މޯލްޑިވްސް އިންޑަސްޓްރިއަލް ޑިވެލޮޕްމަންޓް ފްރީޒޯންގެ ނަމުގައި ސަރުކާރުން އުފައްދާ އާ ކުންފުންޏަށް މާލެ ސަރަހައްދުން 100 ހެކްޓަރުގެ ބިމެއް ދޭން ނިންމާފައިވާ ކަމަށް ސަރުކާރުން މިއަދު ބުނެފި އެވެ.

ރައީސް އޮފީހުގައި މިއަދު ކުރިއަށްދިޔަ ނޫސްވެރިންގެ ބައްދަލުވުމުގައި ވާހަކަ ދައްކަމުން ޕަބްލިކް ޕޮލިސީ ސެކްރެޓަރީ އަބްދުﷲ ނާޒިމް ވިދާޅުވީ މޯލްޑިވްސް އިންޑަސްޓްރިއަލް ޑިވެލޮޕްމަންޓް ފްރީޒޯން އުފައްދާނީ ސަރުކާރު ހިއްސާވާ ފަސް ކުންފުންޏެއްގެ ހިއްސާ އޮންނަ ގޮތަށް ކަމަށެވެ.

އެ ފަސް ކުންފުންޏަކީ ސަރުކާރުގެ ވިޔަފާރި ކުންފުނި އެސްޓީއޯ އާއި އެޗްޑީސީ އާއި އެމްޕީއެލް އާއި އެމްޓީސީސީ އަދި އެމްއޭސީއެލް ކަމަށް ސަރުކާރުން ބުންޏެވެ.

"މި ފަސް ކުންފުނި ޝާމިލުވާގޮތަށް އުފެއްދޭ މައި، ބޮޑު އެއްކުންފުންޏެއް ގޮތުގައި ފްރީ ޓްރޭޑް ޒޯނުތައް ގާއިމުކުރުމުގެ ހުއްދައަށް އެދި ބޯޑް އޮފް އިންވެސްޓްމަންޓަށް ހުށަހެޅުމަށް ވަނީ ނިންމާފަ،" އޭނާ ވިދާޅުވި އެވެ.

ނާޒިމް ވިދާޅުވީ ފްރީ ޓްރޭޑް ޒޯނުތައް ގާއިމުކުރުމަށް އެއާޕޯޓާއި މުދާ ބަނދަރު ހިމެނޭ ސަރަހައްދުތައް ކަނޑައެޅުމަށް ނިންމާފައިވާ ކަަމަށެވެ. އަދި އެ ކުންފުނީގެ ވިޔަފާރިތައް ފެށުމަށް ތިލަފުއްޓާއި ގުޅީފަޅު ބެލުމަށްފަހު އެންމެ އެކަށީގެންވާ ސަރަހައްދަކުން މަދުވެގެން 100 ހެކްޓަރުގެ ބިން ކަނޑައެޅުމަށްވެސް ކެބިނެޓުން ނިންމާފައިވާ ކަމަށް ވިދާޅުވި އެވެ.

"މިއީ ރާއްޖެއަށް ލާޖް ސްކޭލެއްގައި މުދާ އެތެރެކޮށް، ދިވެހި ރައްޔިތުންނަށް ބޭނުންވާ މިންވަރަށްވުރެވެސް ބޮޑަށް އެތެރެ ކުރެވި އަދި އަވަށްޓެރި އެހެން ގައުމުތަކަށް ރީ އެކްސްޕޯޓް ކުރެވޭނެ ނިޒާމެއްގެ މަތިން އާމްދަނީ ވަރަށް ބޮޑަށް ފުޅާކުރުމަށްޓަކައި އުފައްދާ ކުންފުންޏެއް،" ނާޒިމް ވިދާޅުވި އެވެ.

މޯލްޑިވްސް އިންޑަސްޓްރިއަލް ޑިވެލޮޕްމަންޓް ފްރީޒޯން އަކީ ރާއްޖޭގެ އިގުތިސާދީ ރައްކާތެރިކަން ކަށަވަރުކުރުމާއި، ވެލިއު އެޑްކުރުމާއި، ޓްރާންޝިޕްމަންޓް/ރިީއެކްސްޕޯޓް ވިޔަފާރިއަށް ހާއްސަކޮށް އުފައްދާ 100 ޕަސެންޓު ދިވެހި ކުންފުންޏެކެވެ.