ސަރުކާރު ހިންގާ ޕީއެންސީ/ޕީޕީއެމްއާ އަބަދުވެސް ގާތް ގުޅުމެއް ބާއްވާ ޗައިނާއިން މާލޭގެ ހުރިހާ މަގެއް ހިލޭ ހަދަން ހަމަޖެހިފައިވާ ކަމަށް ރައީސް ޑރ. މުހައްމަދު މުއިއްޒު މިރޭ ވިދާޅުވެއްޖެ އެވެ.
އަންނަ މަޖިލިސް އިންތިހާބުގައި، މައްޗަންގޯޅި މެދު ދާއިރާއަށް ވާދަކުރާ ކެންޑިޑޭޓު އަހުމަދު ޒަމީރުގެ ކެމްޕެއިން ޖަގަހަ ހުޅުވަން ޗާންދަނީ މަގުގައި މިރޭ ބޭއްވި ޖަލްސާގައި ވާހަކަ ދައްކަވަމުން އެމަނިކުފާނު ވިދާޅުވީ މާލެ ސަރަހައްދަށް އެންމެ ބޮޑު އިސްކަމެއް ދީގެން ރާވަމުންދާ މަސައްކަތަކީ ބޯހިޔާވަހިކަމާއި މަގު ހެދުމުގެ މަސައްކަތް ކަމަށެވެ.
އެގޮތުން މަގު ހެދުމުގެ މަސައްކަތް ޗައިނާއިން ހިލޭ ކޮށްދިނުމަށް މިހާރު ވެސް ހަމަޖެހިފައިވާ ކަމަށާއި އެ ކަމުގެ މަޝްވަރާތައް މިހާރު ގާތްގަނޑަކަށް ނިމި، އެ ކަމަށް އެ ގައުމުން އެއްބަސްވެފައިވާ ކަމަށް ރައީސް ވިދާޅުވި އެވެ.
"މި މާލޭގެ ހުރިހާ މަގެއް، ހިލޭ ހަދައިދޭން، ޗައިނާއިން މިހާރު އެއްބަސްވެއްޖެ، ޗައިނާއިން ހިލޭ ހަދައިދޭ ގޮތަށް މިހާރު ހަމަޖެހި ނިމިފައި އެ ވަނީ،" ރައީސް ވިދާޅުވި އެވެ.
އެމަނިކުފާނު މީގެ ކުރިން މާލޭގެ މޭޔަރަކަށް ހުންނެވި އިރު ވެސް އެ ކަން ކުރެއްވުމަށް މަސައްކަތް ކުރެއްވި ނަމަވެސް އޭރު އޮތް އެމްޑީޕީގެ ސަރުކާރުން އެ ކަމަށް ހުރަސް އެޅި ކަމަށް މިރޭ ރައީސް މުއިއްޒު ވިދާޅުވި އެވެ.
އެމްޑީޕީ ސަރުކާރުގައި އޮވެ، އަދި ރައްޔިތުންގެ މަޖިލީހުގައި އެ ޕާޓީގެ މެޖޯރިޓީ އޮވެފައި ވެސް މާލޭގެ މަގުތައް ހެދުމާއި މާލެ ސަރަހައްދާއި މުޅި ރާއްޖެއަށް ވެސް ބޭނުންވެފައިވާ ގެދޮރުގެ މަސައްކަތް ކުރެވިފައި ނުވާ ކަމަށް ރައީސް މުއިއްޒު ވިދާޅުވި އެވެ.
އޭރު ރިޔާސީ އިންތިހާބަށް ވެސް ގާތްވެފައިވަނިކޮށް ގުޅީފަޅާއި ގިރާވަރުފަޅުން ގޯތިތައް ދޭން ނިންމީ އެއްވެސް ޕްލޭނެއް ނެތި ކަމަށް އެމަނިކުފާނު ދައްކަވާ ވާހަކަ މިރޭ ވެސް ތަކުރާރު ކުރެއްވި އެވެ.
"ހަމައެކަނި ހުސް ގޯތިތައް، މަގުތަކެއް ވެސް ނެތް ކުޑަމިނުން، ބިމުން ކަނޑައަޅައި ޕްލޭންކޮށްފަ، އަދި ކޮބައި އަސާސީ އެހެން ބޭނުންތަކަށް ބިން، ސްކޫލްތަކާއި ހޮސްޕިޓަލާއި އެހެނިހެން ހިދުމަތްތައް ދޭނެ މަރުކަޒުތައް، މިއިން އެއްވެސް ކަމެއް ނެތް،" އެމަނިކުފާނު ވިދާޅުވި އެވެ.
އެމަނިކުފާނުގެ ސަރުކާރުން މިހާރު ގުޅީފަޅު އަދި ގިރާވަރު ފަޅުން ވެސް އިތުރަށް ބިން ހިއްކައި، ލޭންޑް ޔޫޒް ޕްލޭންގެ މަސައްކަތް ވެސް ނިމެމުންދާ ކަމަށް ވިދާޅުވި އެވެ. އެ ކަން ހަމަޖެހުމުން ލިޔުން ހަވާލުކޮށްފައިވާ އެންމެނަށް ގޯތި ލިބޭނެ ކަމަށް ކަނޑައަޅާފައިވާ އަވަށަކުން ގޯތި ދޭނެ ކަމަށް އެމަނިކުފާނު ވިދާޅުވި އެވެ.
އޭގެ އިތުރުން ރައީސް ވައުދުވެވަޑައިގެންފައިވާ ގޮތަށް، ފަސް ޕަސެންޓަށް ވުރެ ކުޑަ އިންޓްރެސްޓެއްގައި ލޯނު ދޫކުރުމަށް ކުރަން ޖެހޭ މަސައްކަތްތައް ވެސް ނިމެން ގާތްވެފައިވާ ކަން އެމަނިކުފާނު މިރޭ ފާހަގަ ކުރެއްވި އެވެ.
