ނެޝަނަލް ގްރޯން ޕްރީ 2023 ގައި ވާދަކޮށް، ހުނަރުވެރި ދުވުންތެރިޔާ، ފަސޫހާ އަހުމަދު، ރާއްޖޭގެ އަންހެނުންގެ 1500 މީޓަރު ދުވުމުގެ ގައުމީ ރެކޯޑް މުގުރާލައިފި އެވެ.
ޓްރެކް އެންޑް ފީލްޑް އެސޯސިއޭޝަންގެ ފަސޫހާ އިއްޔެ ގްރޯން ޕްރީގެ 1500 މީޓަރު ރޭސް ނިންމައި، ގައުމީ ރެކޯޑް ހެދީ، 5 މިނިޓް، 04.02 އިންނެވެ. މި ރެކޯޑް ކުރިން އޮތީ ޓްރެކް އެންޑް ފީލްޑް އެސޯސިއޭޝަންގެ އައިޝަތު ޖާއިޝާ ޖުނީޒް އަތުގަ އެވެ. ނެޝަނަލް ގްރޯން ޕްރީ، 2021 ގައި ޖާއިޝާ ރެކޯޑް ހެދީ، 5 މިނިޓް، 05.36 އިން ރޭސް ނިންމައިގެންނެވެ.
ފަސޫހާ ވަނީ މި އަހަރުގެ ހަަތަރު މަސް ތެރޭ، ތިން ފަހަރަށް ރާއްޖޭގެ އަންހެނުންގެ 800 މީޓަރު ދުވުމުގެ ގައުމީ ރެކޯޑް މުގުރާލައިފަ އެވެ.
މާލޭ އެކުވެނި ސިންތެޓިކް ޓްރެކުގައި މި ހަފްތާ ބަންދުގައި ކުރިއަށްދާ ނެޝަނަލް ގްރޯން ޕްރީގެ މި ފަހަރުގެ އަންހެނުންގެ 1500 މީޓަރު ރޭހުގައި، ފަސޫހާ ފަހަތުން، ދެ ވަނަ އަށް ދިޔައީ އަހުމަދިއްޔާ އިންޓަނޭޝަނަލް ސްކޫލްގެ އައިޝަތު ބިންތި އަހުމަދު އެވެ. އޭނާގެ ޓައިމިން އަކީ، 5 މިނިޓް، 38.99 އެވެ.
ގްރޯން ޕްރީގެ 100 މީޓަރު ދުވުމުގެ އިވެންޓް ނިންމާލުމަށް ފަހު، ސާއިދު އުފާފާޅުކުރަނީ.--- ފޮޓޯ: އަބްދުﷲ ޔަޝައު
ގްރޯން ޕްރީގެ ފިރިހެނުންގެ 100 މީޓަރު ދުވުމުން އެއް ވަނަ ހޯދީ ރާއްޖޭގެ އެންމެ ބާރު ދުވުންތެރިޔާ، ހަސަން ސާއިދު އެވެ. ސާއިދުގެ ޓައިިމިން އަކީ، 10.73 ސިކުންތެވެ. ދެ ވަނަ އަށް ދިޔަ، ސާއިދު ސްޕޯޓްސްގެ އަހުމަދު ނަޖުދާން އަބްދުﷲ ރޭސް ނިންމީ 11.03 ސިކުންތުންނެވެ. ރައުހަތު ސްޕޯޓްސްގެ އިބްރާހިމް ނާހިލް ނިޒާރު ތިން ވަނަ ހޯދީ، 11.18 ސިކުންތުން ރޭސް ނިންމައިގެންނެވެ.
އަންހެނުންގެ 100 މީޓަރު ދުވުމުން، ޝަރީފް ސްޕޯޓްސްގެ އަހްނާ ނިޒާރު އެއް ވަނަ ހޯދިއިރު، ޓައިމިން އަކީ، 12.69 ސިކުންތެވެ. ދެ ވަނަ އަށް ދިޔަ، އައްޑޫ ހައި ސްކޫލްގެ އައިމިނަތު ޒަފާ ޒައިންގެ ޓައިމިން އަކީ 12.92 ސިކުންތެވެ. އަދި ތިން ވަނަ އަށް ދިޔަ، ޓްރެކް އެންޑް ފީލްޑް އެސޯސިއޭޝަންގެ ،އައިޝަތު ޝަބާ ސަލީމް ރޭސް ނިންމީ، 13.04 ސިކުންތުންނެވެ.
ފިރިހެނުންގެ ލޯންގް ޖަމްޕުން އެއް ވަނަ ހޯދީ، ކަސްޓަމްސް ރެކްރިއޭޝަން ކްލަބްގެ ނުޖޫމް ހަސަން އެވެ. އޭނާ ވަނީ 6.52 މީޓަރު ދުރަށް ފުންމައިފަ އެވެ. ދެ ވަނަ އަށް ދިޔަ، ނަސީރު ސްޕޯޓްސްގެ އިބްރާހިމް ރާއިޝް އަބްދުލް އަޒީޒް ވަނީ 6.28 މީޓަރު ދުރަށް ފުންމައިފަ އެވެ.
ފިރިހެނުންގެ 1500 މީޓަރު ދުވުމުގައި، 4 މިނިޓް، 09.99 އިން ރޭސް ނިންމައިގެން އެއް ވަނަ ހޯދީ ހުސެއިން ފަޒީލް ހާރޫން އެވެ. ދެ ވަނަ އަށް ދިޔަ، އައިލެންޑް ރަނާސް މޯލްޑިވްސްގެ ޔޫސުފް އިބްރާހިމް ރޭސް ނިންމީ 4 މިނިޓް، 14.82 ސިކުންތުންނެވެ. މި އިވެންޓްގެ ތިން ވަނައިގައި ދުވި، ނަސީރު ސްޕޯޓްސްގެ، އަބްސަލް އަބްދުﷲ އާދަމް ވަނީ، މި ބައިގެ ގައުމީ ޖޫނިއާ ރެކޯޑް ހަދައިފަ އެވެ. އޭނާ ރޭސް ނިންމީ، 4 މިނިޓް، 28.26 ސިކުންތުންނެވެ. މި ރެކޯޑް ކުރިން އޮތީ 2011 ވަނަ އަހަރު ވޯލްޑް ޔޫތު ޗެމްޕިއަންޝިޕްގައި ގައުމީ ޓީމުގައި ހިމެނިގެން ދުވި، އަޒްހަމް ވަހީދު އަތުގަ އެވެ. އޭނާ އެ ފަހަރު ރޭސް ނިންމީ، 4 މިނިޓް، 29.12 ސިކުންތުންނެވެ.
ފިރިހެނުންގެ 400 މީޓަރު ބައިން އެއް ވަނަ ހޯދީ ސާއިދު ސްޕޯޓްސްގެ އާދަމް ރިއްފަތު އެވެ. އެއީ، 51.81 ސިކުންތުން ރޭސް ނިންމައިގެންނެވެ. ވިލާ އިންޓަނޭޝަނަލް ސްކޫލްގެ ހުސެއިން ޒީކް ސުއާދު، ދެ ވަނަ ހޯދީ، 52.41 ސިކުންތުން ރޭސް ނިންމައިގެންނެވެ. އަދި ތިން ވަނަ ހޯދި، ސާއިދު ސްޕޯޓްސްގެ ޔޫސުފް އާއިޝް ހަސަންގެ ޓައިމިން އަކީ 53.11 ސިކުންތެވެ.
އަންހެނުންގެ 400 މީޓަރު ރޭހުން، ދާންދޫ ސްކޫލްގެ އައިމިނަތު ލަޔާނާ މުހައްމަދު އެއް ވަނަ ހޯދީ، އެއް މިނިޓް، 01.22 ސިކުންތުން ރޭސް ނިންމައިގެންނެވެ. ދެ ވަނަ އަށް ދިޔަ، ކްލަބް ރާވެރިޔާ، ނައާދު އައްސަދު ވަޖްދީގެ ޓައިމިން އަކީ އެއް މިނިޓް، 01.48 ސިކުންތެވެ. އަދި ނަސީރު ސްޕޯޓްސްގެ އައިމިނަތު ޒީވާ އާމިރު، ތިން ވަނަ ހޯދީ އެއް މިނިޓް، 05.23 ސިކުންތުން ރޭސް ނިންމައިގެންނެވެ.
