ހުޅުމާލޭގެ ދެވަނަ ފިޔަވަހީގައިވާ ވިނަރެސް ފުލެޓުތަކުގެ ތެރެއިން އެކި ސަބަބުތަކާހުރެ ނުވިކި ބާކީ ހުރި ފުލެޓުތައް ވިއްކަން ފުރުސަތު ހުޅުވާލުމުން ހުށަހެޅި ފޯމުތައް މިއަދު ބާތިލު ކުރުމަށްފަހު ފްލެޓުތައް ނުވިއްކަން ނިންމައިފި އެވެ.

ވިނަރެސް ފްލެޓުގެ ނުވިކި ހުރި 123 ފްލެޓު ވިއްކަން އެޗްޑީސީން ހުޅުވާލީ ނޮވެމްބަރު 5، 2023، ގަ އެވެ. އޮންލައިންކޮށް ފޯމު ހުށަހެޅުމަށް އެ ދުވަހު 10:00 ގައި ފުރުސަތު ހުޅުވާލުމުން, ވަރަށް ބޮޑު ތަރުހީބެއް ލިބުނެވެ. ނަމަވެސް އެ ދުވަހު ޕޯޓަލްއަށް ދިމާވި ޓެކްނިކަލް މައްސަލައަކާ ހެދި ގިނަ ބަޔަކަށް ފޯމު ހުށަނޭޅުމުން, އެކަމުގެ ޝަކުވާ އޮތީ ބޮޑުވެފަ އެވެ.

އެ ޝަކުވާތަކާ ގުޅިގެން އިތުރަށް ބަލަންޖެހޭ ކަންތައްތަކެއް ހުރި ކަމަށް ބުނެ އެޗްޑީސީން އޭރު ވަނީ ވިނަރެސް ފްލެޓުތައް ވިއްކުން މަޑުޖައްސާލާފަ އެވެ. ޕޯޓަލްއަށް މައްސަލަ ދިމާވެ, ގިނަ ބަޔަކަށް ފޯމު ހުށަހެޅުމުގެ ފުރުސަތު ނުލިބުނު ކަމަށް ބުނެ އެޗްޑީސީން މިއަދު ވަނީ ކުރިން ހުށަހެޅި ފޯމުތައް ބާތިލުކޮށްފަ އެވެ.

ފޯމުތައް ބާތިލު ކުރުމަށްފަހު އެޗްޑީސީން ބުނީ ވިނަރެސް އެޕާޓްމަންޓް ވިއްކުމަށް އިތުރަށް ހުޅުވާނުލާނެ ކަމަށެވެ. ވިނަރެސް ފްލެޓުތައް ނުވިއްކަން ނިންމީ, އެޗްޑީސީން ބުނި ގޮތުގައި ހުޅުމާލޭގައި ފްލެޓް އިމާރާތް ކުރުމަށް ފަށާފައިވާ އެކިއެކި މަޝްރޫއުތަކުން އެޕާޓްމަންޓް ގަތުމަށް ފައިސާ ދައްކައި, ފްލެޓު ނުލިބި ތިބި ފަރާތްތަކަށް ހައްލު ހޯދައިދިނުމަށެވެ.

"އެ ފަރާތްތަކަށް ބޯހިޔާވަހިމެއް ހޯދައިދިނުމަށް މިހާރުގެ ސަރުކާރުން ކުރަމުންދާ މަސައްކަތުގެ ދަށުން ވިނަރެސް މަޝްރޫއުގެ ތެރެއިން ފުރުސަތު ތަނަވަސްވާ މިންވަރަކުން ހައްލު ހޯދައި ދިނުމަށް މަސައްކަތް ކުރަމުން ދާތީ ވިނަރެސް އެޕާޓްމަންޓް ވިއްކުމަށް އިތުރަށް ހުޅުވާނުލާނެ،" އެޗްޑީސީން ބުންޏެވެ.

ޗައިނާ މެޝީނަރީ އިންޖިނިއަރިން ކޯޕަރޭޝަން (ސީއެމްއީސީ)އާ ހަވާލުކޮށްގެން ކުރިއަށް ގެންދިޔަ ވިނަރެސް މަޝްރޫއުގެ 10 ޓަވަރުގައި ތިން ކޮޓަރީގެ 1344 އެޕާޓްމަންޓް ހުރެ އެވެ. ނުވިކުރި ފްލެޓުތައް ވިއްކުމަށް ހުޅުވާލީ 2.5 މިލިއަން ރުފިޔާ އާއި ތިން މިލިއަން ރުފިޔާއާ ދެމެދުގެ އަގެއްގަ އެވެ.

ކުރީގެ ރައީސް އަބްދުﷲ ޔާމީންގެ ވެރިކަމުގައި މަޝްރޫއުގެ މަސައްކަތް ފެށި ނަމަވެސް، އެ ވެރިކަން ބަދަލުވިއިރު، ގިނަ ޓަވަރުތަކުގެ ފައުންޑޭޝަން ވެސް ނާޅަ އެވެ. މަޝްރޫއުގެ ބޮޑުބައި ފަށައި، ނިންމާފައިވަނީ ރައީސް އިބްރާހިމް މުހައްމަދު ސޯލިހުގެ ސަރުކާރުންނެވެ.