ބޮޑު ހިލަ ނުލިބިގެން ތަރައްގީގެ މަޝްރޫއުތަކެއް ހުއްޓުނު ނަމަވެސް، މިހާރު ގަނޑުކޮށް ބޮޑު ހިލަ ގަންނަން ނިންމާފައިވާ ކަމަށް ރައީސް ޑރ. މުހައްމަދު މުއިއްޒު މިއަދު ވިދާޅުވެއްޖެ އެވެ.
ހުވަދުއަތޮޅު ރަށްތަކަށް ކުރައްވާ ދަތުރުފުޅުގައި ގދ. ރަތަފަންދޫއަށް ވަޑައިގެން ރައީސް މުއިއްޒު ވިދާޅުވީ ގިނަ ރަށްތަކުގައި ތަރައްގީގެ މަޝްރޫއުތައް ހުއްޓިފައި ވަނީ ފައިސާގެ އިތުރުން ބޭނުންވާ ތަކެތި ނުލިބުމުގެ ސަބަބުން ކަމަށެވެ.
އެގޮތުން މިދިޔަ ހަފުތާގައި މަޝްރޫއުތައް ކުރިއަށް ގެންދާ ކުންފުނިތަކާއި ބައްދަލުކޮށް މަޝްރޫއުތަކަށް ބޭނުންވާ ތަކެތި ހޯދުމަށް ގޮތްތަކެއް ރާވާފައިވާ ކަމަށާއި އެންމެ ބޮޑަށް ނުލިބިގެން އުޅޭ ބޮޑު ހިލަ ގަނޑުކޮށް ގަތުމަށް ވެސް ނިންމާފައިވާ ކަމަށް ރައީސް ވިދާޅުވި އެވެ.
"އަޅުގަނޑުމެން މި ބަލަނީ މިގޮތަށް ހުއްޓިފައި ހުރި ހުރިހާ ރަށަކަށް ބޭނުންވާ ތަކެތި ހަމަކުރަން. ބޮޑު ހިލަ އެންމެ ބޮޑަށް، އެންމެ ގިނަ ރަށްތަކުގައި މަސައްކަތް ހުއްޓިފައި އޮތް ސަބަބަކީ ބޮޑު ހިލަ ނުލިބުން. މިދިޔަ ހަފްތާ ތެރޭގައި އަޅުގަނޑު ހަމަ މިކަމާ ބެހޭ ހުރިހާ ކުންފުނިތަކުގެ ވެރިންނާއި ފިނޭންސް މިނިސްޓަރާއި އަދި ކޮންސްޓްރަކްޝަން މިނިސްޓަރާއި އެކީގައި ބައްދަލުވުމެއް ބާއްވާފައި. ގޮތްތަކެއް ރާވަފައިފިން. ހުރިހާ ރަށަކަށް ބޭނުންވާ ބޮޑު ހިލަ ބަލްކުކޮށް ރާއްޖެ ގެންނަން،" އެމަނިކުފާނު ވިދާޅުވި އެވެ.
ރައީސް މުއިއްޒު ވިދާޅުވީ ބޮޑު ހިލައިގެ އިތުރުން ރަށް ގިރުމުގެ މައްސަލަ ހައްލު ކުރަން ބޭނުންވާ ތަކެތި ވެސް ނުލިބި އެބަހުރި ކަމަށާއި ނުލިބިގެން އުޅޭ ހިލައަކީ ބަނދަރުތަކާއި ރަށް ގިރުމުގެ މައްސަލައިގެ އިތުރުން ބިން ހިއްކުމާއި ތޮށިލުމަށް ބޭނުންވާ ހިލަ ކަމަށެވެ.
އޭގެ އިތުރުން ރަށްރަށުގެ މަޝްރޫއުތަކަށް ބޭނުންވާ ފައިސާ ވެސް މިދިޔަ ހަފުތާގައި ހަމަޖައްސައިދީފައިވާ ކަމަށް ރައީސް މުއިއްޒު ވަނީ ވިދާޅުވެފަ އެވެ.
"އެހެންވީމަ މިހާރު ވަނީ ކަންތައްތަކެއް ރޭވިފައި. އެކަން ކުރާނެ ގޮތްތަކެއް. ފައިސާ ވެސް ހަމަޖައްސައި ދީފައި އޮންނާނީ މިދިޔަ ހަފްތާ ހަމަ ނިމުނު ތަނުގައި. އެހެންވީމަ މިގޮތަށް މި ކަންތައްތައް މި ރާވާލީ،" ރައީސް ވިދާޅުވި އެވެ.
މިދިޔަ ސަރުކާރުން ރަށްރަށުގައި ފެށި ތަރައްގީގެ މަޝްރޫއުތައް މި ސަރުކާރު ވެރިކަމާއި ހަވާލުވި ފަހުން ހުއްޓިފައި އޮތުމަކީ ރަށްރަށުގެ ރައްޔިތުންގެ ކަންބޮޑުވުމެކެވެ.
އެގޮތުން އެކި ރަށްރަށުގައި ހިންގާ ތަރައްގީގެ މަޝްރޫއުތަކަށް ގެނެެސްފައި ހުރި ސާމާނު އެހެން ތަށްތަކަށް ގެންދާތީ ރައްޔިތުން އިހުތިޖާޖުކޮށް އެކަން ހުއްޓުވާފައި ވެސް އެބަހުއްޓެވެ.
