މާލޭ މޭޔަރަކަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ހުންނެވި ދުވަސްވަރު ކުރިއަށް ގެންދިޔަ ގަސް ޕްރޮގްރާމަށް 50 މިލިއަން ރުފިޔާ އަށް ވުރެ ބޮޑު ހަރަދެއް ކޮށްފައިވާ ކަމަށް، މިހާރުގެ މޭޔަރު އާދަމް އާޒިމް ވިދާޅުވެއްޖެ އެވެ.

އަދަދު ނޫހުގެ އެތެރެފުށް ޕްރޮގްރާމުގައި ވާހާކަ ދައްކަވަމުން، އެ ގަސް ޕްރޮގްރާމަކީ އިސްރާފެއް ގޮތުގައި ފާހަގަ ކުރައްވައި އާޒިމް ވިދާޅުވީ އެ ޕްރޮގްރާމަށް 50 އާއި 60 މިލިއަން ރުފިޔާއާ ދެމެދުގެ ހަރަދެއް ކޮށްފައިވާ ކަމުގެ މައުލޫމާތު ލިބިފައިވާ ކަމަށެވެ.

އެވަރުގެ ބޮޑު ހޭދައެއް ކުރިއިރު، ހޯދާފައި ގަހާއި ތަކެތީގެ ސްޓޮކް ރަނގަޅަށް ބަލެހެއްޓިފައި ނެތް ކަމަށް އާޒިމް ވިދާޅުވި އެވެ.

"އިންވެންޓަރީ ބެލެހެއްޓިފައި ނެތް އެތާނގައެއް. އެއީ ވަރަށް ބޮޑު މައްސަލައެއް،" އާޒިމް ވިދާޅުވި އެވެ.

ގަސް ޕްރޮގްރާމާއި ގަސް ފިހާރައިގެ އިންވެންޓަރީ ނެގުމަށް އަންގާފައިވާ ކަމަށާއި، ހަގީގަތް ފުރިހަމައަށް އެނގިގެންދާނީ އެ އިންވެންޓަރީ އަށް ފަހު ކަމަށް އާޒިމް ވިދާޅުވި އެވެ.

ދެހާސް ބާވީސް ވަނަ އަހަރު ފެށި ގަސް ޕްރޮގްރާމަށް ގަސް ހޯދުމުގެ ނަމުގައި ސިޓީ ކައުންސިލްގެ މުވައްޒަފުން ރަށްރަށަށް ދަތުރުތައް ކޮށްފައިވާ ކަމަށް، އެކަމުގެ މައުލޫމާތު އެނގޭ އަދި އޭރު ކައުންސިލް މެންބަރަކަށް ހުންނެވި ބޭފުޅަކު އަދަދު ނޫހަށް ވިދާޅުވި އެވެ.

ގަސް ޕްރޮގްރާމުގެ ދަށުން އޮކްޓޯބަރު 2022 ގައި "މާލެ ފެހި" ނަމުގައި ހެދި ފިހާރަ ހުޅުވުމުގެ ރަސްމިއްޔާތުގައި މުއިއްޒު ވިދާޅުވީ އެ ޕްރޮގްރާމަކީ ދެމެހެއްޓެނިވި ވަށައިޖެހޭ ގޮތެއްގައި ކުރިއަށްގެންދާނެ މަޝްރޫއުއެއް ކަމަށާއި، ބޭނުމަކީ މާލެ ސިޓީ ޒީނަތްތެރިކޮށް ފެހި ކުރުން ކަމަށެވެ.

މާލެ ސިޓީގެ އިތުރުން މުޅި ރާއްޖޭގެ ރައްޔިތުން ވެސް އެ ޕްރޮގްރާމު ބަލައިގަންނާނެ ކަމަށް ވެސް މުއިއްޒު ވިދާޅުވެފައިވެ އެވެ.

އެ ޕްރޮގްރާމުގެ ދަށުން މާލޭ ދެކުނު ފަރާތާއި އިރުމަތި ފަރާތުގައި ކަދުރު ރުއްތައް އިންދި އެވެ.