ރާއްޖޭން ބޭރުގައި ކިޔަވާ ކުދިންނަށް ކޮންމެ މަހެއްގެ މައްޗަށް ނެގޭ ޑޮލަރުގެ އަދަދު މަތި ކުރުމަށް ސަރުކާރުން ނިންމައިފި އެވެ.
އިއްޔެ ބޭއްވި ކެބިނެޓު ބައްދަލުވުމުގައި ނިންމާފައި ވަނީ ފެބްރުއަރީ 1, އިން ފެށިގެން އެ އަދަދު 1,200 ޑޮލަރަށް މަތި ކުރުމަށެވެ. އެކަން ހާމަކުރެއްވީ ރައީސް އޮފީހުގެ ޕްރިންސިޕަލް ސެކްރެޓަރީ ޓު ދަ ޕްރެޒިޑެންޓް އޮން ޕަބްލިކް ޕޮލިސީ އަބްދުالله ނާޒިމް އެވެ.
"މިކަމާ ގުޅޭގޮތުން ނިންމަވަން ޖެހޭ އިދާރީ ޓެކްނިކަލް މަސައްކަތްތަކެއް, ހާއްސަކޮށް ފިނޭންސް މިނިސްޓްރީ އާއި ބޭންކް އޮފް މޯލްޑިވްސް އެމްއެމްއޭއާ ގުޅިގެން ކުރިއަށްގެންދިޔުމަށް ކެބިނެޓުން ވަނީ ނިންމަވާފައި," އެކަމާ ގުޅޭ މައުލޫމާތު ހިއްސާ ކުރައްވަމުން ނާޒިމް ވިދާޅުވި އެވެ.
މިހާރު އުސޫލުތައް އޮންނަ ގޮތުން މަހެއްގެ މައްޗަށް ރާއްޖޭން ބޭރުގައި ތައުލީމު ހާސިލުކުރަމުންދާ ދަރިވަރުންނަށް ނެގެނީ 750 އެމެރިކާ ޑޮލަރެވެ.
މިކަމުގެ ސަބަބުން ބޭރުގައި ތިބި ދަރިވަރުންނަށް ޑޮލަރު ލިބުމުގައި ހުރި ދަތިތަަކަށް ކޮންމެވެސް ވަރެއްގެ ހައްލެއް ލިބިގެންދާނެ ކަމަށް ސަރުކާރުން މިއަދު ހާމަކުރި އެވެ.
ފުރަތަމަ މަރުހަލާގައި އޮތީ ކިޔަވާ ކުދިންގެ ޑޮލަރު ލިމިޓު މަތިކުރުން ކަމަށާއި އަމިއްލަ ގޮތުން ގޮސް ތިބި ކުދިންނާއި ސަރުކާރުގެ ހަރަދުގައި ގޮސް ތިބި ކުދިންނަށް ވެސް އެ ފަސޭހަ ލިބިގެންދާނެ ކަމަށް ނާޒިމް ހާމަކުރެއްވި އެވެ.
ރާއްޖޭގެ ބޭންކުތަކުން ރީޓެއިލް ކަސްޓަމަރުންނަށް ކަނޑައަޅާފައި އޮންނަ ޑޮލަރު ލިމިޓު ބޮޑުކުރަމުން ގޮސް އެއްކޮށް ނައްތާލުމަށް ރައީސް ޑރ. މުހައްމަދު މުއިއްޒު ކެމްޕޭނުގައި ވައުދުވެވަޑައިގެންނެވި އެވެ. އެ ބަދަލު ގެނައުމަށް މާލީ ނިޒާމާ ގުޅޭ ގާނޫނުތައް އިސްލާހު ކުރައްވާނެ ކަމަށް ވެސް އެމަނިކުފާނު ވިދާޅުވި އެވެ.
"ފުރަތަމަ ތިން މަސްތެރޭ މިހާރުގެ ލިމިޓު ދެގުނަ ބޮޑުކުރާނަން. އެހެން ދަމުން ދަމުން ގޮސް ލިމިޓު އުވާލާނަން" ކެމްޕޭން ތެރޭގައި އެމަނިކުފާނު ވިދާޅުވެފައިވެ އެވެ.
އެހެންކަމުން, ފެބްރުއަރީ 17, 2024 ގެ ކުރިން ރީޓެއިލް ކަސްޓަމަރުންގެ ލިމިޓު ދެ ގުނަ ބޮޑުކުރުމަށް ރައީސް މުއިއްޒު ވަނީ ވައުދުވެވަޑައިގަންނަވާފަ އެވެ. ދަރިވަރުންނަށް މިފަދަ ލުޔެއް ލިބޭނެކަން ސަރުކާރުން ހާމަކޮށްފައިވާއިރު އާންމުންނަށް އޮތް ލިމިޓު އުވާލުމަށް އޮތް ޓައިމްލައިނެއް ސަރުކާރުން ހާމަނުކުރެ އެވެ.
