ޝަންހާއީ، ޗައިނާ (ޖެނުއަރީ 24) - އަލް-ނަސްރު އިން ޗައިނާ އަށް ކުރަމުންދާ ޓުއާގައި ދެ މެޗު ކުޅޭ ގޮތަށް ހަމަޖެހިފައި އޮތް ނަމަވެސް، އެ ޓީމުގެ ތަރި ކްރިސްޓިއާނޯ ރޮނާލްޑޯ އަށް ލިބުނު އަނިޔާއަކާ ގުޅިގެން އޭނާ އަށް މި ދެ މެޗުގައި ނުކުޅެވޭނެތީ އެ ދެ މެޗު ފަސް ކުރަން ނިންމައިފި އެވެ.

ޗައިނާގެ ފުޓްބޯޅަ ސަޕޯޓަރުންގެ މެދުގައި، ރޮނާލްޑޯ، 38, އަކީ ވަރަށް މަގްބޫލު ކުޅުންތެރިއެކެވެ. އެހެންކަމުން، އެ ގައުމުގައި ރޮނާލްޑޯ ކުޅޭތަން ހަމަ ލޮލުން ބަލާލުމުގެ ފުރުސަތު ހޯދުމަށް، އޭނާގެ ސަޕޯޓަރުން ތިބީ ކެތްމަދުވެފަ އެވެ.

މި ޓުއާގައި މިއަދު ޝަންހާއީ ޝެންހުއާ އަދި އާދިއްތަ ދުވަހު ޒޭޖިއާންގް އެފްސީއާ ދެކޮޅަށް ކުޅެން އޮތް މެޗުތަކުގެ ޓިކެޓުވެސް ވަނީ ވިކި ހުސްވެފަ އެވެ.

އެކަމަކު, މި ދެ މެޗަަށް ރޮނާލްޑޯ ފިޓުނުވާތީ، މި ދެ މެޗު ފަސްކުރަން ވަނީ ނިންމައިފަ އެވެ. އަދި ޓިކެޓު ގަތް މީހުންނަށް ރީފަންޑް ލިބޭނެ އިންތިޒާމްތައް ވަނީ ހަމަޖައްސައިފަ އެވެ.

މީޑިއާއާ ވާހަކަދައްކަމުން ރޮނާލްޑޯ ވަނީ ދެ މެޗު ފަސްކުރަންޖެހުމާ ގުޅިގެން ޗައިނާގެ ސަޕޯޓަރުންގެ ކިބައިން މާފަށް އެދިފައެވެ. އަދި މިއީ އޭނާ ވެސް ވަރަށް ދެރަވި ދުވަހެއް ކަމަށެވެ.

"ފުޓްބޯޅައިގައި އަހަރަމެންނަށް ކޮންޓުރޯލް ނުވާ ކަންތައްތައްވެސް ހުރޭ. އަހަރެން ފުޓްބޯޅަ ކުޅޭތާ 23 އަހަރުވީ އެހެންވީމަ އަހަންނަށް އެނގޭ ކަމެއް ދިމާވެދާނެކަން. މިއަދު އަހަންނަށް މި މެޗުތައް ކުޅެވެން ނެތީ،" ރޮނާލްޑޯ ބުންޏެވެ.

މިދިޔަ އަހަރު އެންމެ ގިނަ ގޯލު ޖެހި ރޮނާލްޑޯ ބުނީ މި އަހަރު ވެސް ހާއްސަ އަމާޒުތަކެއް އެބަހުރި ކަމަށެވެ.