައި އެ ނިންމުން ބަދަލުކޮށް، ފުލުހުންގެ އިދާރާ ހިންގުން ވަގުތީ ގޮތުން ޑެޕިއުޓީ ކޮމިޝަނާ އޮފް ޕޮލިސް އިސްމާއިލް ނަވީން އާ ހަވާލުކުރަން ހޯމް މިނިސްޓަރު ނިންމެވި އެވެ.
އިސްތިއުފާ ދެއްވަން ރައީސް އަންގަވާފައި ވަނިކޮށް ޕޮލިސް ކޮމިޝަނަރުގެ މަގާމު ހުސްވުމުން އެ މަގާމަށް ރަސްމީކޮށް ފަރުހާދު ކުރިމަތިލެއްވި އެވެ. ނަމަވެސް އެ މަގާމަށް ރައީސް އައްޔަނު ކުރެއްވީ ނަވީން އެވެ.
ފަރުހާދަކީ އޭނާގެ ދަރިއެއް ޝާމިލުވާ ރޭޕް ކޭހެއްގައި ހެކި ނައްތާލި ކަމުގެ ތުހުމަތު މީގެ ކުރިން ކުރެވުނު އޮފިސަރެކެވެ.
މި މައްސަލާގައި މެއި 7، 2018 ގައި ޕީޖީ އޮފީހުން ފުލުހުންގެ އިދާރާއަށް ފޮނުވި ސިޓީއެއްގެ ބުނެފައި ވަނީ، ގެސްޓްހައުސްއެއްގެ ތެރޭގައި 16 އަހަރުގެ ކުޑަ އަންހެން ކުއްޖަކު ރޭޕުކޮށް އޭނާގެ ފޮޓޯ ނެގި މައްސަލައަކަށް، "ފަރުހާދު ފިކުރީ ނުފޫޒު ފޯރުވާފައިވާކަން ވަނީ ފާހަގަކުރެވިފައި" ކަމަށެވެ.
ޕީޖީ އޮފީހުގެ ސިޓީގައި ބުނެފައިވާ ގޮތުން ފަރުހާދުގެ މައްޗަށް ތުހުމަތު ކުރެވެނީ، ފޯނެއްގައި ހުރި ފޮޓޯތަކެއް ޑިލީޓްކޮށްލުމުގެ ތުހުމަތެވެ. އެއީ، އަނިޔާ ލިބުނު އަންހެން ކުއްޖާއަށް ބެހެމުން ދިޔައިރު ފަރުހާދުގެ ދަރިފުޅު އޭނާގެ ފޯނުން ނެގި ބަރަހަނާ ފޮޓޯތަކެއް ކަމަށް ސިޓީގައި ބުނެފައިވެ އެވެ.
