ޓޫރިސްޓު ފެސިލިޓީތަކުން ރާއްޖޭގެ ބޭންކުތަކަށް ޑޮލަރު މާރު ކުރަން މަޖުބޫރުކޮށް މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން ބޭރު ފައިސާގެ ގަވާއިދަށް ގެނައި ބަދަލަށް އަމަލުކުރަން ގިނަ ރިސޯޓުތަކަކުން ދެކޮޅު ހަދައި އެކަން އެމްއެމްއޭ އަށް އަންގައިފި އެވެ.
ރިސޯޓުތަކަށް އަންނަ ކޮންމެ ޓޫރިސްޓަކަށް 500 ޑޮލަރު އަދި ގެސްޓްހައުސްތަކަށް އަންނަ ކޮންމެ ޓޫރިސްޓަކަށް 25 ޑޮލަރުގެ މަގުން ބޭންކަށް ޑޮލަރު މާރު ކުރަން މަޖުބޫރުކޮށް އެމްއެމްއޭ އިން އޮކްޓޯބަރު 1 ގެޒެޓުކުރި ގަވާއިދުގެ ދަށުން އެ ފަދަ ތަންތަން އެމްއެމްއޭގައި ރަޖިސްޓްރީވުމަށް ދީފައި އޮތް ސުންގަޑިއަކީ އޮކްޓޯބަރު 30 އެވެ.
މިކަމާ ގުޅިގެން "އަދަދު" އާ ވާހަކަ ދައްކަމުން ޓޫރިޒަމް އިންޑަސްޓްރީގެ އިސް ބޭފުޅަކު ވިދާޅުވީ އެ ގަވާއިދަށް އަމަލު ނުކުރާނެ ކަމަށް ބުނެ މިހައިތަނަށް 50 އަށްވުރެ ގިނަ ރިސޯޓު އޮޕަރޭޓަރުން އެމްއެމްއޭއަށް ސިޓީ ފޮނުވާފައިވާ ކަމަށެވެ.
ބައެއް ރިސޯޓުތަކުން އަދި ރިސޯޓު ގްރޫޕުތަކުން އެމްއެމްއޭއަށް ފޮނުވި ސިޓީގެ ކޮޕީތަކެއް ވެސް މި ނޫހަށް ވަނީ ލިބިފަ އެވެ.
އޭގެތެރޭގައި ރާއްޖޭގައި ގިނަ ރިސޯޓުތަކެއް ހިންގާ މަހުޖަނު ޗަމްޕާ މުހައްމަދު މޫސާ (އުއްޗު) ސޮއިކުރައްވައި އޭނާގެ ރިސޯޓުތަކުން ގަވާއިދަށް އަމަލުނުކުރާނެ ކަމަށް ބުނެ ފޮނުވި ސިޓީގެ ކޮޕީއެއްވެސް ވަނީ ލިބިފަ އެވެ. އެމްއެމްއޭގެ އިތުރުން މި ސިޓީ ރައީސް އޮފީހަށާއި ރައްޔިތުންގެ މަޖިލީހަށާއި ޓޫރިޒަމް މިނިސްޓަރު އަދި މަޓީއަށްވެސް، ވަނީ އެޑްރެސްކޮށްފަ އެވެ.
ގިނަ ސިޓީތަކުގައި ބުނެފައިވަނީ މި ގަވާއިދަކީ އިންޑަސްޓްރީގެ ހަގީގަތާއި ރާއްޖޭގެ އިގުތިސޯދީ ހާލަތާ ނުބައްދަލު ގަވާއިދެއް ކަމަށެވެ. އަދި މިކަމުގެ ސަބަބުން މާލީ ހާލަތަށް ކުރާނެ ގެއްލުމުގެ ވާހަކަތައް ވެސް ތަފުސީލާއި ހިސާބުތަކާއެކު ހިމަނާފައިވެ އެވެ.
"މި ސިޓީގައި ރިއާޔަތް ކޮށްފައިވާ ކަންކަމަށް ބަލާ، ވަގުތުން ވަގުތަށް މި ގަވާއިދު އުވާލުމަށް ސަރުކާރަށް ގޮވާލަން. އަދި ދުރު ރާސްތާގައި އިގުތިސޯދަށް ފައިދާ ކުރާނެ ނިޒާމެއް ގާއިމުކުރުމަށާއި އެ މަސައްކަތުގައި އިންޑަސްޓްރީގެ ބައިވެރިވުން އިތުރުކުރުމަށްވެސް ގޮވާލަން،" އުއްޗުގެ ސިޓީ ނިންމާލަމުން ލިޔުއްވާފައިވެ އެވެ.
މި ބަދަލު ގެނައުމުގެ ކުރިން ޓުއަރިޒަމް އިންޑަސްޓްރީގެ ވިޔަފާރިތަކާ އެމްއެމްއޭއިން ބައްދަލުވުންތަކެއް ބޭއްވި އެވެ. އެ ބައްދަލުވުންތަކުގައި ވެސް އެމްއެމްއޭ އަދި އިންޑަސްޓްރީން ޑޮލަރު މާރު ކުރުމުގެ ފޯމިއުލާތަކެއް ހުށަހެޅި އެވެ.
ނަމަވެސް, އެ ބައްދަލުވުމަށް ވަޑައިގެންނެވި ޓޫރިޒަމް ދާއިރާގެ ބޮޑު ވިޔަފާރިވެރިއަކު ބުނީ އިންޑަސްޓްރީގެ ސްޓޭކްހޯލްޑަރުން ހުށަހެޅި އެއްވެސް ކަމެއް ސަރުކާރުން ބަލައިނުގަތް ކަމަށެވެ.
