އައްޑޫ ސިޓީ ހިތަދޫ އާއި ގުޅިފައިވާ ރަށްރަށުގެ ކަރަންޓު މައްސަލައަށް ހައްލު ހޯދައި ދެވިފައި ނުވާތީ ފެނަކަ ކޯޕަރޭޝަންގެ މެނޭޖިން ޑިރެކްޓަރު މޭޖާ (ރިޓަޔާޑް) މުހައްމަދު ނަޖާހް އިސްތިއުފާ ދިނުމަށް ހިތަދޫ މެދު ދާއިރާގެ މެންބަރު އަހްމަދު އަޒާން ގޮވާލައިފި އެވެ.
ފެނަކައިން މީގެ ކުރިން ބުނީ ރޯދައަށް މައްސަލަ އެކީ ހައްލުވާނެ ކަމަށެވެ. މައްސަލަ ހައްލުކުރުމަށް ކުރި މަސައްކަތުގެ ތެރެއިން ސްޓެލްކޯ އާއެކު ވެވުނު އެއްބަސްވުމެއްގެ ދަށުން 1.8 މެގަވަޓްގެ ޖެނެރޭޓަރު ސެޓެއް ގެންގޮސް ހަލާކުވެފައިވާ ތިން ޖެނެރޭޓަރުގެ މަރާމާތު ކުރުމުންދާ ކަމަށް ފެނަކައިން ބުނީ ފެބްރުއަރީ 17، ގަ އެވެ.
ނަމަވެސް، އޭގެ ފަހުން ރޯދަ މަސް ފެށި މިއަދާ ހަމައަށް ވެސް ގިނަ ދުވަސްދުވަހު ގަޑި ބަހައިގެން އެކި ރަށްރަށުން ދިޔައީ ކަރަންޓު ކަނޑަމުންނެވެ. އެކަމުގެ ކަންބޮޑުވުން އައްޑޫގެ ރައްޔިތުންނާއި އެ ސިޓީޣެ ދާއިރާތައް ތަމްސީލު ކުރައްވާ މަޖިލީހުގެ ބައެއް މެންބަރުން ގެންދިޔައީ ފާޅުކުރަމުންނެވެ.
"ފެނަކައިގެ އެމްޑީ ވިދާޅުވީ ރޯދަ މަހުގެ ކުރިން ހައްލެއް ނުދެވިއްޖެނަމަ އިސްތިއުފާ ދެއްވާނެ ކަމަށް. އެ ވަގުތު އަތުވެއްޖެ. އޭނާ މިހާރު އިސްތިއުފާ ދެއްވަން ޖެހޭ،" މިރޭ އެކްސްގައި ކުރި ޕޯސްޓެއްގައި އަޒާން ވިދާޅުވި އެވެ.
އައްޑޫގެ ކަރަންޓުގެ މައްސަލައަށް ވަގުތުން ވަގުތަށް ހައްލެއް ހޯދައިދިނުމަށް ސަރުކާރަށް ގޮވާލައި، ހިތަދޫ ދެކުނު ދާއިރާގެ އެމްޑީޕީ މެންބަރު، އިބްރާހިމް ނާޒިލް މަޖިލީހަށް ހުށަހެޅުއްވި ކުއްލި މައްސަލަ މަޖިލީހުގައި އޮތް ވެރިކަންކުރާ ޕީއެންސީގެ މެޖޯރިޓީން ވަނީ ބޭރުކޮށްލާފަ އެވެ. އެ މައްސަލަ ބަލައިގަތުމަށް އަޒާން ވޯޓު ދެއްވި އެވެ.
"ފާއިތުވި ހަ މަސް ދުވަހުގެ ތެރޭގައި އައްޑޫ ސިޓީން ކަރަންޓު ކެނޑިފައިވޭ 175 ދުވަހުގެ ތެރެއިން 84 ދުވަހު. އެއީ ކޮންމެ ދެ ދުވަހަކުން ގާތްގަނޑަކަށް އެއް ދުވަހު. 2025 ވަނަ އަހަރުގެ ފެބްރުއަރީ މަހު އެކަނިވެސް 75 އިންސައްތަ ދުވަހު އެއް ގަޑިއިރަށްވުރެ ގިނައިރު ކަރަންޓު ކެނޑުނު،" އަޒާން ހިއްސާކުރި މައުލޫމާތުގައިވެ އެވެ.
އައްޑޫގެ ގުޅިފައިވާ ރަށްތަކަށް ކަރަންޓުގެ ހިދުމަތް ދިނުމުގައި މިދިޔަ އަހަރުގެ ކުރީކޮޅުން ފެށިގެން ދަނީ ތަފާތު އެކި މައްސަލަތައް ދިމާވަމުންނެވެ. މިކަަން ހައްލުކުރަން ސަރުކާރުން ތަފާތު އެކި ތާރީހުތައް ދިން ނަމަވެސް އަހަރަކަށްވުރެ ގިނަ ދުވަސް މި މައްސަލައަށް ވަނީ ވެފަ އެވެ.
