ރާއްޖޭގެ މާލީ ހާލަތު ރަނގަޅު ކުރެވޭނީ ސަރުކާރުތަކުން ކުރާ ވައްކަން ހުއްޓައި، ސަރުކާރަށް ފައިދާ ވާ މަޝްރޫއުތައް ހިންގައިގެން ކަމަށް ދ. މީދޫ ދާއިރާގެ މެމްބަރު އަހުމަދު ސިޔާމް މުހައްމަދު (ސަން ސިޔާމް) ވިދާޅުވެއްޖެ އެވެ.

ރައްޔިތުންގެ މަޖިލީހުގެ މިއަދުގެ ޖަލްސާގައި ބަޖެޓަށް ބަހުސް ކުރައްވަމުން، ބަޖެޓުގައި ހުރި ދާއިރާތަކަށް އަލި އަޅުއްވާލައްވާލައި، ދައުލަތަށް ލިބޭ އާމްދަނީއިން ހަރަދު ފޫ ބައްދަން ދަސް ކުރަން ޖެހޭ ކަމަށް އޭނާ ވިދާޅުވި އެވެ. ވަރަށް މަދުން ނޫނީ މަޖިލީހުގެ ޖަލްސާތަކަށް ސިޔާމް ހާޒިރުވެވަޑައިނުގަންނަވަ އެވެ.

ދައުލަތަށް ލިބޭ ފައިސާއިން ދެކޮޅު ނުޖެހުމަކީ ސަރުކާރުތަކަށް ދިމާވާ އެންމެ ބޮޑު ގޮންޖެހުންކަމަށް ސިޔާމް ވިދާޅުވި އެވެ. ސަރުކާރުން ހިންގާ ޕްރޮޖެކްޓްތަކަކީ، އޭގެ ސަބަބުން ދައުލަތަށް ފައިދާ ވާނެ ޕްރޮޖެކްޓްތަކަށް ވާން ޖެހޭ ކަމަށް ސިޔާމް ވިދާޅުވި އެވެ.

ބަޖެޓުގެ ހަރަދުތައް ފޫބެއްދުމަށް ހިލޭ އެހީގެ ގޮތުގައި ހޯދާ ފައިސާއަށް ބަރޯސާ ވަމުންދާތީ އެކަން ފާހަގަކުރައްވައި، އަބަދު ހިލޭ އެހީ ދޭނެ ގައުމުތައް ނުތިބޭނެކަން ގަބޫލުކުރަން ޖެހޭ ކަމަށް ވިދާޅުވި އެވެ. މިއަދު ދުނިޔޭގެ އެކި ހިސާބުތަކުގައި ހާލަތު ބަދަލުވަމުންދާ ކަމަށާއި ހިނގަމުންދާ ހަމަނުޖެހުންތަކާއި ހަނގުރާމަތަކާއެކު ރާއްޖޭގެ އިގްތިސާދަށް ކުރާނެ ގެއްލުންތަކާ މެދު ވިސްނުން މުހިންމުކަމަށް ވިދާޅުވި އެވެ.

އެގޮތުން، މިހާރުވެސް ޔޫކްރެއިން އަދި ޔޫރަޕްގެ ފަތުރުވެރިން އަންނަ މިންވަރު މަދު ވެފައިވާ ކަމަށް ސިޔާމް ވިދާޅުވި އެވެ. އަދި ފަތުރުވެރިން ރާއްޖޭގައި ދުވަސްތައް ހޭދަކުރާ މިންވަރު ވެސް ދަށް ވެފައިވާކަން ސިޔާމް ފާހަގަކުރެއްވި އެވެ.

"އެޑިޔުކޭޝަން މިނިސްޓްރީން ހަދަން ހަވާލު ކުރާ ކްލާސްރޫމެއް އަޅުގަނޑުމެން އެބަ ހަދަން 1.5 ނުވަތަ 2 މިލިއަން ރުފިޔާއަށް، އެކަމަކު އެހެން ބަޔަކަށް ހަދަން މި ހަވާލު ކުރަނީ އެތައް ގުނައެއް ބޮޑުކޮށް. 2. ނުވަތަ 22 މިލިއަން ރުފިޔާއަށް! ދެން ކިހިނެއްތޯ ބަޖެޓަށް ވާނީ،" ސިޔާމް ވިދާޅުވި އެވެ.

ރިޒޯޓްތަކާއި ގެސްޓް ހައުސްތަކުން ލިބޭ ފައިދާ ދަށަށް ދާން ފަށާފައިވާ ކަމަށާއި ދައުލަތަށް ލިބޭ އެއްޗަކުން މެނޭޖް ކުރަން ޖެހޭކަމަށް ސިޔާމް ތަކުރާރުކޮށް ވިދާޅުވި އެވެ. އެކަން އެގޮތަށް ނުކުރެވެނީ ސަރުކާރުތަކުން ވައްކަން ކުރާތީ ކަމަށް ސިޔާމް ވިދާޅުވި އެވެ. ކޮންމެ ވެރިކަމެއް ނިމުމާއެކު 100 މިލިއަން ރުފިޔާ ނުވަތަ ޑޮލަރުގެ ވައްކަމުގެ ވާހަކަތަކާއި ތުހުމަތުތައް ކުރަމުންދާ ކަމަށް ސިޔާމް ވިދާޅުވި އެވެ.

ރާއްޖޭގެ އިގްތިސާދީ ހާލަތު ރަނގަޅު ކުރެވޭނީ ރައްޔިތުންގެ ފައިސާއިން ވައްކަން ކުރުން ހުއްޓުވިގެން ކަމަށް ސިޔާމް ވިދާޅުވި އެވެ. އަދި ސަރުކާރަކީ ކުންފުންޏެއްގެ ގޮތުގައި ދެކި ސަރުކާރުން ކުރާ ކޮންމެ ހަރަދަކީ ފައިދާ އާއި ލާބަ ވާން ޖެހޭނެ ކަމެއްގެ ގޮތުގައި ދެކިގެން މަސައްކަތް ކުރަންޖެހޭ ކަމަށް ވިދާޅުވި އެވެ.