ރައްޔިތުން މަޖިލީހުގެ ރައީސްގެ ރަސްމީ ގެކޮޅު، މ. މުރައިދޫ މަރާމާތު މަޖިލީހުން އެއްވެސް ހަރަދެއް ނުކުރާ ކަމަށް ބުނެފައިވަނިކޮށް، އެ މަސައްކަތަށް 3.5 މިލިއަން ރުފިޔާ ބިލުކުރި ކަމަށް ވޭސްޓް މެނޭޖްމަންޓް ކޯޕަރޭޝަން (ވެމްކޯ) އިން ބުނެފި އެވެ.

މި އަހަރު މުރައިދޫ މަރާމާތުކުރީ 20 ވަނަ މަޖިލީހުގެ ރައީސް އަބްދުއްރަހީމް އަބްދުﷲ ބަދަލުވެވަޑައިގަތުމަށެވެ. އެ މަސައްކަތަށް ގާތްގަނޑަކަށް މަހެއްހާ ދުވަސް ހޭދަވި އެވެ. އެމަނިކުފާނު މުރައިދޫއަށް ބަދަލުވެވަޑައިގެންނެވީ ޖުލައި 26، ގަ އެވެ.

އެމަނިކުފާނު ބަދަލުވެވަޑައިގެންނެވި ފަހުން މި ނޫހުން ވާނީ މައުލޫމާތު ހޯދާ ލިބިގަތުމުގެ ހައްގުގެ ގާނޫނުގެ ދަށުން މުރައިދޫ މަރާމާތު ކުރުމަށް މި އަހަރު މަޖިލީހުން ކޮށްފައިވާ ހަރަދުތަކުގެ ތަފުސީލަށް އެދިފަ އެވެ. ނަމަވެސް މަޖިލީހުން އޮގަސްޓު 20، ގައި މި ނޫހަށް ލިޔުމުން ފޮނުވި ޖަވާބުގައި ބުނީ އެ އިދާރާއިން މި އަހަރު މުރައިދޫ މަރާމާތުކުރަން އެއްވެސް ހަރަދެއް ނުކުރާ ކަމަށެވެ.

މަޖިލީހުން މައުލޫމާތު ހޯދަން ހުށަހެޅި ދުވަހު، ދައުލަތުގެ ހާއްސަ ބަޖެޓަކުން ފިނޭންސް މިނިސްޓްރީ މެދުވެރިކޮށް މި މަސައްކަތަށް ހަރަދުކުރިތޯވެސް ވާނީ އެދިފަ އެވެ. ނަމަވެސް އެ މިނިސްޓްރީން އޮގަސްޓު 22، ގައި މި ނޫހަށް ދިން ޖަވާބުގައި ބުނީ އެ މިނިސްޓްރީންވެސް އެ ގޭގެ މަރާމާތައް ހަރަދެއް ނުކުރާ ކަމަށެވެ.

މިއާއެކު މުރައިދޫ މަރާމާތު ކުރުމުގެ މަސައްކަތް ކުރި ވެމްކޯއަށް މިކަމާ ގުޅޭ މައުލޫމާތު ހޯދުމަށް އެދުމުން އެ ކުންފުނިން ޖަވާބު ދިނީ ސެޕްޓެމްބަރު 24، ގަ އެވެ. އެ ކުންފުނިން ބުނީ މުރައިދޫ މަރާމާތުކޮށް އެ ތަން އަނބުރާ ހަވާލުކުރުމަށްފަހު މަޝްރޫއު ހަވާލުކުރި ފަރާތަށް 3.5 މިލިއަން ރުފިޔާ ބިލު ކުރި ކަމަށެވެ.

ލިޔުމުން ދިން ޖަވާބުގައި "މަޝްރޫއު ހަވާލުކުރި ފަރާތް" އެއީ ކޮން ބައެއްތޯ އަދި ބިލުކުރި ކަމަށް ބުނާ ފައިސާ ލިބުނުތޯ މި ނޫހުން ސުވާލު ކުރުމުން ވެމްކޯގެ އިންފޮމޭޝަން އޮފިސަރު ވިދާޅުވީ، މި މަޝްރޫއުގެ ބިލު ފޮނުވީ ފިނޭންސް މިނިސްޓްރީއަށް ކަމަށެވެ.

"ސަރުކާރުގެ ސައްތައިންސައްތަ ހިއްސާވާ ކުންފުންޏެއް ވީމަ. އެކޮޅުން ކެޕްއެކްސް [ކެޕިޓަލް އެކްސްޕެންޑިޗާ] ގެ ގޮތުގަ ހަމަޖައްސަދޭން އެދިފަ ވާނީ. ކޮންމެ މަހެއްގަވެސް އެކޮޅުން [ފިނޭންސް މިނިސްޓްރީން] ކެޕްއެކްސް ފޯރުކޮށްދޭތާ. އޭގެ ތެރޭގަ މި ފައިސާ ހިމަނަން އެދިފަ ވާނީ،" ވެމްކޯގެ އައިއޯ ވިދާޅުވި އެވެ.

ނަމަވެސް، މި ފައިސާގެ ތެރެއިން ފިނޭންސް މިނިސްޓްރީން މިހައިތަނަށް ދޫކޮށްފައިވާ އަދަދެއް ކަށަވަރެއް ނޫނެވެ. ރާއްޖެއަށް ކުރިމަތިވެފައިވާ މާލީ ކާރިސާއާ ގުޅިގެން އެއްވެސް ކޮންޓްރެކްޓަރަކަށް ސަރުކާރުން ފައިސާއެއް ދޫނުކުރާތާ ތިން ހަފުތާވެފައިވާކަން މި ނޫހަށް ވަނީ އެނގިފަ އެވެ.

ރައީސް އަބްދުﷲ ޔާމީންގެ ވެރިކަމުގައި މުރައިދޫ އެ މަނިކުފާނުގެ ބޭފުޅުން ދިރިއުޅުއްވުމަށް ކުއްޔަށް ދީފައި ހުރުމަށްފަހު، އެ ގެއަކީ ރައްޔިތުންގެ މަޖިލީހުގެ ރައީސްގެ ރަސްމީ ގެކޮޅު ކަމުގައި ހަމަޖެއްސީ ނިމިދިޔަ އެމްޑީޕީ ސަރުކާރުގަ އެވެ.

އެ ވެރިކަމުގެ ފުރަތަމަ ކޮޅު އެ ގެ ހުސްކޮށް ހުރުމަށް ފަހު، ރައްޔިތުންގެ މަޖިލީހުގެ އޭރުގެ ރައީސް މުހައްމަދު ނަޝީދު ދިރިއުޅުއްވުމަށް އެ ގެ ހާއްސަ ކުރެއްވީ، މެއި 6، 2021 ގައި އެ މަނިކުފާނު އަވަހާރަކޮށްލަން ދިން ބޮމުގެ ހަމަލާއަށް ފަހުގަ އެވެ.

ނަޝީދަށް ފަހު 19 ވަނަ މަޖިލީހުގެ ރައީސްއަކަށް އިންތިހާބު ކުރެއްވި ހިތަދޫ އުތުރު ދާއިރާގެ މެންބަރު މުހައްމަދު އަސްލަމު މުރައިދޫގޭގައި ދިރިއެއްނޫޅުއްވަ އެވެ.