ރާއްޖޭގެ ރަށްރަށުގައި ކަރަންޓާއި ފެނުގެ ހިދުމަތް ފޯރުކޮށްދޭ ސަރުކާރުގެ ޔޫޓިލިޓީ ކުންފުނި, ފެނަކަ ކޯޕަރޭޝަންގެ މެނޭޖިން ޑިރެކްޓަރުގެ މަގާމުން މުއާޒް މުހައްމަދު ރަޝީދު މިއަދު އިސްތިއުފާ ދީފި އެވެ.
މި ސަރުކާރުގައި ފެނަކައިގެ މެނޭޖިން ޑިރެކްޓަރުގެ މަގާމާ ހަވާލުވެވަޑައިގެންނެވި މުއާޒު އެ މަގާމުން އިސްތިއުފާ ދިން ސިޓީ ވަނީ އެކްސްގައި ހިއްސާކުރައްވާފަ އެވެ. އެ މަގާމަށް އޭނާ އައްޔަނުކުރީ ނޮވެމްބަރު 29, 2023 ގަ އެވެ.
"ކުންފުންޏަށް ލިބޭ އާމްދަނީއަށް ވުރެ ކުރަން ޖެހޭ ހަރަދުތައް ބޮޑުވުމުން ދެމެހެއްޓެެނިވި ގޮތެއްގައި ހިދުމަތްތައް ފޯރުކޮށް ނުދެވޭނެ ހާލަތަކަށް ކުންފުނީގެ އޮޕަރޭޝަން ހާލަތު ވެއްޓިފައިވާތީ, އަޅުގަނޑު ހުރެގެން ހުރެގެން އިތުރަށް މިކަން ރަނގަޅު ކުރެވޭނެ އަލި މަގެއް ފެންނަން ނެތުމުން މިއަދުން ފެށިގެން ފެނަކަ ކޯޕަރޭޝަން ލިމިޓެޑްގެ މެނޭޖިން ޑިރެކްޓަރުގެ މަގާމުން އިސްތިއުފާ ދީފީމެ," މުއާޒުގެ ސިޓީގައި ބުނެފައިވެ އެވެ.
ކުންފުންޏާ ހަވާލުވިއިރު 4.3 ބިލިއަން ރުފިޔާގެ ދަރަނި އޮތް ކަމަށާއި އަދި ބޭނުންވާ މިންވަރަށް ވުރެ އިތުރަށް ވަޒީފާ ދީފައި އޮތުމުން ހަރަދުތައް އިންތިހާއަށް އިތުރުވެފައިވާ ކަމަށް މުއާޒުގެ ސިޓީގައި ވިދާޅުވެފައިވެ އެވެ.
އޭނާގެ މެނޭޖިން ޑިރެކްޓަރު ކަމުގައި އެޅި ފިޔަވަޅުތަކާ އެކު ހިންގުމުގެ ހަރަދުން އަހަރެއް ތެރޭ 160 މިލިއަން ރުފިޔާ ސަލާމަތް ކުރި ކަމަށް މުއާޒު ވިދާޅުވެފައިވެ އެވެ. އޭނާ އެހެން ވިދާޅުވި ނަމަވެސް ފެނަކައިގެ އޮޑިޓެއް މިހާތަނަށް ހަދާފައި ނުވާތީ އެ އަދަދު ކަށަވަރު ނުކުރެވެ އެވެ.
ފެނަކަ އެސްޓީއޯގެ ސަބްސިޑަރީ ކުންފުންޏަކަށް ބަދަލުކުރުމަށް މި ސަރުކާރުން ނިންމި އެވެ. ވަޒީރުންގެ މަޖިލީހުގެ އިރުޝާދުގެ ދަށުން ރައީސް މުއިއްޒު އެގޮތަށް ނިންމެވީ އޮގަސްޓު 26، ގަ އެވެ. ނަމަވެސް, އެ މަސައްކަތް ވަނީ ހުއްޓާލާފަ އެވެ.
ރާއްޖޭގެ މީހުން ދިރިއުޅޭ ގިނަ ރަށްރަށުގައި ކަރަންޓާއި ފެނުގެ ހިދުމަތް ފޯރުކޮށްދެނީ ފެނަކައިންނެވެ. އެކަމަކު ސައްތައިން ސައްތަ ސަރުކާރު ހިއްސާވާ ކުންފުނިތަކުގެ ތެރެއިން އެންމެ މައްސަލަ ބޮޑު ކުންފުންޏަކީ ވެސް ފެނަކަ އެވެ. އެ ކުންފުނީގެ މެނޭޖުމަންޓުތަކުން ކޮރަޕްޝަންގެ އަމަލުތައް ހިންގާފައިވާ ކަމަށް ތުހުމަތުކުރެވޭއިރު، މީގެ ސަބަބުން އެ ކުންފުނިން ފޯރުކޮށްދޭ ހިދުމަތަށް ވެސް ބުރޫއަރާފައި ވެ އެވެ.
މިއީ ސަރުކާރުގެ ހިއްސާ އޮންނަ ކުންފުނިތަކުގެ ވެރިންގެ ތެރެއިން ފާއިތުވި ދެ ތިން ދުވަހު އިސްތިއުފާ ދެއްވި ދެވަނަ ބޭފުޅާ އެވެ. ކޮރަޕްޝަންގެ ގިނަ ތުހުމަތުތަކެއް އަމާޒުވެ އެޗްޑީސީގެ މެނޭޖިން ޑިރެކްޓަރަކަށް ހުންނެވި އިބްރާހިމް ފަޒުލް ރަޝީދު ވެސް ވަނީ ދާދިފަހުން އިސްތިއުފާ ދީފަ އެވެ.
